Powered by Blogger.

மலர்ந்தும் உதிர்ந்தும்

Tuesday, November 27, 2012

மலர்தல் உண்மை 
உதிர்தல் உன்னதம்

இந்த வரிகளைத் 
தந்து விட்டுப் போனவரைத் 
தேடிக் கொண்டிருக்கிறேன் 

மலர்ந்தும்
உதிர்ந்தும்

வரியின்அடியில்

Friday, November 23, 2012

இந்த வரியின்அடியில் 
ஓடுகிறது நதி 

இந்த வரியின் மேல் 
விரிகிறது மலை 

மலை உச்சியிலிருந்து 
நதியின் ஆழத்தில் 
குதிக்கிறேன் 

வேறு வரிகளோடு 
வெளி வர

இடதும் வலதும்

Thursday, November 22, 2012


என் வலது பக்கம்
பயமும்
இடது பக்கம்
தைரியமும்

என் இடது பக்கம்
பயமும்
வலது பக்கம்
தைரியமும்

என் இடது பக்கம்
பயமும்
வலது பக்கம்
பயமும்

என் இடது பக்கம்
தைரியமும்
வலது பக்கம்
தைரியமும்

என் வலது பக்கம்
வலதும்
இடது பக்கம்
இடதும்

அனுபவ சித்தனின் குறிப்புகள்

Wednesday, November 14, 2012

973-

இவ்வளவு 
கடுமையானதா 
எழுதுவது 
இவ்வளவு 
எளிமையானதா 
எழுதியது 

974-

வளைவின் 
முனைகளில் நாம் 
வளைவையும் 
நம்மையும் 
நேராக்கும் முயற்சியில்

975-

உங்கள் முதுகில் 
பாய்ந்திருக்கிறது 
என் கத்தி 
வீரத்திற்கான பரிசு 
என் கைகளில்

976-

சுவாரஸ்யமான போட்டி 
முந்திக்கொண்டிருக்கும் என்னை 
முந்த விரும்பும் நான்

977-

ரயில் பெட்டிகளை 
வரைகிறாள் குழந்தை 
அவள் பென்சில் வழியே 
ஓடிக்கொண்டிருக்கிறது ரயில்

978-

பழகிய பறவையின் 
சிறகை வருடினேன்.
வானத்தின் வாசம் வீசியது

979-

இருள் மழை 
கண்கள் மூடி 
நனைகிறேன் 

980-


எங்கிருக்கிறது 
இல்லாதது 

981-

மௌனத்தின் 
ஆழத்தில் 
ஆழத்தின் 
மௌனம் 





வரியில்

Tuesday, November 13, 2012

புல் விரிந்து 
வனமாகும் 
என்று எழுதிய வரியில் 
நானே 
புல்லாய் 
வானமாய்

பொய்கள்

Sunday, November 11, 2012

உண்மைக்குள் 
நுழையவே விருப்பம் 
கால்களைச் சுற்றி 
பாறாங்கற்களாய் 
அழுத்துகின்றன பொய்கள்

மிதக்கும் நிலவு

இந்த ஓடையில்
மிதக்கும் நிலவோடு
எனக்கொன்றும்
இல்லை பேச
பார்ப்பதைத் தவிர

ஆப்பிள் மரம்

Saturday, November 10, 2012

நான் ஆப்பிள் மரம் 
உங்களுக்கு எத்தனை 
ஆப்பிள் வேண்டும் 
கேளுங்கள் தருகிறேன் 
சொன்னாள் குழந்தை 

ஆப்பிள் மரம்தான் வேண்டும் 
எனச் சொல்லி 
அவளைத் தூக்கி கொஞ்ச 
விடாமல் சிரித்தாள் 

அவள் சிரிப்பில் 
உதிர்ந்து கொண்டே இருந்தன 
ஆப்பிள்கள்

கூலி

Friday, November 09, 2012

அய்யா என் வியர்வை 
கேட்கும் கூலியை 
உங்களால் 
கொடுக்க முடியாது 
நான் கேட்கும் 
கூலியையாவது கொடுங்கள் 

கொடுக்காவிட்டால் 

வியர்வை கேட்கும் 
கூலியைத் தர 
வேண்டி வரும் 

சித்திரம்

Monday, November 05, 2012

என்னால் 
புரிந்து கொள்ள முடியாத 
ஒரு சித்திரத்தை 
வரைந்து வைத்திருக்கிறாய் 
ஆனாலும் 
உன் கோடுகள் வழியே 
முழுதாய்ப் பயணித்து 
திரும்பி விட்டேன் 

மன்னிக்கவும்

Friday, November 02, 2012

உன் தலைக்கு வெளியே 
உன் எண்ணம் 
எட்டிப் பார்க்கிறது 
அது ஆபத்து 
உள்ளே அனுப்பு 

அது ஏணியும் கூட
 நான் உயரம் 
ஏறிச் செல்ல 
நீங்கள் சித்தரிக்கும் கருத்தில் 
உங்கள் பிம்பம் 
பலமற்றதாகத் தெரிகிறது 
மன்னிக்கவும் 

திரும்பிச் செல்கிறேன்

மலை உச்சியில் 
தற்கொலையைத் தள்ளிவிட்டு 
திரும்பிச் செல்கிறேன் 
கடந்து போகும் 
காற்றில் இருக்கிறது 
என் நம்பிக்கை 
முணுமுணுக்கும் 
பாடல் வரிகள்
 

Followers

Pages

Blogger news

Blogroll

Most Reading

Ads 200x200

Ads 200x200
வலைப்பூவின் வாசம் விரும்பியவர் : சேரல்