சாவிகள்

சையத் அலி

அவர் பெயர்

 

அவர் இன்ஷா அல்லா

சொல்லும்போது

இசைகேட்பது போலிருக்கும்

 

டூப்ளிகேட் சாவி

செய்வதில் நிபுணர்

 

அவர் விரல்களில்

சாவி சிற்பமாகும்

 

குழந்தைபோல்

சொன்னதைக் கேட்கும்

 

வலியின்றிப் பூட்டுகள்

வாய் திறக்கும்

 

அடிக்கடி சுருட்டுப் பிடிப்பார்

சுருட்டின் புகை வளையங்கள்

காற்றில் சித்திரங்களாகிப் பறக்கும்

அப்போது ஏதாவது சொல்லுவார்

 

அவர் எளிய வார்த்தைகள்

சாவிபோல் எண்ணங்களைத் திறக்கும்

 

நான் எதுவும்

அவரிடம் சாவி போட்டதில்லை

ஆனாலும் பழக்கம்

அடிக்கடி பேசுவதுண்டு

 

ஒரு தேநீர் சந்திப்பில்

அவரிடம் கேட்டேன்

 

மனதின் மர்மத்தைத் திறக்க

ஏதேனும் சாவி இருக்கிறதா

 

சுருட்டின் புகை

அதிர்ந்து பறக்கச் சிரித்தார்

பிறகு சொன்னார்

 

மனது திறந்தேதான் இருக்கிறது

மர்மம்தான்

நம் கண்களுக்குப் புலப்படாமல்

மாறிக்கொண்டே இருக்கிறது

 

நான் எழுதிக்கொண்டிருந்தபோது

நான் எழுதிக்கொண்டிருந்தபோது

ஒரு பூனை தாவிக்குதித்து ஓடியது

மழை எட்டிப்பார்த்தது

சுவர்க் கடிகாரம் ஒழுங்குடன் ஒலித்தது

தூரத்து டீவியிலிருந்து குரல்கள்

படிக்கட்டில் யாரோ

வேகமாக ஓடினார்

ஜன்னல் திரைச்சீலை நடனமிட்டது

மேஜையை ஒரு எறும்பு

தன் ஊர்தலில் அளந்தது

பூச்சியை விழுங்கிய பல்லி

மெல்ல உள்ளே தள்ளியது

பசி வேண்டுகோள் வைத்தது

காலிங்பெல்லை யாரோ அடித்தார்கள்

நான் நிதானமாய் எழுந்து போய்

கதவைத் திறந்தேன்

அவர் வேகமாக உள்ளே வந்து

எழுத்துக்குள்

உணவை வைத்துச் சென்றார்

-         ராஜா சந்திரசேகர்

 

 

துல்லியங்களின் கடவுள்

நான் துல்லியங்களின் கடவுள்

தோராயப் பூசாரித்தனம்

என்னிடமில்லை

சுமப்பவர்

 இல்லாததைச்

சுமப்பவர்

இறக்கிவைக்கப்

போராடுகிறார்

அன்பு போதும்

அன்பு போதும்

என்றார்

 பசிக்கும்

அது போதுமா

என்றேன்

 அன்பான வயிறு

தேடி

எதையாவது

பெற்றுக்கொள்ளும்

சொல்லிவிட்டுப்போனார்

என் கண்களில்...

 கைதட்டிக் கூப்பிட்டவர்

அப்பா போலிருந்தார்

அருகில்போய் கேட்டேன்

ஒன்னுமில்ல தம்பி

என் பையன் சாயல்ல இருந்தீங்க

அதான் ஒருவாட்டி

பாத்துக்கலாம்னு கூப்டேன்

கண்களைத் துடைத்துக்கொண்டார்

ஏன் அழறீங்க என்றேன்

அவன்போயி சேர்ந்துட்டான் என்றார்

வேறெதும்

சொல்லிக்கொள்ளாமல்

திரும்பி நடந்தேன்

என் கண்களில்

நீர் இருந்தது

 

நம்மிடமிருந்து

உரையாடல் கனிந்து முடிய

ஒரு சிறு அணைப்பு

மிச்சமிருக்கிறது என்றாள்

சிறு முத்தமும் என்றான்

நாணித் தலைகுனிந்தாள்

பிறகு தலை நிமிர்ந்து

அவன் கண்களிடம் சொன்னாள்

முதலில் அணைப்பு

என்னிடமிருந்து வரட்டும்

பிறகு முத்தம்

உன்னிடமிருந்து…

ஒருவரும் இல்லை

 என்னோடு உறங்கிக்கொண்டிருந்தவர்

சொல்லிக்கொள்ளாமல்

அமைதியாகப் போய்விட்டார்

இறந்துவிட்டார்

நானும் இறந்துகொண்டிருக்கிறேன்

சொல்லிச் செல்ல

அருகில் ஒருவரும் இல்லாமல்

எப்போது பூமிக்குத் திரும்புவீர்கள்

 உங்கள் ஒப்பனையும் நடிப்பும் அருமை

உங்கள் வசனங்கள் அதிர்வுகளை ஏற்படுத்துகின்றன

மேடை முழுதும் புயல்போல் ஆக்கிரமிக்கிறீர்கள்

உங்கள் கர்ஜனை அரங்கை விழுங்குகிறது

இமைமூடாது என்னென்னவோ செய்கிறீர்கள்

சபையோரை உறங்கவிடாமல் பார்த்துக்கொள்கிறீர்கள்

காட்சிகளும் திரைக்கதையும் உங்களுக்கு

வளைந்துகொடுக்கின்றன

நீங்கள் நிமிர்ந்து நடிக்கிறீர்கள்

பலவிதமாய் நடிக்கிறீர்கள்

மிதக்கிறீர்கள்

பறக்கிறீர்கள்

உங்களிடம் ஒன்றே ஒன்று கேட்க வேண்டும்

மனிதனாக எப்போது

பூமிக்குத் திரும்புவீர்கள்

யாரோ

மலையுச்சிக்கு வந்து

மலையோடு

ஒரு செல்ஃபி எடுத்துக்கொண்டு

செல்போனைக் கீழே வைத்துவிட்டு

மெல்ல மூச்சை

உள்ளிழுத்து வெளிவிட்டு

குதித்துவிட்டான்

சற்று நேரம் கழித்து

மேலேறி வந்த பெரியவர்

வியர்வையைத் துடைத்து

செல்போனைக் கையில் எடுத்து

சுற்றும் முற்றும் பார்த்துச் சொல்கிறார்

“யாரோ மறந்து வச்சிட்டுப் போயிட்டாங்க’’

“யாரோ வச்சிட்டுக் குதிச்சிட்டாங்க’’

நடுக்கத்துடன் மலை சொன்னது

அவருக்குக் கேட்கவில்லை

 

மூதாட்டி

 ஆளரவமற்ற இடத்தில்

ஆலயத்தின் மூலையில்

இமைமூடி

தவம்போல் அமர்ந்திருக்கும்

மூதாட்டியின் கண்களிலிருந்து

வழிகிறது நீர்

அவள் மேல்

அசைகிறது ஒளிக்கீற்று

பெருவயதுக்காரி

கண் திறக்கும்போது

பிரபஞ்சம்  சிறிதேனும்

பேரன்பைத் தரக்கூடும்

துயரமும் வலியும்

 துயரமும் வலியும்

ஒவ்வொருவராக விடைபெற்றுக்கொண்டார்கள் நானும் விடைபெற வேண்டும் என்னிடமிருந்து வலியும் துயரமும்

காலம் சுழல்கிறது

அவர் பேசுவதைக் குறைத்துக்கொண்டார்

இவர் பேசுவதில்லை

மற்றவர் குறுஞ்செய்திகளும் குறைந்துபோனது

இன்னொருவர் அன்பிரண்ட் செய்துவிட்டார்

உள்ளேன் அய்யா என்பது போலிருந்த அன்பும்

ஓடி எங்கோ ஒளிந்துகொண்டது

எதிர்படும் ஒருவர் தெருமாறிச் செல்கிறார்

குற்றப்பத்திரிக்கை வாசிப்பவர்

மன்னிப்பைக் கடலில் எறிந்துவிட்டு வாக்கிங் போகிறார்

சுவரெழுப்பிக்கொண்டவர்கள் கொஞ்சம் பேர்

ஜன்னலில்லாத சுவர்கள் என்பது வருத்தமான தகவல்

விஷேசங்களில் சந்தித்தால் உண்டு

விஷேசங்களுக்கான அழைப்புகள் வருவது குறைந்துபோனது

அல்லது விஷேசங்கள் ரகசியமானது

முகம் தெரியாதவர் புன்னகைக்கிறார்

கடவுள் பிரார்த்தனையைக் கேட்டுக்கொண்டார்.

மற்றபடி காலம் சுழல்கிறது

இசைத்தட்டு போல

அதில் எனக்கான இசையைக் கேட்டுக்கொள்கிறேன்

குட்டிமழைக் கூப்பிடுகிறது

புழுக்கத்தை ஆற்றிக்கொள்ளக் கொஞ்சம் போய்

நனைந்துவிட்டு வர வேண்டும்.