ராஜா சந்திரசேகர் கவிதைகள்

Sunday, May 22, 2016

ரயிலில் பாடிய சிறுவன்

ரயிலில் பாடிய சிறுவனை

தம்பி எனக்கூப்பிட்டு

பத்து ரூபாய் கொடுத்தேன்

தம்பி என்று

இன்னொரு முறை

சொல்லச் சொல்லி

கேட்டு விட்டு

பணத்தைக் கொடுத்துப்

போய் விட்டான்

Tuesday, May 17, 2016

வேறொரு கதை

கதை முடிந்து விட்டதா

நீங்கள் முடித்து விட்டீர்களா

கேட்டார்

அவர் கேள்வியில் தொடங்கிய

வேறொரு கதையை

முடித்த கதையில்

இணைக்கலாமா என

யோசித்துக்கொண்டிருந்தேன்

Saturday, May 14, 2016

எங்களுக்குத் தேவை

யாரோ ஒரு பெரியவர்

என் கைப் பிடித்து

அழைத்துப் போகச் சொல்கிறார்

நடுக்கத்துடன்

வழித் தெரியாமல்

தடுமாறி நிற்கும் நான்

அவரிடம்

இதை எப்படிச் சொல்வது

செய்வதறியாது

அவர் கையைப்

பற்றிக் கொள்கிறேன்

இப்போது

எங்களுக்குத் தேவை

சிறு அன்பு

சின்னப் புன்னகை

கொஞ்சம் உணவு

நிறைய நம்பிக்கை

ஒரு பாதை

Saturday, April 23, 2016

உண்மை மங்கலாகத் தெரிகிறது
பொய் தெளிவாகத் தெரிகிறது
என்றவரும்

உண்மை தெளிவாகத் தெரிகிறது
பொய் மங்கலாகத் தெரிகிறது
என்றவரும்

உண்மை உண்மையாகத் தெரிகிறது
பொய் பொய்யாகத் தெரிகிறது
என்றவரும்

ஒரே அறையில்தான்
இருந்தார்கள்

Monday, April 18, 2016

நந்தினியின் பொய்கள்

நந்தினியிடம்

ஒரு நாளைக்கு

எத்தனை பொய்கள் சொல்வாய்

என்றேன்

கணக்கில் வைத்துக்கொள்வதில்லை என்றாள்

புன்னகைத்தபடி

புன்னகையும் பொய்யா

என்றேன்

உதட்டைச் சுருக்கி

உற்றுப் பார்த்தாள்

Thursday, April 14, 2016

கண்களிலிருக்கும் ஆப்பிள்

கடைக்காரர்
துடைத்து வைத்த ஆப்பிளை
நீண்ட நேரமாகப்
பார்த்த குழந்தை
மெல்லப் போகிறாள்
அவள் கண்களிலிருக்கும் ஆப்பிள்
சுவையாக
நெஞ்சில் இறங்கிக் கொண்டிருக்கிறது

Monday, March 07, 2016

பொம்மையும் குழந்தையும்

குழந்தைக் கேட்ட

பொம்மை வாங்க

காசு இல்லை

பொம்மை மறக்க

வழி நெடுக

கதை சொல்லிக்கொண்டே

வருகிறார் அப்பா

உம் கொட்டுகிறது குழந்தை

கதை முடிந்து

நிம்மதி பெருமூச்சு விட்டு

அப்பா கேட்கிறார்

எப்பிடிம்மா கதை இருந்துது

குழந்தை சொல்கிறது

அப்பா இந்த கதைய

அந்த பொம்மைக்குச் சொல்ல்லாமா

போய் வாங்கிட்டு வரலாமா

Saturday, March 05, 2016

பாக்கியவான்கள்

தாளமிட்டு

வானம் பார்த்து

கை குவித்து

ஆடியபடியே

பெரு மழையில் நனையும்

பைத்தியக்காரன்

தன்னை நிறுத்தி

மூச்சிறைக்க

வேடிக்கைப் பார்ப்பவர்களைப்

பார்த்துச் சொன்னான்

என் கண்ணீரைப் பார்ப்பவர்கள்
பாக்கியவான்கள்

Thursday, February 04, 2016

பூ விற்கும் சிறுமி

ரயிலில்

பூ விற்கும் சிறுமியிடம்

இந்த ரயில் நீளத்திற்கு

பூ தர முடியுமா

எனக் கேட்டேன்

கால்களுக்கிடையில்

கூடையை

ஆடாமல் வைத்துவிட்டு

கைகளை அகல விரித்து

இவ்வளவு நீளமாவா

எனக் கேட்கிறாள்

Tuesday, January 26, 2016

அடுத்த நிகழ்ச்சியில்

தற்கொலைகளுக்கு

வருத்தம் தெரிவித்தார்கள்

இனியாவது

வரும்முன் காப்போம் என்று

விவாதத்தை முடித்தார்கள்

அடுத்த நிகழ்ச்சியில்

தொடங்கியது

ஆடல் பாடல்

Tuesday, December 22, 2015

தெரியவில்லை

வட்டத்தை

ஏன் சதுரம் போல்

வரைகிறீர்கள் என்றவரும்

சதுரத்தை

ஏன் வட்டம் போல்

பார்க்கிறீர்கள் என்றவரும்

வடிவச் சிக்கலில்

இருந்தார்களா

மனச் சிக்கலில்

இருந்தார்களா

என்று தெரியவில்லை

Thursday, December 10, 2015

இந்தக் காத்திருப்பில்

பொறாமை உதிர்ந்தது

வன்மம் உதிர்ந்தது

தேவையில்லாமல்

அதுவாய் சேர்ந்து போன

அத்தனையும் உதிர்ந்தன

நானும் உதிர்ந்தேன்

புதிதானேன்

Wednesday, December 09, 2015

நினைவின் ஆழத்தில்

நினைவின் ஆழத்தில்
இந்தச் சொற்கள்
என்ன செய்யும்

தவம் செய்யும்

Sunday, November 22, 2015

பழுதான கடிகாரம்

அரசு பழுதாகி விட்டதா
அரசு இயந்திரம்
பழுதாகி விட்டதா
கேட்கிறார் ஒருவர்

அது அவர்களுக்குத்
தெரியுமா தெரியாதா
கேட்கிறார் இன்னொருவர்

கேட்டபடியே
நடக்கிறேன் நான்
பழுதான கடிகாரத்தில்
மணி பார்க்க முடியாமல்

Friday, November 06, 2015

உரையாடல்

பேசுவதில் தொடங்கி

மெளனத்தில் முடிகிறது

நல்ல உரையாடல்

என்றார் ஒருவர்

மெளனத்தில் தொடங்கி

பேச்சில் முடிகிறது

சிறந்த உரையாடல்

என்றார் இன்னொருவர்

மெளனத்தில் தொடங்கி

மெளனத்தில் முடிகிறது

அழகான உரையாடல்

என்றார் மற்றொருவர்

Tuesday, November 03, 2015

உங்களை யார் சொல்லச் சொன்னது

லாவகத்துடன்

விசிலடித்தபடி

புன்னகைச் சித்திரமாய்

சைக்கிள் ஓட்டிச் செல்லும் அவரை

நான் ரசித்துக் கொண்டிருக்கும் போது

அந்த முதியவருக்கு

வயது எண்பது என்று

உங்களை யார்

என்னிடம் வந்து

சொல்லச் சொன்னது

Saturday, October 31, 2015

சாத்தானிடம் வாங்கிய கடன்

சாத்தானிடம்
கடன் வாங்கியது
தப்பாய்ப் போயிற்று
கூட்டுத் தொகையை
மாற்றி மாற்றி
இன்னும்
கேட்டுக்கொண்டே இருக்கிறது

Thursday, September 24, 2015

முதலில் மீன் தொட்டி இறந்து போனது

உங்கள் வன்மம்
கேட்டுக்கொண்டதற்கிணங்க
யாருக்கும் தெரியாதது போல்
சமயோஜிதமாக
தள்ளி உடைத்தீர்கள்
முதலில் மீன் தொட்டி
இறந்து போனது
இப்போது மீன்கள்
இறந்து கொண்டிருக்கின்றன

Tuesday, September 01, 2015

கனவில் வந்த வரிகள்

கனவில் வந்த வரிகளில்

பாடல் செய்தேன்

பாடியபடியே

உறங்கி விட்டேன்

விடிந்து எழுந்த பின்

சொற்கள் எதுவும்

நினைவில் இல்லை

இசை வடிவம் மட்டும்

அங்குமிங்குமாய்

கேட்டுக்கொண்டிருந்தது

Saturday, August 29, 2015

கருத்து

நீங்கள் முதலில்
சொன்னக் கருத்தும்
இப்போது
சொன்னக் கருத்தும்
முரண்படுகிறதே
கவனித்தீர்களா

கவலைப்படாதே
அடுத்துச் சொல்லப்போவதில்
அதைச் சரி செய்து விடலாம்

Monday, August 10, 2015

விரிந்து கிடக்கிறது கேள்வி

பறவையை விட்டு

ஏன் பிரிந்தாய்
சிறகிடம் கேட்டேன்
நீந்திப் பழக என
பதில் வந்தது
-------
கால்களின் கீழே
விரிந்து கிடக்கிறது கேள்வி
கடந்து போனால்
கண்டடையலாம்
பதிலையும் என்னையும்
--------
இந்தப் பூச்செடி
தலை அசைத்து
ஏதோ சொல்கிறது
என்ன என்றுதான்
தெரியவில்லை
-----
உன்னைப்
பார்க்க விரும்பவில்லை
உணர விரும்புகிறேன்
----
பிறந்த பூனைக்குட்டி
கண் விழிப்பதைப் போல
என் சொற்கள்
உன்னைப் பார்க்கின்றன
------
ரயில் போய்விட்டது
தண்டவாளத்தில்
ரத்தம் மின்னுகிறது
தூரத்திலிருந்து
ஆடு மேய்க்கும் சிறுமி
சத்தமிட்டபடியே
வேகமாக
ஓடி வந்துகொண்டிருக்கிறாள்
-------
வனமே
உன்னைப் பாட
ஒரு புல்லாங்குழல்
கொடு
போதும்
------
வளைந்து செல்லும்
நீண்ட கோட்டை
வரைந்து
நதி என்கிறாள் குழந்தை
இல்லை என்பது போல் பார்க்க
அதிலிருந்து நீரள்ளி
முகத்தில் தெளிக்கிறாள்
------
கிரீடம்
நசுங்கிப் போய்
துருபிடித்து விட்டது
ஆனாலும்
ராஜ ரோஷம்
குறையவில்லை
-------
கம்பியை
கிளையாக்கியது
அமர்ந்து போன பறவை
------
நான் ஓய்வெடுக்க விரும்பும்
நாற்காலியை
உங்களை யார்
இப்போதே
செய்யச் சொன்னது

-குங்குமம் இதழில் (10.8.2015) வெளியானது-

Sunday, July 19, 2015

எனது பிரார்த்தனை

கதை படிக்கும் முதியவரை
வரைந்து காட்டுகிறாள் குழந்தை
எனது பிரார்த்தனை எல்லாம்
அவர் இறந்து போவதற்குள்
அந்தப் புத்தகத்தை
படித்து விட வேண்டும்
என்பதுதான்

அம்மணமாக ஓடுகிறான்

அம்மணமாக ஓடுகிறான்
பைத்தியக்காரன் என்றவர்கள்
வேடிக்கைப் பார்த்தார்கள்
அம்மணமாக ஓடுகிறான்
மனிதன் என்றவர்
ஆடை கொடுக்க
ஓடிக்கொண்டிருந்தார்

Wednesday, July 15, 2015

அருகில்...

அருகில் போய்
விலக்கி இருக்கலாம்
காப்பாற்றி இருக்கலாம்
ஏதேனும் செய்திருக்கலாம்
வன்மம் மோதி
மனிதம் சாய்ந்தது
என்ற வரியுடன்
தன் கடமையை
முடித்துக் கொண்டார்

Tuesday, July 14, 2015

தற்கொலைக் கவிதை

தண்டவாளத்தில்

தலை வைத்து

அவன் தற்கொலைக் கவிதையை

யோசித்துக்கொண்டிருந்தான்

Sunday, May 31, 2015

வியூகங்கள்

பாதைகளை
மாற்றி வைக்கிறீர்கள்
வியூகங்களால்
வந்தடைகிறேன்

Saturday, May 16, 2015

ரயில்

ரயில்
ஓட்டுபவரின் கண்களால் பார்க்கிறது
என்றாள் குழந்தை
அப்போது ரயில்
ஒரு பாலத்தின் மீது
போய்க் கொண்டிருந்தது
அதை நான்
குழந்தையின் கண்களால்
பார்த்துக் கொண்டிருந்தேன்

Monday, April 27, 2015

என்னைப் பார்த்து

என்னைப் பார்த்து
கருணையோடு
புன்னகைக்கும் பெண்ணுக்கு
பார்வை இல்லை என்று
நீங்கள் சொல்வதை
என்னால் ஒப்புக்கொள்ள முடியாது

Tuesday, April 21, 2015

எப்படி கிடைத்தாய்?

ஒரு முறை
தான் தொலைந்து போனதை
சொன்னாள் சிறுமி மன்யா

எப்படி கிடைத்தாய்?
கேட்டேன்

நானே கண்டுபிடித்து
வந்து விட்டேன்
என்று சொன்னாள்
ஆச்சரியமாக

Wednesday, April 15, 2015

நள்ளிரவில்

நள்ளிரவில்
பீடி புகைத்தபடி
போஸ்டர் ஒட்டியவரிடம்
கேட்டேன்
படம் நல்லா இருக்குமா
பசையை பிசைந்தபடி சொன்னார்
படம் ஓடனா
அவுங்களுக்கு நல்லா இருக்கும்
வாழ்க்கை ஓடன
நமக்கு நல்லா இருக்கும்

Tuesday, April 14, 2015

உணராமல் போனோம்

பேசத்தான் வந்தோம்
பேசினோம்
பிரிந்துப் போனோம்
மீதி இருக்கும்
இந்தச் சொற்களில்தான்
உண்மையான உரையாடல்
இருந்தது என்பதை
ஒருவரும்
உணராமல் போனோம்

Friday, April 03, 2015

மூன்று பொம்மைகள்

மிகப்பெரிய பொம்மையை
கேட்கிறாள் குழந்தை
மிகச்சிறிய பொம்மையை
எடுக்கிறார் அப்பா
இரண்டுக்கும் நடுவில்
இருக்கும் பொம்மையை
பார்க்கிறாள் அம்மா

Thursday, March 26, 2015

வண்ணங்கள் களைப்படையும் போது

வரைந்து முடித்து

விழித்திருக்கும் சிங்கம்

என்று பெயர் வைத்தாள் மான்யா

உன் சிங்கம்

எப்போது உறங்கும்

கேட்டேன்

உடனே சொன்னாள்

வண்ணங்கள்

களைப்படையும் போது

Sunday, March 22, 2015

சுவர்

நீ ஒரு

கல் வைத்தாய்

நான் ஒரு

கல் வைத்தேன்

நமக்கிடையே

ஒரு சுவரை

உருவாக்கிக் கொண்டோம்

Wednesday, March 18, 2015

இருந்தது

என் ஸ்வெட்டரைப் பார்த்த
பெரியவரின் கண்களில்
நடுக்கம் இருந்தது

நடந்தேன்

இப்போது என்னிடம்
நடுக்கம் இருந்தது

பெரியவரிடம்
ஸ்வெட்டர் இருந்தது

Tuesday, March 10, 2015

கதாபாத்திரங்கள்

மது அருந்திக்கொண்டிருந்தனர்

கதாபாத்திரங்கள்

எனக்குக் கொஞ்சம்

கிடைக்குமா

கேட்டேன்

எழுத்தின் போதை

போதும் உனக்கு

எனச் சொல்லி

கதவடைத்துக் கொண்டனர்

Saturday, March 07, 2015

கூடு

கூடு விட்டு
கூடு பாயும்
ஒருவரை சந்தித்தேன்
இப்போது
எந்த கூடு என்றேன்
இதற்கு பதில்
சொல்வதற்குள்
மாறி இருக்கலாம்
கேள்வியைத்
தவிர்த்து விடலாமே என்றார்

Thursday, March 05, 2015

பூங்கொத்து

பூங்கொத்து வாங்கிக்கொண்டு புறப்பட்டேன்
வழியில் குழந்தை வாங்கிக்கொண்டது
வெறும் கையுடன் உன்னைச் சந்தித்து
விஷயத்தைச் சொன்னேன்
குழந்தை போலச் சிரித்தாய்
அப்போது
நான் தந்தப் பூங்கொத்தை
அந்தக் குழந்தை
உன் கையில்
தந்து கொண்டிருந்தது

Wednesday, March 04, 2015

பிரியமும் விஷமும்

வேறு வழியின்றி

உன்னைக் கொல்ல

வந்திருக்கிறேன்

தேநீர் தருகிறாய்

உன் கண்களைப் பார்த்தபடி

அருந்துகிறேன்

உன்னைப் காப்பாற்ற

நீ தந்த

பிரியமும் விஷமும் கலந்த

இந்த தேநீரை

நான் அருந்திதான் ஆகவேண்டும்

Thursday, February 19, 2015

பிரபஞ்சத்திலிருந்து

பூ வரைந்தாள் மான்யா

வாசம்

வண்ணத்திலிருந்து வருகிறதா

ஓவியத்திலிருந்து வருகிறதா

கேட்டேன்

பிரபஞ்சத்திலிருந்து

பதில் சொன்னாள்

Friday, February 13, 2015

வழியில்

வரும் வழியில்
முடிவை
மாற்றிக் கொண்டிருந்தால்
வாழ வழி இருந்திருக்கும்
விழும் வழியில்
அது தோன்றியதால்
முடியாமல் போயிற்று

Tuesday, February 10, 2015

பார்த்துக் கொண்டிருக்கிறேன்

நம்மிருவருக்கும்

ஒரே பெயர்

என் பெயரில்

ஈக்கள் மொய்க்கின்றன

விரட்டி விடுகிறீர்கள்

உங்கள் பெயரில்

பட்டாம்பூச்சி அமர்ந்திருக்கிறது

பார்த்துக் கொண்டிருக்கிறேன்

Monday, February 09, 2015

அழைத்து வருகிறேன்

கிளை போல்

கிழித்தக் கோட்டில்

ஒரு பறவை வந்தமர்ந்த்து

கண் துளிர்க்கப்

பார்த்துக்கொண்டிருந்தேன்

மரம் வரை

மற்ற நண்பர்களை

அழைத்து வருகிறேன் என்று

சொல்லிவிட்டுப் போனது

Monday, February 02, 2015

பயணித்தல்

பயணிப்பது

சுகமானதாக இருக்கிறது

என்ற வரி

என்னிடமிருந்தது

நின்றுகொண்டே பயணிப்பது

கடுமையானதாக இருக்கிறது

என்ற வரி

அவரிடமிருந்தது

ஒரு சீட் காலியாக

அவரை அமரச் சொன்னேன்

இப்போது

என் வரிக்கு

அவர் மாறக்கூடும்

Tuesday, January 27, 2015

சாலை ஓவியக்காரன்

நேரங்களும்

வண்ணமாய் கரைய

சாலை ஓவியக்காரன்

வரைந்து முடித்தான்

அவன் முடித்த கணம்

மழை பெய்தது

எல்லோரும் ஓடிப்போய்

ஒதுங்கி நின்றார்கள்

ஓவியத்தை

எடுத்துச் செல்ல முடியாமல்

நனைந்தபடியே

அவன் பார்த்துக் கொண்டிருந்தான்

Thursday, January 15, 2015

சந்திக்கும் புள்ளியில்

அறியாமையும் அறிவும்

சந்திக்கும் புள்ளியில்

நீங்கள் என்னையும் சந்திக்கலாம்

உங்களையும் சந்திக்கலாம்

ஒற்றைச் செருப்பு

ஒற்றைச் செருப்பை
கையில் மாட்டியபடி
சிரித்துப் போகும் அவனை
பைத்தியக்காரன் என்றார்கள்
நான் இன்னொரு செருப்பைத்
தேடிப்போகும்
மனிதன் என்றேன்

Tuesday, January 13, 2015

மலைப் பிரசங்கம்

உன் மலைப் பிரசங்கம் கேட்க

ஓடி வரும் நான்

மந்தையிலிருந்து

பிரிந்த ஆடு

மேஜையின் மேல்

நீ வைத்துவிட்டுப் போன

கண்ணீர்த்துளி

இன்னும் காயாமல்

என் பதிலுக்காக

காத்திருக்கிறது

என் கையிலிருந்த

சுடரை

அணைத்து விட்டீர்கள்

என்னை அணைக்கப்

போராடுகிறீர்கள்

ஆண்டாண்டு காலமாய்

முரசை அறைகிறீர்கள்

ஆனாலும் உங்களுக்கு

சத்தம் எழுப்பத் தெரியவில்லை

நீங்கள் திருத்திய கதை

நான் யோசித்த

கதை அல்ல

வரிசையில்

காத்திருக்கிறேன்

வரிசையும்

காத்திருக்கிறது

Tuesday, January 06, 2015

மூன்று கவிதைகள்

1-
முடிந்த மழை

தூறலில்

முகம் காட்டும்

நகர்ந்து நகர்ந்து

ஓவியமாகப் பார்க்கிறது புகை

ஓவியமாகப் பார்க்கிறேன் நான்

இருளில்

என்னைக் கண்டெடுத்தேன்

வெளிச்சத்தில்

தொலைத்து விட்டேன்

Monday, January 05, 2015

அழைத்துப் போகிறேன்

சொற்கள் உன்னை

அழைத்துப் போகிறதா

வாக்கியங்கள் உன்னை

அழைத்துப் போகிறதா

எதுவுமில்லை

நான்தான் என்னை

அழைத்துப் போகிறேன்

Sunday, January 04, 2015

உறங்கும் வட்டம்

உடல் குவித்து
மையத்தில்
உறங்கிக் கொண்டிருந்தது வட்டம்
மறுபடி வந்து
பார்த்துக் கொள்ளலாம் என்று
எழுப்பாமல் வந்து விட்டேன்

Thursday, January 01, 2015

நிசப்த தவம்

சொற்களை கற்பூரமாக்கி

நாவின் மேல் வைத்து

ஏற்றுகிறேன்

அசைந்து முடிகிறது

சுடர்

இனி நான்

போகலாம்

சரியாக கேட்கவில்லை

நன்றாக காற்று வரும்படி
மின்விசிறி உள்ள அறை
வேண்டும் என்று
அவன் சொன்னதை
அவர்கள் அப்போது
சரியாக கேட்கவில்லை
காலையில்தான்
புரிந்து கொண்டார்கள்

Monday, December 29, 2014

எனக்கும்

இறந்து போன

தாயின் மடியிலேயே

நீணட நேரமாக

அழுது கொண்டிருக்கிறது குழந்தை

யாராவது போய்

குழந்தையைத் தூக்குங்கள்

அப்படியே வந்து

எழுதிய எனக்கும்

ஆறுதல் சொல்லுங்கள்

Thursday, December 25, 2014

ஒற்றை வரி

எழுதிய ஒற்றை வரியை

ஊதி

நூலாக்கி விட்டேன்

இந்த முனையை

நான் பிடித்துக் கொண்டிருக்கிறேன்

எதிர் முனை

வானத்தைப் பிடித்துக் கொண்டிருக்கிறது

Wednesday, December 24, 2014

ஏழு நிமிடங்கள்

அந்தக் கயிறுடன்

அவன் பேசிக் கொண்டிருந்தான்

எட்டு

ஒன்பது

பத்து

இந்த நிமிடத்தில்

அந்தக் கயிறு பற்றிய தகவலை

உங்களுக்குச் சொல்ல வேண்டியது

அவசியமாகிறது

அது

தற்கொலைக் கயிறு

Sunday, December 21, 2014

பழைய நண்பர்

பார்க்காமல் போகிறார்
பழைய நண்பர்
அவர் கால்களில் இருப்பது
தவிர்க்க நினைத்த வேகமா
எதையோ தேடிய ஓட்டமா
தெரியவில்லை
நின்றிருக்கிறேன்
நினைவின் வடுவைத்
தடவியபடி

Saturday, December 20, 2014

அவருடன்

கைத்தட்டிக் கூப்பிட்டவர்
அவரை என்றார்
உங்கள் கைத்தட்டலில்
என் பெயர் இருந்ததால்
திரும்பி விட்டேன் என்றேன்
சிரித்தபடி கடந்து போனார்
அவருடன்

குரூரத்தின் குருதி

நீங்கள் சுட்டப் பறவை

என் கையில்

விழுந்திருக்கிறது

வழிகிறது

பறவையின் குருதி

என்று என்னால் எளிதாக

சொல்ல முடியவில்லை

உங்கள் குரூரத்தின் குருதி

என்று சொல்லாமல்

இருக்கவும் முடியவில்லை

Tuesday, December 16, 2014

எப்போதும் போல்

துயரம் போல்

பெய்கிறது மழை

என்றவரும்

சந்தோஷம் போல்

பெய்கிறது மழை

என்றவரும்

எதிரெதிர் மாடியிலிருந்து

பார்த்துக் கொண்டிருந்தார்கள்

எப்போதும் போல்
பெய்து கொண்டிருந்தது மழை

Saturday, December 13, 2014

உங்களால் முடியுமா

கைகோர்த்து வந்தவன்

உன் கழுத்தை

நெரிக்கப் போகிறேன் என்றான்

உங்களால் முடியுமா

என்றேன்

என் பிரேதத்தைத் தாண்டி

இன்னொருவன் கைகோர்த்தபடி

போய்க்கொண்டிருந்தான்

Thursday, December 11, 2014

குழந்தைச் சொன்னக் கதை

அப்பா சொன்னக் கதையில்
பாகன் யானையுடன்
நகரில் திரிந்து கொண்டிருந்தான்
குழந்தைச் சொன்னக் கதையில்
பாகன் டீ குடித்துக் கொண்டிருந்தான்
யானைக் காட்டிற்குப் போய் விட்டது

Wednesday, November 26, 2014

வனம்

தன் வனத்திற்கு

வரச் சொல்கிறது

வரைந்த பட்டாம்பூச்சி

தன் அறைக்கு

வரச் சொல்கிறாள்

வரைந்த குழந்தை

Sunday, November 23, 2014

தண்டவாளம் பக்கத்தில்

அவளே கேள்விக் கேட்டு
அவளே பதிலும் சொன்னாள்

பட்டாம்பூச்சியின் மேல்
ரயில் மோதினால்
என்னாகும்

உயிர் பறந்துப் போகும்

மறுநாள் காலை
தண்டவாளம் பக்கத்தில்
அவள் சடலம் கிடந்தது

அவளைச் சுற்றி
பறந்துக் கொண்டிருந்தன
பட்டாம்பூச்சிகள்

Saturday, November 15, 2014

குட்டிப் பூனை

உன்னைப் பார்க்க வந்துது

நீ சத்தம் போட்டதால்

ஓடிப் போனது

கீழ்வீட்டுக் குழந்தையிடம்

விளையாட்டாகச் சொன்னேன்

பூனைக்காகக் காத்திருக்கிறாள்

அமைதியாக

Thursday, November 13, 2014

ஒளி வட்டம்

தலைக்குப் பின்னால்
அடிக்கடித் திரும்பிப்
பார்த்துக் கொண்டார்
அவருக்குத் தெரிந்த
ஒளி வட்டம்
மற்றவர்களுக்குத் தெரியவில்லை

Wednesday, November 12, 2014

சொல்/வாக்கியம்

நிற்கும் போது நான்

சொல்

சொல்லிப் பாருங்கள்

நடக்கும் போது நான்

வாக்கியம்

படித்துப் பாருங்கள்

மறந்துப் போய் விட்டது

காத்திருப்பது மட்டுமே
மனதில் உள்ளது
எதற்கு
காத்திருக்கிறேன் என்பது
மறந்துப் போய் விட்டது

கதையில் எரிந்த மெழுகுவத்தி

கதையில் எரிந்த

மெழுகுவத்தியை

ஊதி அணைத்தேன்

வார்த்தைகளில் வழிந்து

பக்கங்களைப்

படிக்க முடியாமல்

செய்து விட்டது

Thursday, November 06, 2014

காயத்தின் நிழலில்

வலி இளைப்பாறும்

என்று எழுதிய வரியை

மருந்தாக்கப் பார்க்கிறேன்

ஆனாலும்

வலிக்கவே செய்கிறது

பைத்தியக்காரனின் பிரியம்

மழையில்
ஒரு தேநீர் கேட்டு
என்னைத் தொட்டு
முத்தமிட்ட
பைத்தியக்காரனின் பிரியம்
நெகிழச் செய்தது
ஆனாலும்
எல்லோரும் அவனை
விரட்டிய போது
பேசாமல்
வேடிக்கைப் பார்த்துக் கொண்டிருந்தேன்

Saturday, November 01, 2014

யாரேனும் சொல்லுங்கள்

தற்கொலைக்கு ஓடுபவனை
எதற்குக் கொலை செய்ய
ஓடுகிறீர்கள்
என்ற வரியில் இருப்பவன்
என்ன ஆவான்
யாரேனும் சொல்லுங்கள்

Thursday, October 30, 2014

நான் பார்க்க வந்தவர்

தாமதமாகவே கிளம்பினேன்
நேரே
இடுகாடு வந்துவிட்டேன்
அங்கும் தாமதமாகிவிட்டது
மின் தகனச் சடங்கு
முடிந்திருந்தது
எல்லோரும் போயிருந்தார்கள்
தனியாய்
ஒற்றை ஆளாய்
நின்றிருந்தேன்
சார் யாரப் பாக்கணும்
நான் பார்க்க வந்தவர்
போய் விட்டார்
சொல்லிவிட்டு நடந்தேன்

Wednesday, October 29, 2014

நாங்கள் எங்களுடன்

நான் தனிமையுடன்
பேசினேன்

தனிமை இரவுடன்
பேசியது

இரவு என்னுடன்
பேசியது

நாங்கள் எங்களுடன்
பேசினோம்

Monday, October 20, 2014

சாலை

கலைந்து கிடக்கிறது சாலை

எவ்வழிப் போவது

என்ற வரியை

அழிக்கிறேன்

Friday, October 10, 2014

மழை நாளில்

கவிதை எழுதுவாள் கௌரி

ஒரு மழை நாளில்

அவளுக்குக் குழந்தைப் பிறந்தது

கண்களில் நீர்த் துள்ள

இப்படி எழுதினாள்

மழை நாளில்

மழையைப் பெற்றெடுத்தேன்

(கௌரிக்கு)

Wednesday, October 08, 2014

உளி

என்னை உளியாக்கி

தன் கையில் எடுத்து

கனவை உடைக்கப்

பார்க்கிறது இரவு

கனவு உளியைக் கைப்பற்ற

எதுவுமற்று

விழிக்கிறது இரவு

புரண்டு படுக்கிறேன்

இன்னொரு கனவுடன்

Friday, October 03, 2014

அனுபவ சித்தனின் குறிப்புகள்

1111-

வாசிக்காத புல்லாங்குழல்

வனத்தில் எறிந்த போது

இசைத்தபடியே விழுந்தது

1112-

நீண்ட நேரமாக

நடந்து கொண்டிருக்கிறேன்

எங்கு போக வேண்டும் என்று

மறந்து போய் விட்டது

1113-

ஆறுதல் பரிசை

ஆகாயம் போல்

வாங்கிக் கொள்கிறீர்கள்

அந்த நேரத்தில்

இறந்து போகிறது

உங்கள் சிறகு

கண்ணீருக்கும் பசிக்கும்

கண்ணீருக்கும் பசிக்கும்
இந்த இரண்டு
சொற்களுக்குள்
கவிதை இருக்கிறதா
தெரியாது
சொன்னவள் இருக்கிறாள்

Wednesday, October 01, 2014

வரும் சத்தம்

நெருங்கி வர

ரயிலில்

பயணம் செய்வதாக

நினைத்தபடியே அவன்

தண்டவாளங்களுக்கிடையில்

நடந்து கொண்டிருந்தான்

சிறகைத் தருவாயா

உன் சிறகைத் தருவாயா
நான் அணிந்துப் பறக்க
வானம் கேட்டது
இல்லை
வானம் கேட்பது போல்
பறவை நினைத்தது
மழைத்துளி அதன்
நினைவின்
மேல் விழ
வேகம் கொண்டு போனது