Thursday, July 21, 2016

சட்டை

ஸ்டூலில்
ஏறி நின்று
அப்பாவின் சட்டைக்கு
பொத்தான்கள் போடுகிறது குழந்தை
ஒரு பொத்தான்
மாறி விட
சமநிலை மாறுகிறது சட்டை
சரி செய்துகொள்ளச் சொல்கிறாள் அம்மா
சரி என்கிறது குழந்தை
அப்படியே போகிறார் அப்பா

Monday, July 18, 2016

என்னிடம் சொற்கள் இருக்கின்றன

என்னிடம் சொற்கள் இருக்கின்றன
நான் பணக்காரன் என்று
சொன்ன நண்பர் ஒரு தேநீர்
வாங்கித் தரச் சொன்னார்
குடித்து முடித்து
நன்றியுடன் சொன்னார்
என்னிடம் சொற்கள் இருக்கின்றன
நான் ஏழையல்ல என்று