சொன்னேன்

உண்மையைக் காப்பாற்ற

பொய் சொன்னேன் 

பொய்யைக் காப்பாற்ற 

உண்மை சொன்னேன் 

என்னைக் காப்பாற்ற 

இரண்டையும் சொன்னேன்

அனுபவ சித்தனின் குறிப்புகள்

957-

கால்கள் சக்கரம்

உடல் வாகனம்

958-

விரிந்து கிடக்கும் 

வெள்ளைத்தாளில் 

எங்கே எழுத்து 

தேடுகிறேன்

959-

பசியும் தேட 

நானும் தேட 

பசிக்குக் கிடைத்தது 

எனக்குக் கிடைக்கலாம்         

960-

இந்த வலியின் மேல் 

வேறொரு வலியைப் 

பூசுகிறேன்

ஆறிவிடும் 

என்ற நம்பிக்கையில்

961-

நான் ஒற்றைச் செங்கல்

ஆனாலும் 

சுவரின் கனவுகள் 

எனக்குண்டு

962-

மரக்குதிரை 

போன தூரம் 

அதன் மனதுக்குள் 

ரொம்ப நீளம்

963-

வலை அறுத்துக் 

கடல் திரும்பும் மீன் 

என்ற வரியுடன் 

நீந்தும் மீன் 

தூரமாகிறது 

கொலை வலைத் தாண்டி

964-

என் வரைபடத்தை 

பொய்யால் எழுத 

பூரணமாச்சு

மெய்யால் எழுத 

பிய்ந்து போச்சு

மூன்று பேர்

என்னைக் கொல்லும்படி 

மூன்று பேரிடம் 

சொல்லி வைத்தேன் 

துப்பாக்கி சரியில்லை 

முடியாது என்று 

சொல்லிவிட்டார் ஒருவர் 

போலீஸில் அகப்பட்டால் 

என் வாழ்க்கைப் போய்விடும் என்று 

விலகிக் கொண்டார் 

இன்னொருவர்

எனக்கிட்ட 

தற்கொலைக் கட்டளையை 

நிறைவேற்றாமல் உள்ளேன் 

நான் மூன்றாவதாக

சரி போகட்டும் என்று 

வாழ்ந்துகொண்டிருக்கிறேன்

மழையை வரைதல்

மழையை 

வரையச் சொன்னேன் 

சுற்றிக் கிடக்கும் 

வண்ணப் பென்சில்களை 

தொடாமல் 

சொன்னாள் குழந்தை 

மழையை வரைய 

மழை வேண்டும்

நானும்

இருள் இசைக்கிறது 

ஒளி கேட்கிறது 

நானும்

பிரார்த்தனை

எப்போதோ 

இறந்து போன 

பட்டாம் பூச்சி 

நீண்ட நேரமாகப் 

பார்த்துக் கொண்டிருக்கிறேன் 

இப்போதாவது 

பறந்து போய் விடு என்ற 

பிரார்த்தனையுடன்

பார்த்தல்

இமை மூடி
மெளனம் பார்த்தேன்
என்று இமைத் திறந்து
மெளனம் பார்க்கும்

எதை

துரத்திப் போன என்னைத் 

துரத்தி வந்த கேள்வி 

நிறுத்தியது

எதைத் துரத்தி ஓடுகிறாய் 

மீதி உயிர்

தாயின் புடவையில் 

தற்கொலை 

செய்து கொண்ட மகன் 

என் மகனைக் கொன்னது 

நான்தான் 

நான்தான் 

நைந்துபோன 

புடவையோடு 

சண்டை போட்டபடி 

கண்ணீரில்

மீதி உயியைச் 

சிந்திக் கொண்டிருக்கும் தாய் 

போகிறேன்

ஒற்றைக் காலில் நின்று 

தவம் செய்வாயா 

அது தவமல்ல 

சித்திரவதை 

விடுங்கள் 

நான் போகிறேன் 

கிடைப்பது போதும்

முதல் வார்த்தை

விடியும் வரை 
எழுதிக் கொண்டிருந்தேன் 
விடிந்த பின் 
கிழித்துப் போட்டேன்
பல நூறு 
விடியல்கள் பார்த்துப்
பல்லாயிரம் 
பக்கங்கள் தாண்டி 
எழுதக் கிடைக்கலாம் 
அழிக்கவே முடியாத 
முதல் வார்த்தை

அழுகை

குழந்தைக்கான
சவப்பெட்டியில்
சவப்பெட்டியின்
ரகசிய அழுகையும்

கிடைத்த வரிகள்

ஒதுங்கிய பிணத்துடன்
கரைந்து மீந்து
கிடைத்த வரிகள்
நான் நீச்சல்
கற்றுக் கொள்ளாதது
என் தற்கொலைக்கு
உதவியது

ஒற்றைத் துளி

நண்பனின் 

இறந்த நாளின்று 

ஒற்றைத் துளி 

கண்ணீராய் வந்து 

என்னைப் பார்த்துவிட்டு 

மறைந்து போனான்

பிறந்த தேதி

கை நீட்டினாள் தேவதை

சிரித்தபடி

அவள் தாயிடம் கேட்டேன்

இவ பிறந்த தேதி

உனக்குத் தெரியுமா

அட போங்கைய்யா

என் பிறந்த நாளே

எனக்குத் தெரியாது

அவ அப்பன் யாருன்னும்

தெரியாது

இவளே நானே

தனியா பெத்தெடுத்தப்ப

மழை பெஞ்சுது

அது தெரியும்

என் வலிக்கு ஒத்தடமா

தூறிக்கிட்டிருந்தது

சிக்னல் விழ

என் வாகனத்தைத்

தாண்டிக்கொண்டு போய்

இடம் தேடி நிறுத்தி

திரும்பி வந்து பார்க்க

அவர்களைக் காணவில்லை

மழை தொடங்கி இருந்த்து

அப்போது அது

என் மேல் விழும்

அமிலமாகப் பட்டது

கிடைத்த வரிகள்

ஒதுங்கிய பிணத்துடன் 

கரைந்து மீந்து 

கிடைத்த வரிகள் 

நான் நீச்சல் 

கற்றுக் கொள்ளாதது 

என் தற்கொலைக்கு 

உதவியது

அனுபவ சித்தனின் குறிப்புகள்

950-

மெளனத்தில் 

புதைந்து போனாலும் 
இறந்து போவதில்லை 
வார்த்தைகள்

951-

எல்லோரும் 
திருடர்கள் 
அளவுகள்தான் 
வித்தியாசம்

952-

கனவில் 

திறந்து மூடும் 
சவப்பெட்டி 
ஒரு முறை 
கிள்ளிப் பார்த்து 
புரண்டு படுத்தேன்

953-

வனம் வந்த 
கனவால் 
புல் கொள்ளும் 
பெருமிதம்

954-

புள்ளியை உரித்தேன்
நகம் 
ருசியறிய

955-

அழகான 
இந்த வரியைக் 
கிளறிப் பார்க்காதீர்கள்
அழகற்று எதுவும் 
இதில் 
ஒளிந்திருக்கவில்லை

956-

கலைக்கும் நேரம்தான் 

எனக்கு 

வேஷம் போடுவதற்கும்

பாடு

பாட 

ஒன்றுமில்லை 

சரி 

ஒன்றுமில்லாததைப் 

பாடு

கோடு

கேள்விக்குறியை 

நிமிர்த்திக் கோடாக்கினேன் 

எதற்கு இதை 

செய்தோம் என்று 

கேள்வி எழுந்தது 

அனுபவ சித்தனின் குறிப்புகள்

944-
எடையற்ற 
உங்கள் மனிதாபிமானத்தை 
வைத்துக்கொண்டு 
என்ன செய்ய
தட்டில் 
காசு வைத்தால் 
தராசு நிமிரலாம்


945-
கண்ணீரால் 
வரையச் சொன்னால் 
புன்னகையை 
வரைந்து காட்டுங்கள்


946-
கணிதம் வழியே 
பயணப்படும் அன்பு 
கணக்குப் பார்த்து 
முடிந்துவிடும்


947-
பெரும் கொண்டாட்டங்களில்

சிறு கண்ண்ணீர்த் துளியை 

விரல் மட்டுமே 

கவனிக்கிறது

948-

புல்லிடம் 

நட்பைச் சொன்னேன்

உனக்கு ஒரு நாள் 

வனத்தின் கதைகளைச் 

சொல்கிறேன் என்றது

949-

குழந்தையின் ஆச்சர்யத்திற்குள் 

நுழைந்தேன்

பேருலகம் வரவேற்றது

மொழி வனம்

மொழி வனத்தில் 
நான் தொலைந்த 
சிறு பூச்சி 
மொழி தொட்டு 
ஆனேன் நான் 
பட்டாம் பூச்சி

பேரம்

சவப்பெட்டிக்கு 

பேரம் பேசிக்கொண்டிருந்தேன் 

விலை மதிப்பற்ற

உங்கள் உயிரைக் 

கூவிக் குறைக்காதீர்கள் 

என்றான் விற்றவன்