Saturday, January 28, 2012

அனுபவ சித்தனின் குறிப்புகள்

834-

உன்னால் பாயமுடியாது
வேகமாக பாய்ந்தேன்
குரல் நின்று போனது

835-


காட்சிக்கும் பார்வைக்கும்
இடையில்
உதிரிகளாக
தென்படாதவைகளும்

836-

உப்புகரிக்காத
கண்ணீர்துளி என்று
ஒன்றும் இல்லை

837-

ஏதோ குறைகிறது என்று
எழுத்து ஏற்படுத்தும் சமிக்ஞை
படைப்பின் பூரணத்துவத்தை
பரிசோதிக்கச் செய்கிறது

838-

கொஞ்சம் ஓய்வு தேவை
என்ற வரி
நிறைய வேலை தேவை
என்ற வரியிடம்
சரணடைந்து விடுகிறது

Thursday, January 26, 2012

இரவின் கிளையில்

இரவின் கிளையில்
கனவொன்றைப் பறித்து
இறங்கினேன்
ருசிப்பதற்குள்
விடிந்து போயிருந்தது

ஆனாலும்

என் நிழலைக் கத்தரித்து
இன்னொரு நானாக்கினேன்
ஆனாலும் நீண்டிருந்தது
மற்றொரு நிழல்

Tuesday, January 24, 2012

நீ வீட்டுக்குப் போ

நீ வீட்டுக்குப் போ
என்று சொல்லிவிட்டு
அப்பா நீரில் குதித்து
தற்கொலை செய்துகொண்டதாக
அவன் சொன்னான்

அதன் பிறகுதான்
நீச்சல் கற்றுக்கொண்டதாகவும்
சொன்னான்

நதியில்
தொலைந்துபோன அப்பாவை
ஒரு நாள் கண்டுபிடித்துவிடுவேன்
என்றும் சொன்னான்

வரைந்த கத்தி

தலைக்கு மேல்
வரைந்த கத்தி
தொங்கிக்கொண்டிருந்தது
எந்த நேரத்திலும் விழுந்து
பதம் பார்த்துவிடலாம்
கத்தியிடமிருந்து தப்பிக்க
என்னை ஓவியமாக
மாற்றியாக வேண்டும்

Sunday, January 22, 2012

கடினமான இரவு

கடினமான இரவை
தனிமையால்
செதுக்குகிறேன்
விடிவதற்குள்
எனக்கொரு
சிற்பம் கிடைத்துவிடும்

உறைந்த காலம்

மேஜையின் மேல்
நீண்ட காலமாக
எழுதிய கவிதை

பார்க்கும்போதெல்லாம்
தோன்றுகிறது
காலம்
உறைந்துகிடப்பதைப் போல

தத்துவம்

தத்துவத்தின் மேல்
அமர்ந்திருந்தேன்
தத்துவம்
தள்ளிவிட
தத்துவத்தின் மேல்
விழுந்தேன்

Saturday, January 21, 2012

அனுபவ சித்தனின் குறிப்புகள்

830-

புன்னகை
பூங்கொத்தைப் போல
யாருக்கும் தரலாம்

831-

என்னிடம் எதுவுமில்லை
உள்ளங்கையில்
வந்து விழும்
மழைத்துளிகளைத் தவிர

832-

தொலைவிலிருந்து
வருகிறேன் என்றான்
அவன் கண்களில்
நீண்டிருந்த தூரத்தை
வரியில் உணர முடிந்தது

833-

வனத்திற்குச்
சென்றபோது
நானொரு மூங்கில்
திரும்ப
புல்லாங்குழல்

சாலையில்

வழிப்போக்கனைப் போல
இந்த சாலையில்
நுழைந்தேன்
அது என்னை
விருந்தினரைப் போல
வரவேற்றது

ஒளி

கண் சிமிட்டியது
நட்சத்திரம்
நம்பிக்கையில்
பரவியது
ஒளி

Friday, January 20, 2012

அனுபவ சித்தனின் குறிப்புகள்

826-

தனிமை
நிரம்பித் ததும்பும்
இந்த அறையில்
தனிமைக்குத்
துணையாய் நான்

827-

என் கால்களின் செவி
அறியும் ஒற்றைச் சொல்
செல்

828-

என்னைப்
பூட்டிவைத்துப் போகிறாய்
உனக்குத் தெரியாது
நான் புகைபோல கசிந்து
வெளியேறிவிடுவேன் என்று

829-

மெளனம் படர்ந்து
மெளனம் படர்ந்து
மெளனம் நாவாய் ஆனது

வார்த்தை மறந்து
வார்த்தை அழிந்து
மொழியே முடிந்து போனது

திசை மேய்ந்து

நான் தொலைந்த ஆடு
மந்தையைத்
தொலைத்த ஆடு
ஒற்றை ஆடு
தன் திசை மேய்ந்து
தன் வழிப்போகும்
தனி ஆடு

Monday, January 16, 2012

முழுதும்

முழுதும்
எழுதியப் பிறகும்
இந்த பக்கத்தை
வெள்ளை காகிதமாகப்
பார்க்க முடிகிறது
என்னால்

அனுபவ சித்தனின் குறிப்புகள்

817-

அந்தரத்தில்
மிதக்கிறது
என் முகவரி

818-

என் பிரார்த்தனைகள்
முடிந்து போயின
இனி நான்
கடவுளை சந்திக்க
நாளாகும்

819-

ஒருவரை ஒருவர்
தள்ளிவிடாமல்
பேசிக்கொண்டோம்
ஆனாலும்
எத்தனையோ முறை
விழுந்து போனோம்

820-

எதுவுமில்லை
அன்பை பரிமாறிப்
பசியடைக்கப்
பார்க்கிறோம்

821-

நினைவின் பாதையில்
நீண்ட தூரம்
நினைவுகளற்று

822-

உறங்கச் சொல்கிறேன்
கண்களிடம்
விழிக்கச் சொல்கிறேன்
இமைகளிடம்

823-

சொல்
திறக்கும் காற்று
இசை எடுத்துப் போகும்

824-

குடித்துக் கொள்ள
வைத்திருந்த தண்ணீர்
அந்த வேளை
உணவானது

825-

அன்பின் நெகிழ்வில்
உயிர்த்திருக்கிறது
வாழ்வின் ருசி

Sunday, January 15, 2012

ஆசிர்வாதம்

என் குடை
நனையும் ஒரு ஏழைக்கு
பயன்படும் எனில்
அதை தந்துவிட்டுச்
செல்லும்போது
அந்த மழையே
என்னை ஆசிர்வதிக்கும்

எளிமையான கவிதை

இது தண்ணீரைப் போன்று
எளிமையான கவிதை
தாகம் தீர்க்குமா
என்று தெரியாது

மழையில்

மழையில்
நனைந்து வந்திருக்கிறீர்களே என்று
நீங்கள் சொன்னபோதுதான்
எனக்குத் தெரிந்தது
நான் மழையை
அழைத்து வந்திருப்பது

Saturday, January 14, 2012

அனுபவ சித்தனின் குறிப்புகள்

811-

நான் தயாரித்த
கண்ணாடி எனினும்
இருப்பதுபோல்தான்
என்னையும் காட்டும்

812-

நகர்த்த நகர்த்த
நகர்வது
வேகமாகும்

813-

நடிக்கத் தெரியாத
வார்த்தைகள்
வரும்
ஒத்திகையின்றி

814-

நடந்த கதை
நடக்கும் கதை
நடக்கப்போகும் கதை
மூன்றிலும்
காலம் எப்போதும்
கதாபாத்திரமாய்

815-

கண்ணீர் துளி
அருகில் செவி
உற்றுக் கேட்க
கடலின் ஒலி

816-

நான்
இருக்கிறேன்

கடைசிப் பக்கத்தில்

இந்தக் கதையின்
கடைசிப் பக்கத்தில்
நான் இறந்துபோகப் போகிறேன்

அதற்கு முன் பக்கத்திலேயே
நீங்கள் போய்விடுவீர்கள் எனில்
உங்களோடு நானும்
உயிரோடு வந்துவிடலாம்

கடைசிப் பக்கத்தைத் தாண்டி
போவீர்கள் எனில்
என் சவப்பெட்டியின் மேல்
உங்கள் காலடித்தடங்கள்
பதிந்து போயிருக்கலாம்

Monday, January 09, 2012

அனுபவ சித்தனின் குறிப்புகள்

808-

இந்த வனத்தின்
சிறு புல் நான்
நீங்கள் தேடி
கண்டெடுப்பது கடினம்

809-

நான் வழிப்போக்கன்
என்னிடம்
வேறெதும் இல்லை
வழிகளின்
குறிப்புகளைத் தவிர

810-

உங்கள் அரிசியில்
யார் பசியாவது
எழுதப்பட்டுள்ளதா என்று
பார்த்துவிட்டு
உண்ணத் தொடங்குங்கள்

Sunday, January 08, 2012

அனுபவ சித்தனின் குறிப்புகள்

805-

மொழி கடந்த ஞானி
எழுதுகிறான்
வரியற்ற கவிதையை

806-

நான் திறக்க
நான் திறக்கும்

807-

கரையிலேயே
எல்லா நீச்சலும்
முடிகிறது
நதி பார்த்து
சிரிக்கிறது

Friday, January 06, 2012

ஒவ்வொரு முறையும்

பிய்த்தெறிகிறாய்
ஒவ்வொரு முறையும்
சேர்த்து வைக்கிறேன்
ஒவ்வொரு வலியும்

Thursday, January 05, 2012

வழியே

மணலைப் போல
உன் விரல்கள் வழியே
நான் வழிந்து போகிறேன்

மலையைப் போல
என் நினைவுகள் வழியே
நீ வளர்ந்து போகிறாய்

நினைவுப் பொருள்

பழுதடைந்துவிட்ட
கடிகாரத்தைப் போல
பழுதடைந்த
இந்த வரியை
வைத்துக்கொண்டு
ஒன்றும் செய்ய முடியாது
ஆனாலும்
ஒரு நினைவுப் பொருளாக
வைத்துக்கொள்ள
விரும்புகிறேன்

இதோடு

வேறெதுவும் பதிலில்லை
என்னிடம்
உன்னிடம் சொல்ல

வேறெதுவும் கேள்வியில்லை
உன்னிடம்
என்னிடம் சொல்ல

ஆனாலும்
நம் உரையாடல்
இதோடு முடிந்து போக வேண்டுமா

Wednesday, January 04, 2012

இருந்தும்

நான் உனக்கு
எதுவும்
தரப்போவதில்லை
இருந்தும்
காத்திருக்கிறாய்
நான் உனக்கு
ஏதோ
தரப்போவதைப் போல

மன்னிப்பு

கண்ணீரிடம்
மன்னிப்பு கேட்க வேண்டும்
நான் செய்த
தவறுக்காக

வராமல்
என்னைத் தண்டித்துக்கொண்டே
இருக்கிறது

Monday, January 02, 2012

ஒத்த புன்னகை

உன்னிடம் தர
ஒன்றுமில்லை என்கிறேன்

நீ அந்த வாக்கியத்தை
கண்கள் மலர
வாங்கிக் கொள்கிறாய்

நான் நிறைய
தந்தது போலிருக்கிறது

நீ நிறைய
பெற்றுக்கொண்டது போலிருக்கிறது

நம் ஒத்த புன்னகையில்
இந்தப் பொருள்
வராமல் இல்லை

ஒரு மழைச் சொட்டில்

ஒரு மழைச் சொட்டில்
உயிர் சிலிர்க்கிறது
உள்ளிருக்கும் சிலை

ஒன்றும் நிகழாதது
போலிருக்கிறது பாறை

இறங்கும் வழியில்

கனவிலிருந்து
இறங்கும் வழியில்
ஒரு ரோஜா பூத்திருந்தது
அது உதிரவும் இல்லை
நான் அங்கிருந்து
நகரவும் இல்லை

Sunday, January 01, 2012

பார்த்தல்

நான் தனியாக
வந்திருக்கிறேன்
நீங்கள்தான் என் பின்னால்
ஒரு கூட்டம் இருப்பதுபோல
பயத்துடன் பார்க்கிறீர்கள்

நீங்கள் கூட்டத்தோடு
வந்திருக்கிறீர்கள்
நான்தான் நீங்கள்
தனியாக வந்திருப்பதுபோல
பயமற்றுப் பார்க்கிறேன்

தவறுதலாக

தவறுதலாக
சைத்தான் கையில்
கொடுத்துவிட்டேன்
போய் சேர வேண்டிய
கடிதத்தை

புரியவில்லை என்று
கிழித்துப்போட்டு விட்டது

அனுபவ சித்தனின் குறிப்புகள்

796-

ஆழம் காண
ஆழம் போனேன்
ஆழம் கண்டு
ஆழமானேன்

797-

என் நான்களை
முகர்ந்து பார்த்துவிட்டு
தின்னாமல் போகின்றன
பன்றிகள்

798-

ஏதோ
இருப்பதால்
ஏதோ இருக்கிறேன்

799-

நீள அகலங்களை
கணக்கிட்டுக்கொண்டிருக்கிறீர்கள்
வார்த்தைகளின் ஆழத்தில்
கவிதை

800-

பயணத்தைக்
கலைத்துப் போட்டது யார்
பல நூறு வழிகளில்
என் காலடித் தடங்கள்

801-

அறுபடவில்லை
விடுபட்டுப் போயிருக்கிறது
அவ்வளவுதான்

802-

விட்டுவிடுங்கள்
இறந்துகொண்டிருக்கும் என்னை
உங்கள் மருந்தால் மேலும்
சாகடிக்க வேண்டாம்

803-

விடிந்துகொண்டிருக்கிறது
அதற்குள் தூங்கி
எழுந்துவிட வேண்டும்

804-

எப்படி இப்படிப்
பேசுகிறீர்கள்

பல
நாக்குகளால்தான்

அவர்

புரியவில்லை
என்றார்

புரிந்துகொள்ள
முயற்சித்தீர்களா என்றேன்

புரியாதது போல்
பார்த்தார்

திறத்தல்

நினைவைத்
திறக்கும்போதெல்லாம்
நீயே வந்து
வரவேற்கிறாய்

இது போதும்

இது போதும் எனக்கு
சிறு வாக்கியம் நகர்த்தும்
பெருவாழ்வை

கனவுக்காரன்

ஒரு போதும் கனவற்று
தூங்கியதே இல்லை
நான் பெருங்கனவுக்காரன்

நிற்கிறேன்

மூடி இருக்கும்
மதுபானக் கடைமுன்
நிற்கிறேன்

என் நேற்றைய போதை
கதவைத் தட்டிக்கொண்டிருக்கிறது

எப்படியும்

எப்படியும்
கண்ணீர் வரத்தான்
போகிறது
அதற்கு முன்
இந்த சிறுபுன்னகை

மழை

வரிகளுக்குள் வானத்தை
இழுத்து வரப்பார்த்தேன்
கவிதையை
அழித்துச் சென்றது மழை