அனுபவ சித்தனின் குறிப்புகள்

1047-

கசங்கிய சொல் ஒன்றை 

மெல்லப் பிரிக்கிறேன் 

வெளி வரும் காற்றில் 

பாடல் கேட்கிறேன்

1048-

புல்லென அசையும் 

அமைதியின் அடியில் 

நான் உதிர்ந்து கிடக்கும் 

பனித்துளி

1049-

கால்களின் புழுதியில் 

பாதை முகம் 

பார்க்கிறது 

1050-

மீட்டெடுக்க 

தொலைந்தாக வேண்டும்

1051-

கனவில் மிதந்த சொற்கள் 

அந்திக் கருக்கலில் 

பறவைகளாயின

1052-

எப்படித்தான் 

கலைத்துப் போட்டாலும் 

இதுதான் நான்

1053-

இந்த ரொட்டி 

பசியை 

அழகாக்குகிறது

1054-

ஊதிய பனித்துளி 

நதியாகி 

என்னை மூடியது 

1055-

வழி அனுப்பி 

வைத்த கண்ணீர் 

வழி சொல்லிப் போனது