காரணம்

பல காரணங்கள்
சொல்லியாயிற்று
நான் வாழ்வதற்கு

செவி குவித்து
கேட்காதது
உங்கள் தவறுதான்

பல நூறு காரணங்கள்
சொல்லியாயிற்று
நான் வாழ்ந்தே தீருவதற்கு

செவி குவித்து
கேளாதுபோனது
உங்கள் தவறுதான்

சரி
இப்போது கேளுங்கள்

ஓரே ஒரு
காரணம்தான் இருக்கிறது

நான் மரணித்துப் போகாமல்
இருப்பதற்கு

ஒரே ஒரு காரணம்

நான் வாழ வேண்டும்

அனுபவ சித்தனின் குறிப்புகள்

340-

நான் மரமல்ல
இளைப்பாறிச்செல்ல

341-

பசியிடம் சொன்னேன்
நீ சாப்பிட்டதுபோல்
நினைத்துக்கொள்

பொய்கூழ் ஊற்றி
என் நெருப்பை
வீரியமாக்குகிறாய்
சொல்லியபடியே
சுட்டது பசி

நிலம்

கன்னிவெடி பதிக்கப்பட்ட
நிலத்தின் மீது
ஓடி வந்துகொண்டிருக்கிறது
ஒரு குழந்தை

கன்னிவெடி பதிக்கப்பட்ட
நிலத்தின் மீது
ஓடி வந்துகொண்டிருந்தது
ஒரு குழந்தை

நன்றி பிகாஸோ

பிகாஸோவுடன்
பேசிக்கொண்டிருந்தேன்
கனவிலிருந்து
வெளியேறும் வரை

கடைசி தருணத்தில்தான்
பார்த்தேன்

அவர் என் பெயரை
எழுதிவிட்டுப்
போயிருப்பதை

பாதரசம் போல்
ததும்பியது பெயர்

என்னையே வரைந்திருக்கலாமே
என்ற ஆதங்கத்துடன்
பெயரை ஊத
முகம் வந்தது

என் முகம்தான்

நம்புங்கள்

என் முகமேதான்

நன்றி பிகாஸோ

அனுபவ சித்தனின் குறிப்புகள்

334-

கனவில் கொட்டுகின்றன வண்ணங்கள்
எழுகிறான் ஓவியன்
ஓவியங்களைப் பிடிக்க

335-

ஏறி
ஏறி

மேலேறி
மேலேறி

வானம்
மேலேறி

336-

காட்டிய இடத்தில்
எதுவுமில்லை என்றார்

எதுவுமில்லாததைதான்
காட்டினேன் என்றேன்

பார்க்க ஆரம்பித்தார்
எதுவோ இருப்பதுபோல்

337-

நொடிக்கும்
குறைவான கணத்தில்
இறந்துபோனது
நசுக்கிய எறும்பு

பெரும் குற்றமாகி
நசுக்குகிறது
அதன் ஆயுளின் கனம்

338-

அமைதியில்
தொடங்குகிறது
பாடலின் இசை

339-

வாங்கிக்கொண்டீர்களா
என்கிறீர்கள்

வெறும் கை
எங்களிடம்

கிடைத்தது
உங்களிடம்

சேர்ந்து சொல்கிறோம்

வாங்கிக்கொண்டோம்

அனுபவ சித்தனின் குறிப்புகள்

330-

இது தவமல்ல

வெறும் கண்மூடல்தான்

நீங்கள்
கல்லெறியலாம்

331-

என் கேள்வி உங்களை
பாரமாக அழுத்துகிறதா

இல்லை
விடையாக இலேசாக்குகிறது

332-

கிளையில் ஏறிய எறும்பு
கேட்டது மரத்திடம்
பாரமாக இருக்கிறேனா
கிளை அசைத்து
சொன்னது மரம்
உன் கேள்விதான்
பாரமாக இருக்கிறது

333-

நீங்கள் நினைத்த இடத்தில்
முடித்துக்கொள்ளலாம்

நினைக்கும் இடத்தில்
தொடங்கலாம்

அதுபோல்
வடிவமைக்கப்பட்டிருக்கிறது
இந்தக் கவிதை

அனுபவ சித்தனின் குறிப்புகள்

324-

நாடகம் முடித்து நடக்க
தொடர்நது வந்தது
மேடையின் குரல்

325-

சொல்வதற்கு ஒன்றுமில்லை
சொற்களிலும்
ஒன்றுமில்லை

326-

குழந்தையின் கண்கள்
எனக்கு

இளமையா
உலகம் இருக்கு

327-

வாசிக்காத போதும்
வாசித்தவன் கேட்கிறான்
இசையை

328-

வெள்ளைதாள் முழுதும்
தேடினேன்
எழுத

329-

பிடி தராவிட்டாலும்
எட்டிப் பிடித்துவிடுகின்றன
ஒன்றிரண்டு

தொடர்ந்து...

தொடர்ந்து தோற்கிறாய்
தொடர்ந்து புறக்கணிக்கப்படுகிறாய்
தொடர்ந்து காக்க வைக்கப்படுகிறாய்
தொடர்ந்து இறக்கி விடப்படுகிறாய்
தொடர்ந்து வெளியேற்றப்படுகிறாய்
தொடர்ந்து துரத்தப்படுகிறாய்
தொடர்ந்து தூக்கி எறியப்படுகிறாய்
தொடர்ந்து காயங்கள் பெறுகிறாய்
தொடர்ந்து முகவரி மாற்றப்படுகிறாய்
தொடர்ந்து ஒளித்து வைக்கப்படுகிறாய்
தொடர்ந்து அனாதையாகிறாய்
தொடர்ந்து மையம் இழக்கிறாய்
தொடர்ந்து துண்டிக்கப்படுகிறாய்
தொடர்ந்து ரத்தம் சிந்துகிறாய்
தொடர்ந்து இறந்து போகிறாய்
எத்தனையோ தொடந்தாலும்
தொடர்ந்து வந்துகொண்டிருக்கிறாய்

கோப்பையில்

போதையின்
தீப்பற்றி எரிய
மதுவும் நானும்
வழிகிறோம்
கோப்பையில்

ஒன்று

ஒன்றுதான்

கால் தாவிப்போகும்
மலையாகவும்

கை குவித்து ஆடும்
கல்லாகவும்

இரண்டும்
ஒன்றுதான்

பார்த்துக்கொள்

பார்த்துக்கொள்

காணாமல்போனவர்கள் பட்டியலில்
உன் பெயர் வராமல்
பார்த்துக்கொள்

கோழைகளின் குவியலில்
உன் நிழல் விழாமல்
பார்த்துக்கொள்

குழந்தைகளின் கண்களில்
கண்ணீர் துளிர்க்காமல்
பார்த்துக்கொள்

பார்த்துக்கொள்

உன் குதிரையை
தூங்கவிடாமல்
பார்த்துக்கொள்

உன் காலண்டரில்
ஒட்டடைப் படியாமல்
பார்த்துக்கொள்

உன் கண்ணீரை
கடலாகாமல்
பார்த்துக்கொள்

உன் கனவுகளை
ஒதுங்கிப் போகாமல்
பார்த்துக்கொள்

உன் அன்பை
வியாபாரமாக்காமல்
பார்த்துக்கொள்

பார்த்துக்கொள்

உன் தனிமையை
துணை தேடாமல்
பார்த்துக்கொள்

உன் பூக்களை
உதிராமல்
பார்த்துக்கொள்

பார்த்துக்கொள்

உன் கால்களை
நிற்காமல்
பார்த்துக்கொள்

உன் ஜன்னல்களை
மூடாமல்
பார்த்துக்கொள்

உனது வயதை
வருந்தாமல்
பார்த்துக்கொள்

பார்த்துக்கொள்

உன் தோல்வியை
பாடமாகப்
பார்த்துக்கொள்

தருணங்களைத்
தவறாமல்
பார்த்துக்கொள்

எழும்போது
விழாமல்
பார்த்துக்கொள்

விழும்போது
உடையாமல்
பார்த்துக்கொள்


பார்த்துக்கொள்

சுற்றத்தை
சொர்க்கமாகப்
பார்த்துக்கொள்

நட்பை
நுட்பமாகப்
பார்த்துக்கொள்


வாழ்க்கையை
ஈர்ப்பாகப்
பார்த்துக்கொள்

மரணத்தை
நட்பாகப்
பார்த்துக்கொள்

பார்த்துக்கொள்

உலகத்தை
உன்னைப்போல்
பார்த்துக்கொள்

அனுபவ சித்தனின் குறிப்புகள்

320-

கடலாய்
விரியும் காமம்
துளிக்குள் பதுங்கும்

321-

முத்தங்கள்
அடியில்
அன்பின் விஷம்

322-

உறக்கத்தின்
ஏதோ ஒரு ஓரத்தில்
விழித்திருக்கிறேன்

323-

சிக்காமல் வெளிவந்தேன்
இருந்தும் வதைக்கிறது
சிக்கிக்கொண்ட
துகள்களின் துயரம்

திறத்தல்

மெளனத்தைத் திறக்க
ஒவ்வொருவரும்
சாவிகள் தயாரிக்க
மெளனத்தாலேயே
திறக்கிறது
ஒரு குழந்தை

விழுங்குதல்

உன் பெயரை
விழுங்குகிறேன்
விதையைப் போல

நீ உள்ளோடி
வேர்பிடித்து
வனமாகி விரிகிறாய்

அனுபவ சித்தனின் குறிப்புகள்

315-

இரவு
பார்க்காவிட்டால் என்ன
இருள் பார்க்கிறது

316-

எதுவும் கேட்காமல்
வெளியேறுகிறாய்
நீ எவ்வளவோ
எடுத்துப்போவதுபோல்
தோன்றுகிறது

317-

முன்நாக்கு வரை
கொண்டுவந்த ஓவியத்தைப்
போட்டுக் கிழித்தேன்
சொற்களின் குழப்பத்தால்

318-

புள்ளியைத் தொட்டேன்
ஒளிந்திருந்த மேகம்
நனைத்துச் சிரித்தது

319-

அமைதியாக
வெளியேறச் சொல்கிறார்கள்
அமைதியை வெளியேற்றத்
துடிப்பவர்கள்

பிறகு

இந்த நேரம்
பிறகு கிடைக்காது
சொல்லிவிடுங்கள்

இந்த நேரம்
பிறகு வராது
செய்துவிடுங்கள்

இந்த நேரம்
பிறகு வாய்க்காது
பேசிவிடுங்கள்

இந்த நேரம்
பிறகு இருக்காது
பார்த்துவிடுங்கள்

இந்த நேரம்
பிறகு அரும்பாது
முளைத்துவிடுங்கள்

இந்த நேரம்
பிறகு பேசாது
கேட்டுவிடுங்கள்

இந்த நேரம்
பிறகு பிறக்காது
வாழ்ந்துவிடுங்கள்

இந்த நேரம்
பிறகு பார்க்காது
பார்த்துவிடுங்கள்

இந்த நேரம்
பிறகு திரும்பாது
எழுதிவிடுங்கள்

அனுபவ சித்தனின் குறிப்புகள்

307-

நானூற்றிய நான்
வழிகிறது
நானற்ற வெளியில்

308-

எத்தனையோ முறை
பதுங்கிப்போனேன்
ஒரு முறையும்
பாயக்காணோம்

309-

யார் அள்ளிப்போட
மனதில் தேங்கிய
மலம்

310-

நான் சென்றபோது
யாருமில்லை
வெளியேறியபோது
எல்லோரும்
இருந்தார்கள்

311-

வாடிப்போயிருக்கிறது
வனத்தின் ஞாபகம் வந்த
பால்கனிச் செடி

312-

கண் மூட
கண்டேன்
தூசிகளின் தியானம்

313-

எவ்வளவோ கிடைத்தும்
நழுவிப்போனவை மீதே
தொற்றித் திரிகிறது ஏக்கம்

314-

அப்பாவும் நானும்
ஒன்றாகவேப் பிறந்தோம்
வேறு வேறு வருடங்களில்

முடிந்தபின்

ஒவ்வொரு துளையிலும்
வார்த்தைகளைப்
போட்டுக்கொண்டே வந்தேன்
முடிந்தபின்
வாசித்தேன் வார்த்தைகளை
பாடியது புல்லாங்குழல்

வயது

உடைந்துபோன
தாத்தாவின் கைத்தடியில்
ஒரு துண்டை
எடுத்துப் பார்த்தேன்
வயது குறைந்தது போலிருந்தது

விழித்தபடி

அவள் கடைசி ஆசையைச் சொன்னாள்

ஒரு மெழுகுவத்தி வெளிச்சத்தில்
இறந்துபோக வேண்டும் என்று

அவள் கண்மூடும் வரை
விழித்தபடியே இருந்தது மெழுகுவத்தி

நெருக்கம்

தள்ளி நிற்கும்
பெண்ணுக்கும் எனக்கும்
நடுவில்
நெருக்கமாய் நிற்கிறாள்
அதே பெண்

அனுபவ சித்தனின் குறிப்புகள்

306-

என் திருச்சபையில்
என்னை மன்னித்துவிட்டேன்
தலை வெட்டப்போகும்
உங்கள் தீர்ப்பைக் கொஞ்சம்
தளர்த்தப் பாருங்கள்

பிரம்புக்கடியில்

அம்மாதான் சொன்னாள்
அப்பாவின் பிரம்புக்கடியில்
அன்பு இருப்பதை
அதன் பிறகு
வலிக்கவேயில்லை

நீங்கள்

இந்தக் கவிதையின் உள்ளிறங்கி
நீங்கள் வருகையில்
எதிர்பார்த்திருப்பேன்
உங்களை வரவேற்க்க

வராமல்
திரும்பிவிடுவீர்கள் எனில்
காத்திருப்பேன்
உங்களை வழியனுப்ப

அனுபவ சித்தனின் குறிப்புகள்

300-

வானம் கொறிக்கும் பறவைக்கு
தானியமாகிறது
மழை

301-

நீண்ட சுவர்
உலகத்தை மறைக்கிறது
ஒற்றை ஜன்னல்
உலகத்தை இணைக்கிறது

302-

மிதந்தபோது
இறந்துபோனேன்
இறந்தபோது
புதைந்துபோனேன்

303-

தனியாய்
எனக்கெதுவும்
அடையாளமில்லை
எல்லாமே அன்புதான்

304-

கடல் உண்ட மலைப்பாம்பு
இறந்துபோனது
விக்கல் எடுத்து

305-

நுனி நாக்கில்
முறிந்து கிடக்கும் மரம்
சொற்களின் பாரம் தாங்காமல்

அதே பெயர்

கடந்துபோன பெண்ணுக்கு
நானே ஒரு பெயர் வைத்து
மெளனமாய்க் கூப்பிட்டேன்

அதே பெயரைச் சொல்லி
யாரோ அவளைக் கூப்பிட்டார்கள்

அவள் வந்துகொண்டிருந்தாள் இங்கும்
சென்றுகொண்டிருந்தாள் அங்கும்

அனுபவ சித்தனின் குறிப்புகள்

297-

ஒற்றை வரி
உறங்குகிறது
அதில் மொத்த கவிதையும்
விழித்திருக்கிறது

298-

பொய் வண்ணங்கள்
தொட அஞ்சுகிறது
தூரிகை

299-

சத்தமின்றி
காலருகே
வரும் பாதை
நடக்கையில்
முன்போய்
விரிந்து
வழி காட்டும்

300-

படிக்காத புத்தகம்
என் சோம்பலைப்
படித்தபடி

அபியின் கவிதை

விடிவதற்கு இன்னும்
நேரமிருக்கிறது
என்று முடியும்
அபியின் கவிதையில்
தொடங்கும் கவிதையை
எப்படி கண்டெடுப்பது

பொய்

குழந்தைக் கேட்டாள்

அப்பா பொய்
சொல்கிறீர்களா

முன்சொன்ன
எல்லாப் பொய்களையும் விட
இல்லை என்று
அப்போது சொன்ன பொய்
கொன்று போட்டது என்னை

நண்பர்

யார் என்றேன்

உங்கள்
நண்பரின் நண்பன் என்றார்

எந்த நணபர் என்றேன்

சிரித்தார்

நான் நண்பர்களை
யோசித்துக்கொண்டிருந்தேன்

அவர் நண்பராகிக்கொண்டிருந்தார்