Powered by Blogger.

நாங்கள் கூழாங்கற்கள்

Monday, June 18, 2018

மலைப்பிரசங்கம் செய்தவர்கள்
மலையை 
அபகரித்துக்கொண்டு 
போய் விட்டார்கள்
நாங்கள் கூழாங்கற்கள்
பொறுக்கியபடியே
வீடு திரும்பிக்கொண்டிருக்கிறோம்

அலைகளோடு

Saturday, June 16, 2018

கடலருகே அமர்ந்து
எழுதிக்கொண்டிருந்தேன்
ஒரு கதாபாத்திரம்
ஓடிப்போய்
அலைகளோடு விளையாடி விட்டு
கதைக்குத் திரும்பி விட்டது


பழைய கடிதங்கள்

Wednesday, June 06, 2018

முன் போல்
அப்பாவால்
நீண்ட கடிதம்
எழுத முடிவதில்லை
கை நடுங்குகிறது
அவரின் பழைய கடிதங்களை
இந்தத் தேதியிட்டு
படித்துக்கொள்கிறேன்




உயிர்

Sunday, May 27, 2018

ஏங்க அடிக்கிறீங்க?

ஏய்யா அடிக்கற?

எதுக்குடா அடிக்கற?

உயிர் பிரிந்திருந்தது.

உங்களைக் கொல்லவேண்டும்

Saturday, May 26, 2018

 #bansterlite #savethoothukudi #kumarteastall #conversationwithafriend
அதுவாகச் சரியாகிவிடும் என்றார்
மெதுவாக
இந்த மனோபாவம்தான்
நம்மைக் கொன்றுகொண்டிருக்கிறது என்றேன்
சத்தம் குறைத்துப் பேசச் சொன்னார்
உங்களைக் கொல்லவேண்டும்
போலிருக்கிறது
சைகையால் சொன்னேன்
மீதித் டீயைக் குடிக்காமல்
எழுந்து போய்விட்டார்
துக்கத்தை
விழுங்கிக்கொண்டிருந்தேன்
தேநீரைக்குடித்து
- ராஜா சந்திரசேகர்


#bansterlite #savethoothukudi #kumarteastall #conversationwithafriendஅதுவாகச் சரியாகிவிடு

தெரியவில்லை

Thursday, May 24, 2018

யாரென்று
தெரியவில்லை
எழுதியவரின்
பெயரில்லை
எழுதியதில்
அவர் இருந்தார்


நடுவில்

Wednesday, May 16, 2018

சொற்களின் நடுவில்
காற்று இருக்கிறது
புத்தகம் மிதக்கிறது



வரைந்த வானவில்

வரைந்த வானவில்லை
முத்தமிடுகிறது குழந்தை
வானம் அசைகிறது


பயணித்தல்

வெளியே பயணித்தல்
தூரங்களால் ஆனது
உள்ளே பயணித்தல்
ஆழங்களால் ஆனது


நீயே விழிச்சுக்கப் பாரு

Tuesday, May 15, 2018


நீயே விழிச்சுக்கப் பாரு
இங்கு எதுவும் சரியில்ல 
தம்பி கேளு
தண்ணிய கேட்டா
டாஸ்மாக் காட்டுறான்
தடுமாறி விழுந்தா
போட்டு அடிக்கறான்
கட்டளைக் கேட்டு
பொம்மைகள் ஆடுது
உரிமைகள் எல்லாம்
காத்துலப் பறக்குது
அரசியல் புனிதர்
ஆயிரம் பேசுறார்
உண்மைய விட்டு
உளறிக் கொட்டுறார்
விளைஞ்சப் பயிறு
வாடிக்கிடக்குது
விதைச்ச மனசு
துடிச்சிப்போகுது
உள்ளுக்குள்ள
பேசி மறைக்கிறான்
ஊமை வேஷம்
போட்டுப் போகிறான்
கார்ப்பரேட் பையில
காசு சேருது
எங்க வயித்துல
பசி ஊறுது
நிம்மதி குறைஞ்சிப் போச்சு
நினப்பு கொதிநிலையாச்சு
மனசுல கூடுது கனம்
போராடிப் பாக்குது ஜனம்
தீர்வ நோக்கி நகரல
திரைக்குள் பேரம் முடியல
எல்லாம் தப்பாப் போகுது
நாடு நஞ்சா ஆகுது
ஒழுக்கம் நசுங்கிப் போச்சு
உண்மை ஓட்டை ஆச்சு
எதுவும் சரியா நடக்கல
என்ன ஆகுமோ தெரியல
நீயே விழிச்சுக்கப் பாரு
இங்கு எதுவும் சரியில்ல
தம்பி கேளு
- குமுதம் இதழில் (16.5.201) வெளியானது -

வழிப்போக்கன்

Monday, May 14, 2018

உறங்குகிறது 
நிழல் 

இளைப்பாறுகிறது 
நாய்

கடக்கிறான்
வழிப்போக்கன் 


சிறுபுல்

Saturday, May 12, 2018

நான் சிறுபுல் 
பெருவனம் 
முத்தமிடும்போதெல்லாம் 
கூடுதலாகக் கொஞ்சம் 
அசைந்து கொள்வேன்


கருணை சிகிச்சை

Monday, May 07, 2018

மெல்லக் குனிந்து
கும்பிட்டவரின்
யானைக்காலை
தும்பிக்கையால்
தடவிக்கொடுத்தது யானை
கருணை சிகிச்சை
கிடைத்தது போல்
சந்தோஷப்பட்டார்

இருக்கை

என் இருக்கையில் 
எல்லோரும் அமர்ந்திருந்தார்கள் 
மற்ற இருக்கைகள் 
காலியாக இருந்தன

மன்னிப்பின் கிளைகளில்

Wednesday, May 02, 2018

மன்னிப்பின் கிளைகளில்
குற்றங்கள் இளைப்பாறுகின்றன
மரத்தைச் சாய்த்துவிட்டுப்
போய் விடுகின்றன

    

நன்றி

Monday, April 30, 2018

கற்றுத்தரும் தருணங்களுக்கு நன்றி 
பெற்றுத்தரும் தருணங்களுக்கு நன்றி
பெருமை சேர்க்கும் தருணங்களுக்கு நன்றி
அன்பான தருணங்களுக்கு நன்றி
அழைத்துச்செல்லும் தருணங்களுக்கு நன்றி
இயல்பான தருணங்களுக்கு நன்றி
இணைந்துகொள்ளும் தருணங்களுக்கு நன்றி
உயர்வானத் தருணங்களுக்கு நன்றி
உவப்பான தருணங்களுக்கு நன்றி
பிரார்த்தனைத் தருணங்களுக்கு நன்றி
பிரியமான தருணங்களுக்கு நன்றி
புன்னகையின் தருணங்களுக்கு நன்றி
புதிதாக்கும் தருணங்களுக்கு நன்றி
புரிய வைக்கும் தருணங்களுக்கு நன்றி
தனிமையான தருணங்களுக்கு நன்றி
தங்கிப்போகும் தருணங்களுக்கு நன்றி
நெகிழ்வானத் தருணங்களுக்கு நன்றி
நட்பின் தருணங்களுக்கு நன்றி
நாளின் தருணங்களுக்கு நன்றி
நன்றி சொல்ல வைக்கும் தருணங்களுக்கு நன்றி

பனி நள்ளிரவு கனவு

Wednesday, April 25, 2018

பனி பெய்கிறது
நள்ளிரவு பார்க்கிறது
கனவு நடுங்குகிறது

பக்கங்கள்

Monday, April 23, 2018

எல்லாப் பக்கங்களிலும்
பறந்துகொண்டிருந்தது
பட்டாம்பூச்சி

கையிலிருப்பது
வனமா
புத்தகமா

 


போ

Monday, April 16, 2018

அவகாசம் கேள்
தள்ளிப் போடு
காலம் கடத்து
கத்திப் பேசு
குழப்பு
மயக்கம் கொள்
மந்தமாக இரு
அடிமைகளை உன் பாட்டுக்கு ஆட விடு
விக்கல் வருது பார்
நீயே நீர் குடி
விவசாயிகளின் தற்கொலைப்பட்டியலைப் பிரி
உரக்கப்படி
உடல் அதிர்வு இருக்கட்டும்
கண்ணீர் விடு
கள்ள மெளனம் விடாதே
மேடை அபகரி
வேடங்கள் போடு
நடி
உளறு
உணர்ச்சிவசப்படு
உன் வசதிக்கு வளை
அழுத்தம் கொடு
வீக்கம் மறை
ஊடக வெளிச்சத்தில் உருகு
வசனங்களை மாற்றிக்கொண்டே இரு
விடாமல் அரசியல் செய்
மக்கள் மனதிலிருந்து அழிந்து போ

ஜூனியர் விகடன்(8.4.2018) இதழில் வெளியானது. 

இரண்டிலும்

Saturday, April 07, 2018

ஆழ்ந்த மௌனத்தில்
தியானம் இருந்தது

ஆழ்ந்த தியானத்தில்
மௌனம் இருந்தது

இரண்டிலும்
நானில்லை

நீங்கள் பிறந்துகொண்டிருக்கிறீர்கள்

Sunday, March 18, 2018

இந்தக் கவிதையை
எழுதும் போது
நான் இறந்துகொண்டிருக்கிறேன்


இந்தக் கவிதையை
படிக்கும் போது
நீங்கள் பிறந்துகொண்டிருக்கிறீர்கள்

அப்பா சொல்லுவார்

அப்பா சொல்லுவார்
உன் எழுத்தில்
ஈரம் இருக்கிறது

நான் சொல்லுவேன்
அது நீங்கள் தந்தது

துளிக்கண்ணீரைத்
துடைத்துக்கொண்டு
மெளனத்துள் மூழ்கிப் போவோம்

கைதி எண் 616

Tuesday, March 13, 2018

சிறைக்கம்பிகளுக்கு
அருகில் போய்
கம்பியைத் தட்டிப்பார்த்து
ஒரு துண்டு வெட்டியெடுத்து
துளைகளிட்டு
புல்லாங்குழலாக்கி
வாசிக்கத் தொடங்கினான்

      

முடியாத கதை

Monday, March 05, 2018

அம்மா குழந்தைக்கு
கதை சொன்னபோது
முதல் குண்டு வெடித்தது

கதை பாதியிலிருந்தபோது
இரண்டாவது குண்டு வெடித்தது

அவர்களோடு
முடியாத கதையும் இறந்து கிடந்தது


ரயில்

Sunday, March 04, 2018

எல்லோரும்
அவரவர் உலகத்தில்

புல்லாங்குழல்
வாசிக்கும் சிறுவன்

கேட்டபடி
போகும் ரயில் 

பாடப்போகிறேன்

Wednesday, February 28, 2018

மனம் பிசையும்
சொற்களை வைத்துக்கொண்டு
என்ன செய்யப்போகிறாய்
ஒரு துயரமான பாடலை
பாடப்போகிறேன்

வானத்திற்கு...

Monday, February 26, 2018

பொத்தான் மாற்றிப்போட்டு
கிழிந்த சட்டைக்குள்ளிருந்த சிறுவன்
ஒரு பட்டம் வேணும் என்றான்

அந்த வானத்திற்கு
வாங்கிக்கொடுத்தேன்
கூடவே உணவையும்

குழந்தையும் நானும்

Thursday, February 22, 2018

குழந்தையும் நானும்
ஓர் உரையாடல்

உன் தொப்பிக்குள்
என்ன இருக்கிறது

குட்டி உலகம்

உங்கள் தொப்பிக்குள்
என்ன இருக்கிறது

குட்டி உலகத்துடன் பேச‌
கொஞ்சம் சொற்கள்

 

வழிப்போக்கன்

Tuesday, February 06, 2018

யாரும் கவனிக்காத
வழிப்போக்கனை
பாதை கவனித்து
அழைத்துப் போகிறது

யாரோ ஒருவன்

நள்ளிரவை
எழுப்பியபடியே
சாலையில்
யாரோ ஒருவன்
என் குரலில்
பாடிப்போகிறான்

ஏதோ ஒரு கோணத்தில்

Saturday, February 03, 2018

எல்லாக் கோணங்களிலும்
பொய்யாகத் தெரியும் என்னை
ஏதோ ஒரு கோணத்தில்
உண்மையாகப் பாக்கிறேன் என
நீங்கள் சொல்வது
கடைந்தெடுத்த பொய்

நினைவில் சொற்கள்

நினைவில் சொற்கள் 
சேர்ந்துவிட்டன 
மறதி வந்து 
களவாடுவதற்குள் 
எழுதிவிட வேண்டும் 


பறவையைப் போல‌

Wednesday, January 31, 2018

தண்டவாளங்கள் தற்கொலை செய்துகொள்வதில்லை 
என்று அவன் எழுதிய வரியின் மேல் 
சத்தமிட்டுப்போகிறது ரயில் 
அவன் வேகமாகக் கீழிறங்கி 
ரயிலுக்குக் கையசைக்கிறான் 
மேலெழும்பிப்போகிறது காகிதம் 
பறவையைப் போல‌

       

இடையில்

Monday, January 29, 2018

பொய்களின் தொடர்ச்சியாக‌
எல்லோரும் தெரிகிறார்கள்

உண்மையின் நீட்சியாக‌
ஒருவரும் இல்லை என்றார்

நீங்கள் எந்த வரியில்
இருக்கிறீர்கள் என்றேன்

இரண்டு வரிகளுக்கும்
இடையில் என்றார்

நினைவில்

Saturday, January 27, 2018

துரிதமாக‌
சுயமைத்துனம்
செய்துகொள்பவனின்
நினைவில்
நிதானமாக‌
ஒரு பெண்
சிரித்துக்கொண்டிருக்கிறாள்

உயிர்த்தெழுவேன்

எழுத்தில்
புதைந்து கிடக்கிறேன்
நீங்கள் படிக்கும்போது
உயிர்த்தெழுவேன்

இந்த வரிகளில்

Friday, January 26, 2018

கையிலிருந்து
உருண்டுபோய்
கார் சக்கரத்தில்
நசுங்கிவிட்டது
புல்லாங்குழல்
நான் கேட்பதெல்லாம்
வலியை
கொஞ்சம் இசையை


நானும்

எல்லோரும் போய்விட்டார்கள்
தனிமையும் போய்விட்டது
நானும் போய்விடுவேனோ என்று
பதட்டமாக இருக்கிறது

     
 
அமேசானில் மின்னூல்கள்



Followers

Pages

Blogger news

Blogroll

Most Reading

Ads 200x200

Ads 200x200
வலைப்பூவின் வாசம் விரும்பியவர் : சேரல்