Powered by Blogger.

ஒரு பறவை

Monday, April 29, 2013

என் விரலை 
கிளை என நினைத்து 
வந்தமர்ந்து 
உள்ளங்கை நீரைக் 
குடித்துப் போகிறது 
ஒரு பறவை 
பறந்து போகையில் 
மரமாகவும் 
நினைத்திருக்கக் கூடும் 

உங்களுக்குத் தெரியாது

கடைசிக் காட்சியை மட்டும் 
பார்க்க அனுமதிக்கிறீர்கள் 
இதுவரை நான் 
உங்கள் கதாபாத்திரங்களோடு 
பேசிக்கொண்டிருந்தது 
உங்களுக்குத் தெரியாது

நினைவின் அடுக்குகளில்

Wednesday, April 24, 2013


நினைவின் அடுக்குகளில் 
எந்த அடுக்கில் 
இருக்கிறாய் என்று 
தேடித் தேடி 
களைத்துப் போய் 
உறங்கி விட்டேன் 
உறக்கத்தின் அடுக்குகளில் 
விளையாடத் தொடங்குகிறாய்

ஓடுபவர்கள்


எனது கனவில் 
ஓடும் குதிரையும் 
குதிரையின் கனவில் 
ஓடும் நானும் 
வேகத்தில் 
வித்தியாசப்படலாம் 
ஆனால் ஓடுபவர்கள்

கல் சுவர்

Tuesday, April 16, 2013

கல் சுவரில் மோதி 
கண்ணாடிப் பட்டாம்பூச்சி 
உடைந்து போனது 
சில சில்லுகள் கிடந்தன 
பல சில்லுகள் பறந்தன

என்ன யோசனை

Friday, April 12, 2013


சட்டென நிறுத்திய நண்பர்
என்ன யோசனை என்றார்

தெரியவில்லை 
என்றேன்

யோசனையா
என்னையா
கேட்டார்

சிரித்தேன்

சிரிப்பின் காரணம் கேட்டார்

தெரியவில்லை 
என்றேன்

வேகமாகப் போய்விட்டார்

நடந்தேன்

என் கவலை எல்லாம்
திடீரென்று
இன்னொரு நண்பரை
இது போல்
சந்தித்து விடக்கூடாது
என்பதுதான்

தடுத்தது குரல்

கேசவா
என்ன யோசனை


அழிந்து கொண்டே வரும் வரி

Thursday, April 11, 2013


முயலைப் பார்த்தபோது 
குழந்தை இல்லை 
குழந்தையைப் பார்த்தபோது 
முயல் இல்லை 
முயல்குட்டியைப் போல் 
ஓடுகிறாள் குழந்தை 
என்ற வரி 
அழிந்து கொண்டே வந்தது 

மான்யாவின் கடல்


கடல் பாத்து முடிச்சாச்சா 
போகலாமா 
கேட்கிறேன் மான்யாவிடம்
சிரித்துச் சொல்கிறாள்
அய்யோ அப்பா 
கடலப் பாத்துக்கிட்டே இருக்கணும் 
அது முடியவே முடியாது

கண்ணில்

Tuesday, April 09, 2013

யுத்தம் பற்றி 
எழுதிய கவிதையை 
சமாதானப் புறாவிடம் 
படித்துக் காட்டினேன் 
குருதியின் வலியை 
குறைத்திருக்கலாமே என்றது 
அப்போது 
அதன் கண்ணில் 
நீர் வடிந்தது 

காணவில்லை

Monday, April 08, 2013


நீல நிறப் பூனை
பக்கத்தில் 
பச்சை நிற எலி 
வரைந்தாள் மான்யா
நிறங்கள் சிதறிக் கிடக்க 
இரண்டையும் காணவில்லை

திரை


திரை விழுந்து விட்டது 
நாடகம் முடிந்து விட்டது 
எல்லோரும் 
வெளியேறி விட்டனர் 
நான் இன்னும் 
கதாபாத்திரத்தை விட்டு 
வெளியேறவில்லை

விளையாடு

Wednesday, April 03, 2013

இப்படித்தான் காய் 
நகர்த்துவார்கள் 
வியூகம் குறித்து 
விவாதிக்காதே 
விளையாடு 

 

Followers

Pages

Blogger news

Blogroll

Most Reading

Ads 200x200

Ads 200x200
வலைப்பூவின் வாசம் விரும்பியவர் : சேரல்