அனுபவ சித்தனின் குறிப்புகள்

1076-

வெகு ஆழத்தில்

தியானம் செய்யும்

கனவின் ஆழத்தில்

இருக்கிறேன் நான்

1077-

பயம் 

துரத்திக்கொண்டே இருக்கிறது 

நல்லது 

ஓடிக்கொண்டே இரு

1078-

என் பிரார்த்தனை தட்டில் 

பாவங்கள்

ஆனாலும் 

கடவுள் முன் நிற்கிறேன்

1079-

நாளை நான் 

கிடைக்கக் கூடும் 

அதற்கு இன்று 

தொலைய வேண்டும்

1080-

இந்த வாக்கியம் 

உண்மையாக எளிமையாக 

இருந்தது

அழகாக்கியபோதுதான் 

பொய்யும் பூதமும் 

சேர்ந்து விட்டது

1081-

தட்டி எழுப்புகிறது 

கேள்வி

நானே பதிலாகிறேன்

1082-

நிராயுதபாணி 

நெஞ்சில் ஒலிக்கிறது 

நானே ஆயுதம்

வேட்டை நாய்கள்

எல்லோரையும்
வேட்டை நாய்களாக்கி விட்டோம்
மனம் வருந்திச்
சொன்னார் பெரியவர்
என் கண்களிலிருந்த
வேட்டை நாய்
வெளியே வந்து
அவர் கால்களை
நக்கிக் கொண்டிருந்தது

சாவி துவாரத்தில்

சாவி துவாரத்தில்
இறந்து கிடக்கிறது
ஒரு கண்
அதன் இமைகள்
துடித்தபடி

நகரும் கதை

1-
அதர்மம் 
நடிக்கிறது
தர்மம் 
பார்க்கிறது

2-

நீ எப்போது 

சைத்தான் ஆனாய் 

இரக்க மனதை 

இறக்கி வைத்தபோது 

3-

எழுத்தில் 

ஓய்வெடுக்கிறேன்

என்றாலும் எழுதுகிறேன்

4-

கதை நகர்வதைப் 

பார்த்துக்கொண்டிருந்தேன்

நகர்வின் 

அழகில் மயங்கி 

எழுதுவதை 

மறந்து விட்டேன்

5-

பேராசையை 

மனதிற்கு ஊட்டிவிட்டு 

அதை பசியுடனேயே இருக்க 

பழகி வைத்திருக்கிறோம்

இழு

இழுக்க முடியுமா 

இந்த தேரை 

முடியும் 

இழு 

தேரே சொன்னது

கேட்டுத் துளைக்கிறாள் மான்யா

காட்டில் கொண்டு போய் 

விட்டுவிடலாமா 

சர்க்கஸ் சிங்கத்தை 

பார்க்க விடாமல் 

கேட்டுத் துளைக்கிறாள் மான்யா

மறுநாள் 

அவள் வரைந்த வனத்தில் 

அந்த சிங்கம் 

உலவிக்கொண்டிருந்தது

கொம்பு

எனக்குத் தலையில் 

கொம்பு முளைத்திருக்கிறது 

என்கிறீர்கள் நீங்கள் 

உங்களுக்குத் தலையில் 

கொம்பு முளைத்திருக்கிறது 

என்கிறேன் நான் 

இருவரும் இல்லை 

என்கிறோம் 

கண்ணாடியில் 

பார்க்கிறோம் 

கண்ணாடியில் 

கொம்பு முளைத்திருக்கிறது 

உணர்வின் மையம்

எழுதினேன் 

சித்திரம் கிடைத்தது 

வரைந்தேன் 

சித்திரம் கிடைத்தது 

ஒன்று போலில்லை 

மற்றொன்று 

ஆனாலும் 

உணர்வின் மையம் ஒன்று

ஒரு பகல் நேரத்தில்

1-

முழு கடலையும்

மறைக்கிறான்

சுண்டல் விற்கும் சிறுவன்

2-

நதி கண்களில்

வழிகிறது

மணல் லாரிகளில்

நீந்துகின்றன மீனகள்

3-

எனது காட்சி

இன்னும் வரவில்லை

திரை இறக்குபவனை

பதட்டத்துடன் பார்க்கிறேன்

4-

இது ஒரிஜினல் ரத்த்த்தில்

வரைந்த ஓவியம்

இதற்கு ரத்தம் தந்தவர்

பக்கத்தில்

இறந்து கிடக்கிறார் பாருங்கள்

அவரை அடக்கம் செய்யவாவது

இந்த ஓவியத்தை

நீங்கள் வாங்கித்தான்

ஆக வேண்டும்

5-

காட்சிகள் இல்லாத

ஒரு பகல் நேரத்தில்

மிகத்தனியே

குலுங்கி குலுங்கி அழுகிறான்

சர்க்கஸ் கோமாளி

தன் கைகளைத் தட்டியபடி

6-

நூலகம்

பசி மறக்க

புத்தகம்

7-

பாலின் ஏடென

படிந்து கிடக்கிறது மெளனம்

நீக்கி

பருகப் பார்க்கிறேன்

உள் உறைந்த சொற்களை

பார்க்கிறது

சொல்லில் நீந்திய 

மீனை எடுத்து 

வாக்கியத்தில் போட்டேன் 

அது நீந்தி நீந்தி 

மொழியின் பரப்புக்குப் 

போகப் பார்க்கிறது

விடுதலை அடைந்தேன்

தற்கொலை செய்து கொள்ள 

கயிறை வரைந்தேன் 

கயிறை அழித்து 

விடுதலை அடைந்தேன்

கதை சொன்ன போது

கனவு விழித்தபடி 

கதை சொன்ன போது 

நான் உறங்கிக்கொண்டிருந்தேன் 

கனவு உறங்கியபடி 

கதை சொன்ன போது 

நான் விழித்துக்கொண்டிருந்தேன் 

நீளம்

வாக்கியத்தின் நீளத்திற்கு 

போய் வருகிறது ஊஞ்சல் 

ஒவ்வொரு முறை 

போய் வரும் போதும் 

புது புது வாக்கியங்களை 

உருவாக்கிக் கொள்கிறது 

உங்களுக்குத் தெரிகிறதா

1-

அன்பின் சுடர் அசைகிறது

என்று எழுதிய வரியை

நீங்கள் உடனே

அழித்து விடலாம்

உங்களால் ஊதி

அணைக்க முடியாது

2-

வெறும் கண்களை வரைந்து 

கடவுள் பிறந்து விட்டார் 

என்கிறாள் மான்யா

ஒரு கணப் பார்வையில் 

இமைகள் அசைவது 

அவளுக்குத் தெரிகிறது 

எனக்குத் தெரிகிறது 

உங்களுக்குத் தெரிகிறதா 

3-

நெடிதுயர்ந்து

நிற்கிறது மலை

உச்சியில்

என் முகச்சாயல் உள்ள

ஒருவன் நிற்கிறான்

பறவையின் பிரமிப்புடன்

அவனை அடைய வேண்டும்

ஏறிக்கொண்டிருக்கிறேன்
4-
குழந்தை போலிருந்த அவனை

பைத்தியக்காரன் எனச்சொல்லி

கைவிலங்கிட்டு

அழைத்துச் சென்றார்கள்

அவன் சத்தம்போட்டு

சிரித்தபடி சொன்னான்

விலங்குக்கு வெளியே

அவர்கள் பத்திரமாக

இருக்கிறார்கள்

உள்ளே நான்

சுதந்திரமாக இருக்கிறேன்
5-
வழிகாட்டி பலகை

காற்றில் ஆடி ஆடி

திசைகளை

மாற்றிக்கொண்டிருக்கிறது

பயணி நடக்கிறான்

பாடலை முணுமுணுத்தபடி

கண்களால்

வழிகளைத் தொட்டபடி
6-
பெரிதாகப் பேசுகிறீர்களே

கடலின் சேறு

ஒட்டியதுண்டா

உங்கள் மனதில்

7-

பொய்களில்

மறைத்து வைத்திருக்கும்

கத்திகளில்

உண்மையான வன்மம்

இருக்கிறது

8-

வெட்டப்பட்ட கனவிலிருந்து

கசியும் குருதியைத்

துடைக்கிறான் அவன்

இரவின் விரல்களிலும்

துளிகள் ஒட்டிக்கொண்டு

உதிர்ந்து விடாமல்

பேசுகின்றன

வலியின் கதைகளை

9-

உங்கள் மேல்தான்

ஊர்ந்துகொண்டிருக்கிறேன்

காற்றென

ஏதேனும்

தொந்திரவு நிகழுமெனில்

மாறுவேன்

பாம்பென

10-

என்னிடம்

மிச்சமிருப்பதும்

நான்தான்

(குங்குமம் பொங்கல் சிறப்பிதழில்-(20.01.2014) வெளியான கவிதைகள்)

இருளின் வண்ணம்

இரவை அழகாக 

வரைந்து காட்டுகிறது கனவு 

அதற்கு இந்த 

இருளின் வண்ணம் 

இன்னும் பொருந்துகிறது

அழுவதை நிறுத்து

வலியை வரையும்
வண்ணமா கண்ணீர்
அழுவதை நிறுத்து
உன் முகம்
சித்திரமானது போதும் 

தவளைகள் சத்தம்

தவளைகள் சத்தம் 

இரவின் மேல் 

சொற்களை அடுக்குகிறது 

சொற்கள் 

ஒரு  கனவாகி 

சிறகு விரித்து 

பறந்து வந்து 

மனதில் அமர்ந்து 

இளைப்பாறுகிறது 

உணர்ந்தபடி 

உறங்கிக் கொண்டிருக்கிறேன் 

விடிய இன்னும் 

நேரமிருக்கிறது 

என்ன செய்ய

பாரமாகவே உணர்கிறேன் 

என்ன செய்ய 

முதலில் 

மனதில் சுமந்து செல்லும் 

சவப்பெட்டியை 

இறக்கி வையுங்கள்

ஏன் கொன்றீர்கள்

அதுவாக

அமைதியாக

போய்க் கொண்டிருந்தது

அதை ஏன் கொன்றீர்கள்

என்ன கேள்வி இது

விஷப்பாம்பு

விட்டால் கடித்து விடும்

பிறகு மரணம்தான்

அவ்வளவு பயமா

உங்களுக்கு

ஆமாம்

அப்படி என்றால்

முதலில் நீங்கள்

உங்கள் பயத்தைதான்

கொன்றிருக்க வேண்டும்

பாம்பை அல்ல

சித்திரத்திலிருந்து

பழுதடைந்த சித்திரத்திலிருந்து 

கோடுகள் உதிர்கின்றன 

எந்தக் கோட்டிற்கும் 

வரைந்தவரின் பெயர் 

நினைவில் இல்லை

எல்லோரும்

உடையவில்லை 

மிதந்து கொண்டிருக்கிறது 

நீர்க்குமிழி 

பார்க்கும் எல்லோரும் 

உடைந்து கொண்டிருக்கிறார்கள் 

புள்ளியில்

நீ கவனம்
குவித்த புள்ளியில்
மௌனம் பூத்திருந்தது
பறித்துக்கொண்டு
திரும்பி விட்டேன் 

ஒரு மழை நாளில்

ஒரு மழை நாளில்
அழுவது
இதமாக இருக்கிறது.
அது மழை போலவே
நிம்மதி தருவதாகவும்
இருக்கிறது.

மற்றவர்

பொய் பேச வராது
அதனால்
அமைதியாகி விடுவேன்
என்றார் ஒருவர்

என் அமைதி
அப்படி அல்ல
அதுதான் பொய்கள்
தயாரித்து கொடுக்கும்
பின் பேசுவேன்
என்றார் மற்றவர் 

தேநீர் வேளை

தேநீர் வேளையில்

கண்ணீரின் அகதி நான் 

என்ற வரி வந்தது 

தேநீரும் 

உப்புக் கரித்தது

போலிருந்தது

ஆழ்மனதில்

ஆழ்மனதில் 

குத்தி இருந்த 

முள் ஒன்றை 

எடுத்து விட்டேன் 

சொட்டிக் கொண்டிருக்கும் 

குருதியைத்தான் 

நிறுத்த முடியவில்லை 

புல்லின் காதில்

புல்லின் காதில் 

ரகசியமாய் 

அன்பை சொன்னேன் 

அமைதியாக

கேட்டுக் கொண்டது 

அமைதியில் 

அன்பிருந்தது

அனுபவ சித்தனின் குறிப்புகள்

1070-

வேடத்தைக் 

கலைத்து விட்டேன்

வண்ணங்கள் 

தங்கி விட்டன

1071-

சொல்லப்படுகிற கதைகளில் 

சொல்லப்படாத கதை 

பயணிக்கவே செய்கிறது

1072-

பெயரைக் குலுக்கினேன்

பெயர்கள் 

உதிர்ந்தன

1073-

மனதின் 

மெளன வெளிகளில் 

மிதந்து போக வேண்டும்

1074-

கூண்டோடு 

பறக்குமா பறவை 

வந்த வரி 

பறந்து போனது 

கூண்டை விட்டு 

1075-

மனதின் அடியில் 

மறைத்து வைத்தேன் 

மனதை வெளியில் 

திறந்து வைத்தேன்

கதவுகள்

சில கதவுகள் 

பூட்டியே இருக்கின்றன 

நாம் காத்துக்கொண்டே 

இருக்கிறோம் 

அவர்கள் வேறு வழிகளில் 

போய் வந்துகொண்டிருக்கிறார்கள்

முடியாது

வீங்கிப் பெருத்த 

உங்கள் கேள்விக்கு 

என்னால் 

சிகிச்சை செய்யவும் 

முடியாது 

பதில் தரவும் 

முடியாது

தற்கொலை செய்து கொள்ளப்போகும் ஒருவன்

தற்கொலை செய்து கொள்ளப்போகும்
ஒருவனை
வரைந்து முடித்தேன்
மீதி இருந்த வண்ணத்தில்
அவன் முடிவை மாற்றிக்கொண்டு
திரும்ப வேண்டும் என்ற
பிரார்த்தனை கவிதையை
எழுதி வைத்தேன் 

இரு முனைகள்

கேள்வியின் 

இரு முனைகளிலும் 

நான்தான் 

கடந்து வருகையில் 

யாரேனும் ஒருவர் 

கண்டெடுக்கலாம் 

பதில்களை 

முதலில்/இப்போது

முதலில்
நான் இல்லை

இப்போது
நான் இருக்கிறேன்

இப்போது
நான் இல்லை

முதலில்
நான் இருந்தேன் 

நான் மட்டுமே உள்ள அறை

நான் மட்டுமே 
உள்ள அறையில் 
என்ற வரியை 
மனதால் மட்டுமே 
வாசியுங்கள் 
நீங்கள் சத்தம் போட்டு 
வாசிக்கையில் 
வேறு சிலரும் இருப்பது 
போன்ற தொனியை 
அது தந்து விடக் கூடும்

நடை நுட்பம்

சந்திக்க விரும்பாமல் 

வேறு வழியில் 

திரும்பி விட்டீர்கள் 

நேற்று அந்த வழியில் 

இதே நடை நுட்பத்தைத்தான் 

பயன்படுத்தினீர்கள்

அனுபவ சித்தனின் குறிப்புகள்

1061-

சற்றே ஓய்வெடு

சொற்கள்

தியானம் செய்கின்றன

1062-

என் பெயரில் 

இப்போது நானில்லை 

புனைப்பெயரில் 

ஒளிந்திருக்கிறேன்

1063-

குதிரைகள் நிற்கவில்லை 

கனவில் ஓடுகின்றன 

வரிகளுடன் 

நானும் ஓடுகிறேன்

1064-

அரச வேடம் 

அழகாக இருக்கிறது 

அதற்காக 

வாடகை கிரீடத்தை 

வைத்துக் கொண்டே 

இருக்க முடியாது

1065-

ஆழ்மனதில் 

வீசிய கல் 

மிதந்து மிதந்து 

எதையோ தேடும்

1066-

ஒட்டக மனநிலை 

எனக்குண்டு

பாலைவனம் கடப்பது 

கடினமன்று

1067-

நான் மட்டுமே 

வந்திருக்கிறேன் 

எதற்கு என்னை 

சுற்றிப் பார்த்துக் கொண்டே 

இருக்கிறீர்கள் 

1068-

இருளும் மழையுமாக 

இருக்கிறதே 

எப்படிப் போவீர்கள் 

பிரபஞ்சத்தின் 

கருணை கொண்டு 

1069-

கிளை உலுக்க 

உதிர்கின்றன சொற்கள் 

ஒவ்வொன்றும் 

வரியின் ருசியோடு 

இனிக்கிறது

தியானம்

அம்மணத்தில் அமர்ந்து 

தியானம் செய்கிறேன் 

ஆடைகளின் பாரம் 

கணக்கவே செய்கிறது

என்ன செய்யலாம்

கொலைகாரர்கள் எல்லோரும் 

தப்பித்து விட்டார்கள் 

என்ன செய்யலாம் 

வா போய் 

மது அருந்தலாம்

அனுபவ சித்தனின் குறிப்புகள்

1056-

இன்னும் சொல்ல வேண்டும் 

சொற்கள் இல்லை 

நானிருக்கிறேன்

1057-

பெய்யாத மழையும் 

நனைத்தது

1058-

நினைவுகளில் தற்கொலை 

செய்துகொண்டிருந்த போதே 

அவனை நீங்கள் 

காப்பாற்றி இருக்கலாம்

1059-

குருதியில் வரைந்த 

ஓவியத்தைப் பற்றிய 

குறிப்புகள் 

அதன் கோடுகளிலேயே 

இருந்தன

1060-

ஊதி 

அணைக்கப் பார்த்து 

தோற்கிறீர்கள் 

கனவுகளில் 

அசைகிறது சுடர்

உடைதல்

உடைந்து கொண்டிருக்கிறேன் 

நீங்கள் துண்டுகளை 

எண்ணிக் கொண்டிருக்கிறீர்கள் 

நான் என்னை 

எண்ணிக் கொண்டிருக்கிறேன் 

மறு முறை

தலைகீழாய் 

தொங்குகிறேனா

 

நேராய் 

நிற்கிறேனா 

கேள்விகளுக்கிடையில் 

ஒரு முறை 

வெளவாலாய் பறந்தேன் 

மறு முறை 

நானாய் நடந்தேன்

இரு வேறு ஓவியங்கள்

இதுதான் நான் என்று

நான் வரைவதும்

இதுதான் நீங்கள் என்று

நீங்கள் வரைவதும்

ஒரே வண்ணத்தில்

வரையப்பட்ட

இரு வேறு ஓவியங்கள்

இந்தக் கதையில்

எழுதிக் கொண்டிருக்கும் 

இந்தக் கதையில் 

எவ்வளவோ கதாபாத்திரங்கள் 

நான் அவர்களுக்குப் 

புதியவனாகத் தெரிகிறேன் 

அவர்கள் எனக்கு 

புதியவர்களாகத் தெரிகிறார்கள் 

பக்கங்கள் 

கடந்து போகையில் 

எல்லோரும் பழகி விடுவோம்

வாழ்க்கைக்கு வாருங்கள்

பார்க்க கனவைப் போல இருந்தார் நண்பர் சவப்பெட்டியில் எழுப்பி வாழ்க்கைக்கு வாருங்கள் என்று சொல்லத் தோன்றியது

சாயல்

மிதந்த யானை 

பட்டாம்பூச்சியின் சாயல் 

கொண்டிருந்தது

பதில்

உங்கள் வேட்டையை 

சுவையாக்கியது 

மான் கறி 

தாய் தேடும் குட்டிக்கு 

என்ன பதில் 

வைத்திருக்கிறீர்கள்

யாரும் கேட்கவில்லை

யாரும் கேட்கவில்லை 

அவனுக்குத் தெரியும் 

ஆனாலும் வாசிக்கிறான் 

அவன் புல்லாங்குழலில் 

ரயில் போகிறது 

ரயிலில் 

அவன் போகிறான்

என் ஒப்பனை

உங்கள் கண்களைப் பார்த்து 

என் ஒப்பனையை 

சரி செய்து கொண்டேன் 

இப்போதும் உங்களால்

கண்டுபிடிக்க முடியவில்லை

தப்பித்தலின் வியூகம்

அவன் தப்பித்து 

வந்து விட்டான் 

பிடியுங்கள் என்றான் 

தப்பித்து வந்தவன் 

யாரைப் பிடிப்பது 

என்ற குழப்பத்தில் 

தப்பித்து ஓடினேன் 

என்னை விரட்டியவனிடமிருந்து

என் தாழ்வாரத்தில்

என் சுயநலச் சுவரில் 

காகம் எச்சமிட்டுப் போனது 

காகத்திற்கு நன்றி சொல்லி 

சுவரை இடித்து விட்டேன் 

இப்போது என் தாழ்வாரத்தில் 

பறவைகள் தானியங்கள் 

எடுத்துப் போகின்றன   

ஒளி வட்டம்

தன் தலைக்குப் 

பின்னால் இருந்த 

ஒளி வட்டத்தை 

யாரோ திருடிவிட்டார்கள் 

என்றார் நண்பர்

உங்கள் அறிவின் வெளிச்சத்தால் 

கண்டுபிடிக்க முடியாதா 

என்றேன்

இருளடைந்த கண்களால் 

பார்த்தபடி 

எதுவும் சொல்லாமல் 

நடந்து போனார்