Wednesday, November 28, 2018

முடியாதவள் கதை

ரயில் போகும்போதெல்லாம்
ஆடு மேய்க்கும் பெண்
தன் கண்களைப் பிடுங்கி
ரயிலுக்குள் எறிகிறாள்
அது ஊர்சுற்றிப் பார்த்துவிட்டு
அவளிடம் திரும்புகிறது

Friday, November 09, 2018

பிளாட்பாரப் பாட்டி


நெடுநாள் பார்க்கும்
பிளாட்பாரப் பாட்டியிடம்
ஒரு நாள் கேட்டேன்
ஏதாவது ஒரு ரயிலில் ஏறி
ஏதாவது ஒரு இடத்திற்குப் போய்
இறங்கி இருக்கலாமே
கண்கள் துடைத்து
சிரித்தபடிச் சொன்னாள்
அப்படித்தான் தம்பி
இங்க வந்து சேர்ந்தேன்

Monday, November 05, 2018

காத்திருப்பில்

இந்தக் காத்திருப்பில்
நீங்கள் தேர்ச்சி பெற்றுவிட்டீர்கள்
மேலும்
காத்திருக்க
அனுமதிக்கப்படுகிறீர்கள்

     

Saturday, November 03, 2018

ரொட்டி

குழந்தை
ரொட்டி வரைந்தபின்
எல்லோரும்
பங்கு பிரித்துச் சாப்பிட்டார்கள்
தயங்கி தயங்கி
கடைசியில் இருந்தவன் சொன்னான்
கொஞ்சம் பெரிய ரொட்டியாக
வரைந்திருக்கலாம்