Wednesday, October 31, 2012

கவிதையானது

நாங்கள் பசியைக்
கண்களால் பரிமாறுகிறோம் 
நீங்கள் உணவைக் 
கைகளால் பரிமாறுங்கள் 
என்று எழுதிய பேனாவிற்கு 
இந்த வரி உணவானது 
எனக்கு கவிதையானது

Wednesday, October 24, 2012

அனுபவ சித்தனின் குறிப்புகள்

970-

அருகருகே தவறுகள் 
சரி செய்ய நடக்கிறேன் 
அங்கிருந்து இங்கும் 
இங்கிருந்து அங்கும்

971-

உண்மையின் பக்கத்தில் 
நிற்கிறேன்
ஆனாலும் 
பொய் மீது 
சாய்ந்து கொள்கிறேன்

972-

அமைதியின் நிழல் 
விழுகிறது 
தனிமை மீது

Monday, October 22, 2012

முடிந்தது எது?

கனவு என்னைத் தள்ள 
நான் கனவைத் தள்ள 
கனவு கனவைத் தள்ள 
நான் என்னைத் தள்ள 
முடியாத விளையாட்டில் 
முடிந்தது எது?

Sunday, October 14, 2012

அனுபவ சித்தனின் குறிப்புகள்


965-

அங்கொரு சொல் 
இங்கொரு சொல் 
எனச் சிதறிக் 
கிடக்கிறது

966-

என் மண் புழு 
கனவுக்கும் 
திமிங்கலப் 
பசியுண்டு

967-

புன்னகையற்று முடியும் 
உரையாடலில்
கசப்பு 
செய்தியாகி விடுகிறது

968-

கொடுப்பதற்கு 
உங்களிடம் 
ஒன்றுமில்லை
எடுத்துக் கொள்வதற்கு 
நிறைய இருக்கிறது

969-

பெரிய கனவு 
நசுங்கும் இரவு 
நடுவில் நான் 





கடல் நீந்துகிறது

மீன் தொட்டியில் 
கடல் நீந்துகிறது
என்ற வரியை 
எழுதிய பிறகு 
மீன்களை 
கடலில் விடத்
தோன்றுகிறது

Saturday, October 13, 2012

வந்த கனவு

அக்டோபர் இரண்டில் 
டாஸ்மாக் திறந்திருந்தது 
இது நல்ல கனவா 
கெட்ட கனவா 
தெரியாது 
ஆனால் 
வந்த கனவு

Thursday, October 04, 2012

ஒரு வார்த்தை

பசியின் மீது 
பறக்கிறது 
ஒரு வார்த்தை 
பசி பசி என்று 
சொல்லியபடி 

ரணம்

தொண்டையில் 
சிக்கிய முள்ளை 
கனவில் எடுத்தேன் 
ரணம் 
இரண்டு இடங்களிலும் 

தொடர

வானவில்லை 
இழுத்துப் போகும் 
எறும்புகள் 
நட்சத்திரங்கள் 
பின் தொடர

ஏதோ ஒரு...

நான் கலைந்து போகும் 
மேகம்தான் 
என் ஒரு துளியேனும் 
ஏதோ ஒரு செடியை 
நனைக்கும்