அனுபவ சித்தனின் குறிப்புகள்

881-

நகராத மனிதர்களைப் பார்த்து 
சொன்னது தேர் 

இந்த ஊரில் 

என்னையும் சேர்த்து 

எத்தனைத் தேர்கள்

882-

நான் மீனானது 

தெரியாமல் 

என்னைத் தூக்கி 

கடலில் எறிகிறீர்கள்

கரை ஒதுங்கி 

மிதப்பது 

உங்கள் ஏமாற்றம்தான்

883-

நீங்கள் துப்பிய 

எச்சியைத் துடைக்கிறேன் 

உங்கள் மேலிருந்து

884-

என் நான் 

தொலைந்து போயிற்று

இனி நான் 

நானின்றி இருக்கலாம்

885-

எதைஎதையோ 

செய்து கொண்டிருக்கிறேன்

எதை செய்ய வந்தேன் என்று 

மறந்து போயிற்று

காலத்தின் பாசி

அழவைத்து 

துடைக்க 

கை நீட்டுகிறீர்கள் 

உங்கள் 

விரல் நுனியில் 

ஒட்டிக்கிடக்கிறது 

காலத்தின் 

சாபம் பெற்ற 

பாசி

குரல்

கேட்க முடிகிறது

சைகையில்

உதிரும் குரல்

நான்

நான் சுமந்து

நான் சுமந்து

நான் சுமந்து

பாரமானேன்

நான் இறக்கி

நான் இறக்கி

நான் இழந்து

இலேசானேன்

எதோ ஒரு கணத்தில்

எதோ ஒரு கணத்தில் 
பூனையின் கண்களில் 
கருணையை 
அறியும் எலி
அந்தக் கணத்தைத் 
தன் தப்பித்தலுக்குரிய 
தருணமாக்கி விடுகிறது

பெயர்கள் வழியே

என் புனைப்பெயர்கள் வழியே 

நீங்கள் என்னை 

வந்தடைய முடியாது 

திசை சிக்கலாகும் 

என் பெயர் வழியே 

நீங்கள் வந்தடைந்தால் 

திரும்பிப் போக முடியாது 

வழி மறந்து போகும்

வனம்

வனம் கட்டிப் போடும்

புல்லாங்குழலை

என்னிடம்

விட்டுச் சென்றான் வழிபோக்கன்

வாசிக்க

கட்டவிழ்ந்தது என்னுள்

இருந்த வனம்

நீங்கள் யார்

நீங்கள் யார் 

நான் 

உங்கள் கேள்வியில் 

முடியும் பதில் 

உங்கள் பதிலில் 

தொடங்கும் கேள்வி