சட்டை

ஸ்டூலில்

ஏறி நின்று

அப்பாவின் சட்டைக்கு

பொத்தான்கள் போடுகிறது குழந்தை

ஒரு பொத்தான்

மாறி விட

சமநிலை மாறுகிறது சட்டை

சரி செய்துகொள்ளச் சொல்கிறாள் அம்மா

சரி என்கிறது குழந்தை

அப்படியே போகிறார் அப்பா

என்னிடம் சொற்கள் இருக்கின்றன

என்னிடம் சொற்கள் இருக்கின்றன
நான் பணக்காரன் என்று
சொன்ன நண்பர் ஒரு தேநீர்
வாங்கித் தரச் சொன்னார்
குடித்து முடித்து
நன்றியுடன் சொன்னார்
என்னிடம் சொற்கள் இருக்கின்றன
நான் ஏழையல்ல என்று