அனுபவ சித்தனின் குறிப்புகள்

295-

சுழற்றிய கயிறு பார்க்க
சுற்றும்
நிற்காத பம்பரம்

296-

சொற்களின் மத்தியில் அமர்ந்து
ஊதித் தள்ளுகிறேன்
அர்த்தத்தின் தூசிகளை

அனுபவ சித்தனின் குறிப்புகள்

293-

வானத்தை
தாண்டவேண்டும்

எப்படி

கீழே இருப்பவர்களிடம்
கேட்காதீர்கள்

வானத்திடமே கேளுங்கள்
சொல்லிவிடும்

294-

உதிர்ந்த பூவின்
அருகில் கிடந்தன
ஊமை வார்த்தைகளும்

நீர் வளையங்கள்

குளத்தின் நிதானத்தை
அமைதியாய் உணர்ந்தான்

கையிலிருந்த
கல்லெறிய
பேரமைதியைக் கண்டான்

நீந்தி வந்த
நீர் வளையங்களைப்
பிறகு பார்த்தான்

அமைதியாக
பேரமைதியாக

அனுபவ சித்தனின் குறிப்புகள்

290-

நீண்ட தூரம்
போய்ப் பார்த்தேன்
தென்படவில்லை
தாளில் எதுவும்

291-

தற்கொலையை மறுப்பவன்
தூக்குக் கயிறை வரைந்து
கிழித்துப் போடுகிறான்

292-

போய் வா
என்றான்

வந்தபின்
போ போ
என்றான்

போகையில்
வா வா
என்றான்

இதையே
சொன்னான்
போனபின்னும்

தன்
நிழலிடம்

அனுபவ சித்தனின் குறிப்புகள்

285-

இருளில்
நீந்தி நீந்தி மேலேறுவது
பிடித்திருக்கிறது

286-

விரல் நுனியில் கண்ணீர்துளி
உதிர்ந்த காரணத்தைச் சொல்லாமல்
கரைந்து போனது காற்றில்

287-

பார்க்காமல் விட்ட பறவை
வந்தமர்ந்தது
கனவின் கிளையில்

288-

பிறக்காத மொழி ஒன்றை
பேசியது
பிறந்த குழந்தை

289-

பதிலைப் போல்
கிடைத்தது
கேள்வி

கரும்பலகை

ஓய்வு பெறப்போகும் ஆசிரியர்
கரும்பலகையில்
வாழ்த்துக்களை
எழுதும் மாணவர்கள்

கடிதம்

திசைகள் தேடி
பறந்து போனோம்

வந்து
வருஷங்களாயிற்று

ஊருக்கு
ஒரு கடிதம்
எழுதுகிறேன்

அனுபவ சித்தனின் குறிப்புகள்

282-

வார்த்தைகளுக்கு
நடுவில் நுழைந்து
வெளியேறுகிறேன்
உரையாடலிலிருந்து

283-

வசிக்க
கற்றுக்கொள்கிறேன்
கனவுக்குள்ளும்

284-

பிஞ்சுக்கரம் விளையாட
குழந்தையாகும்
மழையும்

அனுபவ சித்தனின் குறிப்புகள்

280-

யார் மீதும்
கோபம் வருவதில்லை
வருகிறது
என் மீது

281-

அழைக்கிறது மலை
முடிந்து போகாதே
அடிவாரப் புற்களோடு

பார்க்கும் மரம்

புன்னகை குறைக்காமல்
மென்று முழுங்குகிறேன்
வேப்ப இலையை
பார்க்கிறது மரம்

அனுபவ சித்தனின் குறிப்புகள்

277-

மரணத்தைப் போல்
சுமந்து செல்கிறீர்கள்
போட்டுவிட்டுப் போங்கள்

278-

விழாத நான்
தூக்கினேன்
விழுந்த என்னை

279-

என்னை எனக்கு
எதிரியாக
அறிமுகப்படுத்திய
நண்பரை சந்தித்தேன்

எனக்கு நான்
நண்பனானது குறித்து
சந்தோஷப்பட்டார்

அனுபவ சித்தனின் குறிப்புகள்

270-

குற்றம் செய்
குற்றம் அழிக்கும்
குற்றம் செய்

271-

தற்கொலைக்கு முன்
குடிக்கும் தேநீர்
வரியில் தொங்கியது
உயிரின் கயிறு

272-

உடன் வந்தவர்கள்
ஓடிப்போனார்கள்
கத்தி எறியப்போகிறவன்
கடைசி முறை
சிறுநீர் கழித்துவிட்டு
வரச் சொல்கிறான்

273-

வாய் அதக்கி
சேர்த்து
நசுக்கி
ரத்தம் பாயந்த
வார்த்தைகளைத்
துப்பிவிட்டு நடந்தேன்
பேச எதுவுமில்லை

274-

நஞ்சு கலந்திருக்கிறது
சொற்களின் வசீகரத்தில்
மயங்கிவிடாதீர்கள்

275-

கண் மூட
சுழலும் மெளனம்
காதோரம்

276-

எண்ணும் போதெல்லாம்
கூடிப்போகின்றன
அள்ளி வந்த பொய்கள்

அனுபவ சித்தனின் குறிப்புகள்

267-

புள்ளிக்குள்
விழுந்த பாறை
எடுக்கும்போதெல்லாம்
புள்ளியாகிவிடுகிறது

268-

விடிவதற்கு
இன்னும் நேரமிருக்கிறது
என்ற வரியையே
எழுதிக்கொண்டிருந்தேன்
விடியும் வரை

269-

உடையும்போதெல்லாம்
உருவாகிறது
உடைத்தது

அனுபவ சித்தனின் குறிப்புகள்

261-

வார்த்தைகளுக்கிடையில்
நிசப்தம்
தொட்டுப் பார்க்கும் கவிதை

262-

அன்பு
மையம்
பிரபஞ்சம்
வட்டம்

263-

எப்போதும் போல்
இப்போது சிரித்தீர்களா

ஆமாம்

எப்போதும் போல
இப்போது அழுவீர்களா

எப்போதும் போல் மனிதர்கள்
எப்போதும் இருப்பதில்லை

264-

உன் இறகை
கத்தரித்துவிட்டேனே
எப்படிப் பறப்பாய்

உன்னால்
எங்கள் இறகைதான்
கத்தரிக்கமுடியும்
சுதந்திரத்தையல்ல

265-

இன்றிரவு
தின்னப்போகிறவன் யார்
பசியோடு பார்க்கிறாள்

266-

எழுதிப் பார்த்த
கதை சொன்னது
இன்னும்
எழுதிப்பார் என்று

மாமிசப் பார்வை

மதுவின் உச்சத்திலிருந்தபோது
மதுக்கோப்பையின் மேல்
வந்தமர்ந்தது புறா

மெல்ல தடவியபடியே
பேசப் பார்த்தேன்

கண்களிலிருந்த
மாமிசப் பார்வை விரட்ட
பயந்தபடி
பறந்துபோனது

மதுக்கோப்பையின் உள்ளே
விழுந்துபோன இறகை
வெளியே எடுத்துப்போட்டு
குடித்தேன்

இறகின் துளிகளிலிருந்து
பறந்து சென்றன புறாக்கள்
மிதந்துகொண்டிருந்த என்னை
கீழே தள்ளிவிட்டு

அனுபவ சித்தனின் குறிப்புகள்

258-

எத்தனைப் பயணங்களை
குறித்து வைத்திருக்கும்
தண்டவாளம்

259-

அவனை நான்
இழக்கவில்லை
அவன் நானன்றி
வேறில்லை

260-

நீங்கள் தராவிட்டால்கூட
கேட்டுக்கொண்டிருப்பேன்
உங்களிடமிருந்து
பிறகு
பெற்றுக்கொண்டிருப்பேன்
என்னிடமிருந்து

அன்பின் மொழிகள்

1-

இது கவிதையல்ல
உன் பிரியங்களின்
பூக்கூடை

2-

பெருமிதம் கொள்கிறேன்
உன் அன்பின் முன்
அடிமையாகிப்
போவதை நினைத்து

3-

முழுக் கடலையும்
ஒற்றைத் துளியாக்கி
அன்பு என்று எழுதியபோது
கடலாகிப்போனது
அன்பு

4-

உயிர்
உடையும்போதெல்லாம்
காதல் சேர்த்துவிடுகிறது

5-

உனக்கான கவிதைகளை
எழுதிக்கொண்டிருக்கிறேன்
அதில் நீ
எனக்கான வாழ்த்துக்களைச்
சொல்லிக்கொண்டிருக்கிறாய்

அனுபவ சித்தனின் குறிப்புகள்

254-

வார்த்தைகளுக்கிடையில்
உறுமும் புலி
தின்னும்
வெளியேறும்

255-

உள்ளிருக்கும்
எத்தனையோ
வெறும் மரம்
இதில் எங்கோ
ஒளிந்திருக்கும்
போதி மரம்

256-

தாண்டியவை
அரை கிணறுகள்
எல்லாவற்றிலும்
அவன் பிணம்

257-

மேலேறு

உன்
மேலேறு

உன்னைத்தூக்கி
மேலேறு

மேலேறு

வானம் பிடித்து
மேலேறு

வானம் தாண்டி
மேலேறு

மேலேறு

கீழ்

என் தலையணையின் கீழ்
உனது முத்தம்

முத்தத்தின் கீழ்
எனது முத்தம்

அதற்கும் கீழ்
தனிமையும்
இரவின் மதுவும்

அனுபவ சித்தனின் குறிப்புகள்

250-

சொல்லாத
உண்மைகளுக்குத் தெரியும்
சொன்ன பொய்களின்
கணக்கு

251-

என்னைத் தூக்கி எறிந்து
ஒதுங்குமா பிணம் எனப்
பார்த்திருந்தேன்

கடல் ஒதுங்கியது
கரையிலிருந்த
என்னைப் பார்த்தபடி

252-

எதிர்பார்த்ததுபோல்
இல்லை

எதை எதிர்பார்த்தீர்கள்

தெரியவில்லை

253-

அடைந்துவிட்டதாக
சொன்ன இடத்தை
இப்போதுதான்
அடைந்திருக்கிறேன்

அடையப்போகும்
இடத்தையும்
இப்படியே
அடைந்துவிடுவேன்

ஒலிநாடா சுற்றிக்கொண்டிருக்கிறது

பதிவு செய்த
வரிகளில்
காகத்தின் குரலும்
ஒலித்தது

வரிகளில்
குதிக்கும் இசைபோல்
கேட்டது

கேட்கக் கேட்க
காகத்தின் குரல் நின்று
அது பாடலின் வரியை
ஒவ்வொன்றாய்
உட்கொண்டது

இறுதியில்
ஒலிநாடா சுற்றிக்கொண்டிருந்தது
எந்தவித
சத்தங்களுமற்று

அனுபவ சித்தனின் குறிப்புகள்

248-

மதம் பிடித்த கல்
யானையானது

249-

கேள்விகள்
திரும்பவும்
தேடிப் பெறுகின்றன
கேள்விகளை

பதில்களை
நிராகரித்து

தன்னிலிருந்து
எழவும்

பதில்கள் அல்லாத
ஒன்றைக்
கண்டெடுக்கவும்

பார்த்தல்

உன் குறுஞ்செய்திகளை
அறுத்தெறிகிறேன்

பிரியங்களில்
கசியும் ரத்தத்தை
நிறமாகப்
பார்க்கப் போகிறேன்

ஒரு வரி

என்னைத் தவிர
யாராலும் உங்களைக்
கொல்ல முடியாது
என்று ஒரு வரி
எழுதி இருந்தது சுவரில்

படித்தவர்கள் எல்லோரும்
ஒரு கணம் இறந்து
மறுகணம்
பிழைத்துப் போனார்கள்

வருகை

உன் வெளிச்சத்தை
தொட வேண்டும் என்றேன்

விரலருகே வந்து
கசிந்துவிட்டுப் போனது
நட்சத்திரம்

நிரப்புதல்

ஜனனலோரம்
அமர்ந்திருந்தவரிடம்
பெயர் கேட்டேன்

பேசவில்லை

இறங்கும்போது சொன்னார்

பயணங்களை
காற்றால் நிரப்பு
பெயர்களால்
மூடி விடாதே

அனுபவ சித்தனின் குறிப்புகள்

244-

கனவிடமே
விட்டுவிடுகிறேன்
கனவின் குறிப்புகளை

245-

எதை நினைத்து
அழுகிறாய்

எதை நினைத்து
சிரித்தேனோ
அதை நினைத்து

246-

சொன்னவைகளை
அனாதையாய் விரட்டிவிட்டீர்கள்

சொல்லாதவைகளுக்கு
தண்டனை எழுதுகிறீர்கள்

247-

மழை
துளியிலமர்ந்து இறங்குகிறேன்
பூமிக்கு

எரியும் நூலகம்

எரிந்து கொண்டிருக்கிறது நூலகம்

தீவைத்த சதிகாரர்கள் தப்பிவிட்டார்கள்

காலம் தீக்கனலாகிறது

ஊற்றிய நீரை வாங்கி
தன் பசியைத் தீர்த்துக்கொள்ளப் பார்க்கிறது நெருப்பு

கொடும்பாவிகள் சிக்கவில்லை

ஏவப்பட்ட பேய்கள்
குற்றத்தை நிகழ்த்திவிட்டு
தடம் காட்டாதபடி பதுங்கிவிட்டன

கேட்கிறது
தீயில் வேகும்
கதாபாத்திரங்களின் அழுகுரல்கள்

வரலாற்றின் வலிகள்

எரிந்து கொண்டிருக்கிறது நூலகம்

உருவான முதல் நாளிலிருந்து
நூலகத்தின் வாசனையை
உணர்ந்த பெரியவர்
அழுது கொண்டிருக்கிறார்

புத்தகங்களை வெகுவேகமாய்
படிக்கிறது நெருப்பு

உதவி மறுக்கப்பட்ட நூலகம்
அனாதையைப் போல
பார்க்கிறது

புகையில்
கொஞ்சம் கொஞ்சமாய்
தொலைந்துகொண்டிருக்கிறது

மழை வந்து
மீதி பொக்கிஷங்களைக் காப்பாற்றிவிடாதா
பிரார்த்தனைகள் காற்றில் கலக்கின்றன

வானம் அசையக் காணோம்


இறந்து கிடக்கின்றன
உள் வசித்த புறாக்கள்

சூட்சியின் வியூகம்
அறிவு ராஜ்ஜியத்தை வீழ்த்தி இருக்கிறது

எரிந்து கொண்டிருக்கிறது நூலகம்

ஊடகங்கள் நூலகத்தின் இறுதிக் காட்சிகளை
பலகோணங்களில் காட்டுகின்றன
கண்ணீரும் கண்ணும்
அருகருகே இருப்பது போன்று
மிகத் துல்லியமாக
நேரடி ஒளிபரப்பாக

நூலகர் தப்பிவர விரும்பாமல்
நூலகத்தோடு தீ சமாதியானதாக
ஒரு தகவல் கசிகிறது

எரிந்து கொண்டிருக்கிறது நூலகம்

மூன்று தலைமுறை கண்ட நூலகம்
முடிந்துகொண்டிருக்கிறது

சதிகாரர்கள் பிடிக்கப்படுவார்கள்
மீண்டும் இதுபோல்
நிர்மாணிக்கப்படுமென்று
செய்திகள் உற்பத்தியாகின்றன

பலூன் வார்த்தைகள்
பஞ்சமின்றி பறக்கின்றன

எரிந்து கொண்டிருக்கிறது நூலகம்

புத்தகத்தைத் திருப்பி தரவந்த சிறுமி
அதைக் காப்பாற்றிவிட்ட பதட்டத்தில்
கைநடுங்க இறுக்கமாகப் பிடித்தபடி
பார்த்துக் கொண்டிருக்கிறாள்

புத்தகத்தின் அட்டையில்
ஒளிர்கிறது நூலகத்தின் பெயர்

பெயரற்ற பள்ளத்தாக்கு

இந்த பள்ளத்தாக்கில்
பனிமூடி இருக்கிறது

கை நீந்திப் பார்க்க
பூக்கள் சிக்குகின்றன

ஒரு பூவிலிருந்து
பட்டாம்பூச்சி பறந்தோடுகிறது
பிஞ்சு ஒளியை அசைத்தபடி

உள்ளிழுக்கும் மூச்சுக்கு
கிடைக்கின்றன
வனத்தின் வாசனைகள்

பழக்கமாகிவிட்டது
பள்ளத்தாக்கு

பள்ளத்தாக்கின் பெயரை
உரக்கச்சொல்லி
மலைகளுக்கு
அறிமுகப்படுத்த வேண்டும்

இதற்கு ஒரு
பெயர் வேண்டும்

நல்ல பெயராக

நழுவி மறைகின்றன
பெயர்கள்

கிடைக்காமலாப் போகும்
ஒரு நாள்

அனுபவ சித்தனின் குறிப்புகள்

242-

மண் பூசிய
பழத்தை எடுத்து
ஊதித் தின்றேன்

அருகில் வந்தவர்
அது நான்
எறிந்த கல்
வேண்டும் என்று
வாங்கிப்போனார்
கல் மனிதராக

ஊறும் சுவையின்
உள்ளிருந்தேன் நான்
பழத்தின் மரமாக

243-

சொல்லின்
விளிம்பில்
தொங்கும்
துளி

துளியில்
ஒளிரும்
பிரபஞ்சம்

பிரபஞ்சம்
குடிக்க
நீளும்
நாவு

விழுகிறது

துளி
சொல்

சொல்
துளி

இரண்டுமற்று
நான்

வனத்தின் புகைப்படம்

மேஜை மேலிருக்கும்
வனத்தின் புகைப்படம்
பார்த்துக்கொண்டே
வேலை செய்யலாம்
சிங்கத்தின் கர்ஜனையும்
வனத்தின் உள்ளிருந்து
வரக் கேட்கலாம்

பிறகு உன் சிறகு

அலகால்
கூண்டை உடை
கிளியே

பிறகு உன் சிறகு
காற்றில் எழுதும்
சுதந்திரத்தின் பாடலை

அனுபவ சித்தனின் குறிப்புகள்

235-

பிடிபடவே
தப்பித்தேன்
பிடிபடவும்
தப்பித்தேன்

236-

இரவின் பரணையில்
புணரும்
கனவுகள்

237--

ஓயாது குடித்தோம்
ஓய்ந்து போனோம்
ஆனாலும் பேசினர்
எனது நானும்
அவனது அவனும்

238-

நீ மெளனத்தின்
எந்த புள்ளியில்
இருக்கிறாய்

சின்னத் திருத்தம்
நான் மெளனத்தின்
புள்ளியாக இருக்கிறேன்

239-

நீ படிமமா
குறியீடா

நான் குறியீட்டின்
படிமம்

படிமத்தின்
குறியீடு

240-

வேண்டாத சொற்களைத்
தவிர்த்துப் பார்த்தேன்
சொற்களின் கடைசியில்
என்னையும் பார்த்தேன்

241-

எதுவுமில்லாதிருப்பதே
இருப்பதில் இருக்கும்
விஷேசம்

மகளின் மெழுகுவத்தி

மெழுகுவத்தி
வரைந்து கொண்டிருந்தாள் மகள்

கண்கள் ஒளிர
வண்ணம் பூசி
அழகாய்
நேர்த்தியாய்

திரியை வரைந்தபோது
இருளானது

ஆனாலும் தொடர்ந்தாள்

மின்சாரம் வந்து
பார்க்க
மின்னியது மெழுகுவத்தி

ஆடி அழைப்பதுபோல் திரி

ஆச்சர்யத்துடன்
கேட்டேன்

சொன்னாள்

எனக்கு மட்டும்
வெளிச்சம் காட்டுச்சு
மெழுகுவத்தி
அதுலயே வரைஞ்சி
முடிச்சிட்டேன்பா

காலம்

குவிந்து கிடந்த
புகைப்படங்களில்
கல்லெறிந்தேன்
உறைந்து போயிருந்த காலம்
அலையெழுப்பி
மறைந்து போனது

அனுபவ சித்தனின் குறிப்புகள்

232-

கிண்ணத்தின் விளிம்பிலிருந்து
ததும்பும் நீர் போல்
ததும்புகிறது மனது
மனதிலிருந்து

233-

உண்மைக்குள்
நுழைந்து கிடந்தேன்
பொய்கள்
மக்கி முடிய

வெளிவரலாம்
ஒரு நாள்

உண்மையின் துகளென
அல்லது
பொய்யின் உடலென

234-

வரியை
கவ்விப்போன
கனவை விரட்டினேன்
கனவைப் போட்டுவிட்டு
ஓடியது வரி

நட்பு

ஒதுங்கியபோது
பழைய நண்பனின்
ஞாபகம் வந்தது

பின் நிற்கும் வரை
மழை நண்பனாக இருந்தது

கடல் பார்த்தல்

இருளில்
கடல் பார்க்க
இருளெனக் கிடந்தது

பகலில்
கடல் பார்க்க
பகலெனத் தெரிந்தது

இரவுக்கும் பகலுக்கும்
நடுவில் வந்து
கால் நனைத்த அலை
கேட்டுப் போனது

கடலை நீ எப்போது
கடலாகப்
பார்க்கப் போகிறாய்

அனுபவ சித்தனின் குறிப்புகள்

228-

நகர்ந்து
நகர்ந்து

வந்து சேர்ந்த
இடத்திலிருந்து

நகர்ந்து
நகர்ந்து

நகர்ந்து
நகர்ந்து

சென்று சேர்ந்த
இடம் நகர்த்த

நகர்ந்து
நகர்ந்து

தொடர்ந்து
தொடர்ந்து

நகர்ந்து
நகர்ந்து

229-

கவிதைக்கு
வந்து சேராத வார்த்தையை
சிலுவையில் அறைந்தேன்

கசிந்த ரத்தத்தில்
என் வன்மம் அறிந்தேன்

230-

காலத்திலிருந்து
நீ எவ்வளவு கறப்பாய்
கேட்கிறது
வைக்கோல் கன்றுக்குட்டி

231-

நான் இல்லை
என்கிற இல்லையில்
இல்லாமல் இல்லை நான்

அனுபவ சித்தனின் குறிப்புகள்

226-

சுயம் பிளக்க
கிடந்தன
உடைந்த நான்கள்

227-

இருளின் கரி எடுத்து
என்ன எழுதுகிறாய்

ஒளியின் கருணையை

அனுபவ சித்தனின் குறிப்புகள்

224-

கேள்வியில்
தொங்கிய பதிலை
கேள்விக்குத் தெரியாமல்
எடுத்துக்கொண்டேன்

225-

இசை
எங்கிருக்கிறது
இசைக்கு வெளியில்

அனுபவ சித்தனின் குறிப்புகள்

223-

தாவோவிடம்
என் சமநிலைப்பற்றிக் கேட்டேன்

உன் இரு முனைகளிலும்
நீ ஒத்த பலத்துடன் இரு
தன்நிலை பழகியவுடன்
எடை மாற்றிக்கொள்வது பற்றி
யோசிக்கலாம் என்றார்

அவனும் நீங்களும்

அவனை எல்லோரும்
கல்லால் அடித்துக் கொன்றார்கள்

கடைசியாக
தூக்கிப் புதைக்க
அருகில் வந்தபோது
கொஞ்சம் உயிர் இருந்தது

அவன் கண்களால் சொன்னான்
இன்னும் ஒரு
கல் தேவை

தேடல்

கடலின் மேற்பரப்பில்
அமர இடம் தேடி
பறக்கிறது
ஒரு சிறு பறவை

பாவமாக இருந்தது

பின்னொரு நாள்
ஒரு மீன்குஞ்சிடம்
பேசிக்கொண்டிருந்தபோது
கவலையுடன் சொன்னேன்
அந்த பறவைப் பற்றி

நான்தான்
அந்த பறவை
அமர இடம் கிடைக்காததால்
மீனாகி
நீந்திக்கொண்டிருக்கிறேன்
எனச் சொல்லி
நீரைப் புன்னகைக்க வைத்தபடியே
மறைந்து போனது

இப்போது பார்க்க
கடலின் மேல்
எதுவுமில்லை


நடந்த போது
மனதின் இதத்தைப் போல
தொடங்கியது
மழை

மிச்ச நேரம்

பேஸ்புக்
ட்விட்டர்
வலைப்பக்கம்
இன்னபிற
இணைய தளங்களைத்
தாண்டி
மிஞ்சும் நேரம் கைப்பற்றி
அறை சிறையிலிருந்து
விடுபட்டு
காலாற நடந்து போய்
பார்த்து வர வேண்டும்
பனி பூத்த
புற்களையும்
நேசம் கலந்த
முகங்களையும்

அனுபவ சித்தனின் குறிப்புகள்

220-

மெளனமாகி விட்டது
உணரும்போதெல்லாம்
சத்தமாகி விடுகிறது

221-

கோழை வனம்
ஒரு நாள் ஆகும்
பாலை வனம்

222-

பார்க்கத் தொடங்கினேன்
பார்த்தவைகளிலிருந்து
பார்க்காதவைகளை

தீராதது

அழுத்தி எழுதிய
பெயரில் இருந்தது
அப்பாவின் அன்பு

கடிதம் படிக்க
இன்னும் கிட்டும்
தீராத சுவை

அனுபவ சித்தனின் குறிப்புகள்

218-

என் ஊனம் பெறும்
ஒரு நாள் ஞானம்
அதுவரை இது
யாத்திரை காலம்

219-

அறைக்கு வந்த குழந்தை
அள்ளிப் போகிறது
இருளை

அனுபவ சித்தனின் குறிப்புகள்

215-

உடலெங்கும்
காமத்தின் ஊழிக்கூத்து
திண்டாடுகிறான்
மனப்பாகன்

216-

கைதியிடம்
விடுதலை கேட்கிறது
சிறை

217-

அவர் வருவதற்காக
நான் காத்திருக்கிறேன்
நான் வருவதற்காக
அவர் காத்திருக்கிறார்
ஒருவரை ஒருவர்
பார்த்தபடி
காத்திருக்கிறோம்

நத்தையும் நானும்

நெடுஞ்சாலையைக்
கடக்கிறது நத்தை
பதட்டமின்றி

நெடுஞ்சாலையைக்
கடந்து முடிக்கிறது நத்தை
பதட்டமின்றி

நெடுஞ்சாலையைக்
கடந்து போகிறேன் நான்
பதட்டமின்றி

அனுபவ சித்தனின் குறிப்புகள்

214-

உடலைத் திறந்தேன்
புழுக்கம் வெளியேறியது
புழுக்கத்தை திறந்து
நான் வெளியேறினேன்

எதிர்பார்ப்பு

தொடர்ந்து வரும்
பயணியை
எதிர்பார்த்திருந்தாள்
அவள் உடலோடு
முடிந்து போயின
பயணங்கள்

சொன்னதில்லை

பெரிதாக ஒன்றும்
சொன்னதில்லை
கவிதையில்
ஆனாலும்
கவிதைகள் எப்போதும்
என்னைப் பார்த்ததில்லை
சிறுமையாய்

வனம்

அணில் விட்டுச் சென்ற
வனம்
அறையெங்கும்

அனுபவ சித்தனின் குறிப்புகள்

212-

சொல்லெடுத்து
தரும் சொல்
சொல்வதில்லை
சொல்லென்று

213-

சந்திக்கும் போதெல்லாம்
முடிவுக்கு வருகிறது
பிரிவு

ஒலிக் குறிப்புகள்

என்னிடம்
வனம் தந்தனுப்பிய
ஒலிக் குறிப்புகளை
வாங்கிய மகள்
குதூகலத்துடன்
இசையாக வாசித்தபோது
அதன் உச்சியிலிருந்து
விழத்தொடங்கியது
அருவி

அனுபவ சித்தனின் குறிப்புகள்

208-

கல் பறக்கிறது
எனச் சொன்ன தாளை
தூக்கிப் பார்த்தேன்
பாரமாக இருந்தது

209-

வயதின் மீதேறி
விளையாடும் நான்
குழந்தையாய்

210-

நின்றாலும்
இழுத்துப் போகும்
நடையின் நடை

211-

கையசைக்க
விடைபெறும்
ரயில்

அனுபவ சித்தனின் குறிப்புகள்

203-

உங்களின் நிறம்
என்ன என்று கேட்டார்
நிறங்களின் நிறம் என்றேன்
போய்விட்டார்

204-

மொழிகள் எதற்கு
கண் துளி
சொல்லும் அன்பு

205-

உள்ளோடும் நதி
நீச்சல் பழகும்
என்னிடம்

206-

மேடையை எதிர்பார்ப்பதில்லை
தனக்குள்
ஒத்திகை செய்பவன்

207-

ஒதுங்கி நின்றால்
ஒதுக்கப்படுவாய்
மையம் கைப்பற்று

நடந்து கொண்டிருப்பவன்

அவன் நடந்து கொண்டிருந்தான்

நடந்து நடந்து
நடந்து நடந்து

அவன் நடந்து கொண்டிருந்தான்

இருளில்
வெயிலில்
மழையில்
வனத்தில்
மலையில் என

அவன் நடந்து கொண்டேயிருந்தான்

நடந்து முடிக்கும்
தூரப் புள்ளிகளில்
தானே நின்று
தன்னை வரவேற்று
அனுப்பியபடி

வழித் தடங்களில்
வருபவர்களுக்கான
முகவரிகளை
விட்டுச் சென்றபடி

அவன் நடந்து கொண்டிருந்தான்

தன் கால்களுக்குள் நுழைந்து
இதயம் அடைந்து
மூளையிலிருந்து வெளியேறி
நின்று போகாத மந்திரத்தை
உச்சரித்தபடி

அவன் நடந்து கொண்டிருந்தான்

கடந்து கொண்டிருந்தான்

நீங்களும் அவனை
ஏதாவது ஒரு தருணத்தில்
பார்த்துவிட முடியும்

அல்லது

ஏதாவது ஒரு கணத்தில்
அவனாக மாறிவிட முடியும்

கூக்குரல்கள்

வேண்டான்டா
உன் அம்மாவ நீ கெடுப்பியா

உன் அக்காவ
நீ அழிப்பியாடா

உன் தங்கிச்சிய
இப்படிச் செய்வியா

அம்மாக்களும்
அக்காக்களும்
தங்கைகளும்
கற்பழிக்கப்பட்டார்கள்

கற்பழிப்பாளர்கள்
சமூக கெளவரவங்களோடு
இன்னபிற
செல்வாக்குகளோடு
வலம் வந்தனர்

இருளில்
இருளைப்போலவே
புதைந்து போயின
கூக்குரல்கள்

வார்த்தைகளும் மீன்குஞ்சுகளும்

ஆழ்ந்த தியானத்தில்
காற்றை உள்ளிழுத்தபோது
கூடவே போய்விட்டன
சில வார்த்தைகளும்

மீன்குஞ்சுகளைப் போல
சுற்றின வார்த்தைகள்

ஒரு மீன்குஞ்சு
மெல்ல நகர்ந்து
ரத்தத்தில் ஓடிய
கெட்ட கனவுகளை
உட்கொண்டது

ஒரு மீன்குஞ்சு
இதயத்தில் தங்கிக்கிடந்த
வன்மத்தை
எடுத்துக்கொண்டது

தலைக்கு வந்த ஒன்று
அங்கு படிந்து போயிருந்த
புராதன கோபங்களைத் தின்றது

தியானத்தின் மூச்சு நீள
உள் சென்ற வார்த்தைகள்
வெளி வந்து விழுந்தன
இறந்த மீன்குஞ்சுகளாய்

ஒன்று மட்டும்
காப்பாற்றச் சொல்லி
போராடியது

இறுதியில்
என் மீது ஒட்டியிருந்தது
அது வீசிச் சென்ற
மரணத்தின் எச்சில்

அனுபவ சித்தனின் குறிப்புகள்

201-

வாளின் கண்களால்
போரைப் பார்க்கிறேன்

202-

நான் உதிரி
உதிர்ந்து போனாலும்
மறைந்து போகாத
மகா உதிரி

அனுபவ சித்தனின் குறிப்புகள்

200-

மையப்புள்ளிகளை
மாற்றிக்கொண்டே இருக்கிறது
வட்டம்

வட்டங்களை
மாற்றிக்கொண்டே இருக்கிறேன்
நான்

என்னை
மாற்றிக்கொண்டே இருக்கிறது
பிரபஞ்சம்

பாவனை

கல்லெறிவதுபோல்
பாவனைச் செய்கிறது குழந்தை

வலிப்பதுபோல்
பாவனைச் செய்கிறேன் நான்

குழந்தை போனபின்
பார்த்தபடி நடந்தேன்
குவிந்து கிடந்த பாவனைகளை

பறவைகள்

1-

இல்லாதபோது
அலகால் கொத்தி
தா என
ராகம் எழுப்புகிறது
ஒரு பறவை

2-

துப்பாக்கியின் குறியை
மாற்றியபடியே பறக்கிறது
இறந்துபோக விரும்பாத
ஒரு பறவை

குழந்தைகள்

1-

குதிக்கும் போதெல்லாம்
ஆகாயத்தைக்
கையள்ளும் குழந்தை

2-

குழந்தையின் கையில்
குழந்தை போலிருக்கும்
நாய்க்குட்டியை
குழந்தைபோல்
கொஞ்ச ஆசை

கேட்டுக் கிடைத்தது
தோல்விதான்

கையசைத்துவிட்டு
ஓடுகிறாள் குழந்தை
தன் சொர்க்கத்தைத் தராமல்

அனுபவ சித்தனின் குறிப்புகள்

194-

மனிதனைத்
திறக்கும் சொல் ஒன்று
காலங்காலமாய்
பூட்டியே கிடக்கிறது
தன்னைத்
திறந்து கொள்ளத் தெரியாமல்

195-

கிடைக்காது என
நினைக்கும் போதெல்லாம்
கிடைத்து விடுகிறது
ஏதோ ஒன்று

196-

எழுதாத தாளில்
விரிகிறது
வானம்

197-

உங்கள் பின்னால்தான்
வந்து கொண்டிருக்கிறேன்
ஆனாலும்
உங்கள் முன்னால்
சென்று கொண்டிருக்கிறேன்

198-

நடந்து போனவர்களின்
சுவடுகளில்
படிக்க எதுவுமே இல்லை

199-

கவிதையின் அடிவாரத்தில்
படுத்துக்கிடந்தேன்
நிம்மதியைப் போர்த்தியபடி

பார்வைகள்

நீங்கள் பார்த்துக்கொண்டிருக்கும் தாஜ்மஹாலை
எனக்குச் சொல்ல முடியுமா
உங்கள் வார்த்தைகளின் வழியே
அதைப் பார்த்துக் கொள்கிறேன் என்றார்
பக்கத்திலிருந்த பார்வையற்ற தோழர்

என் அறிவுக்கெட்டியபடி
அந்த அதிசயத்தைச்
சொல்ல ஆரம்பித்தேன்

இசை கேட்பது போல
அவர் தலையசைத்து
உள்வாங்கியதை
பிறகு சொல்லி
சரிபார்த்துக் கொண்டார்

அவர் வார்த்தைகளின் பார்வையில்
என்னால் தரிசிக்க முடிந்தது
இன்னொரு தாஜ்மஹாலை

அனுபவ சித்தனின் குறிப்புகள்

193-

ஜன்னலோரம்
அமர்ந்த பறவையை
விரட்டிவிட்டு
எல்லோருக்கும்
இடம் வேண்டும்
என்று எழுத
எப்படி மனம் வந்தது

அனுபவ சித்தனின் குறிப்புகள்

190-

போய்விட்டார்கள்
காலடித்தடங்களில்
நெளிகிறது மொழி

191-

நடந்து முடிந்த
அறுநூற்று அறுபத்தாறு
குற்றங்களையும் செய்த
குற்றவாளி நான்தான்
என்னை விட்டுவிட்டு
அறுநூற்று அறுபத்தியேழாவது
நபரை கைது செய்து
விசாரித்துக் கொண்டிருக்கிறீர்கள்
ஏதோ கிடைத்துவிடும் என்ற
அதீத நம்பிக்கையில்

192-

ஓவியம் என்று
சொல்லாதீர்கள்
ஒற்றை கோட்டை
ஒற்றைக் கோடு
என்றே சொல்லுங்கள்

வானத்தில்

வானத்தில் படுத்திருந்தேன்
எழுந்தபோது ஒட்டியிருந்தன
ஒன்றிரண்டு நட்சத்திரங்கள்
உதறிவிட்டுத் திரும்பினேன்

அனுபவ சித்தனின் குறிப்புகள்

186-

கனவில் மின்னியது
அன்பின்
சொல் ஒன்று

187-

திரும்பிப் பார்த்தேன்
வயதுகளின் பாதையில்
ஓடிவந்தபடி ஒரு குழந்தை

188-

வானம் கூப்பிட்டும்
போகவில்லை
கனவில் விழுந்த நட்சத்திரம்

189-

நேரம் இல்லை
நினைவுகளில்
சந்திப்பவர்கள்

சிலருக்கு...

உங்களுக்கு என்ன
வேண்டுமானாலும் கேளுங்கள்
அதைத் தருகிறேன் என்றார்
ஒன்றுமே இல்லாதிருந்தவர்

விநோதமாக
அவரைப் பார்த்து
கடந்தனர் எல்லோரும்

சிரித்தபடியே
யாருக்கும் எதுவும் தேவையில்லை
நானே வைத்துக் கொள்கிறேன் என்றார்

கடந்து போனவர்களில் சிலர்
அவர் சொன்னதைச்
சொல்லிப் பார்த்துக் கொண்டனர்

உங்களுக்கு என்ன
வேண்டுமானாலும் கேளுங்கள்
அதைத் தருகிறேன்

சிலருக்குத் தந்தது போலிருந்தது

சிலருக்குப் பெற்றது போலிருந்தது

அனுபவ சித்தனின் குறிப்புகள்

183-

என்போல்
ஒற்றைக் கிளையில்
மதிய காகம்

184-

கதை சொன்ன குருவி
பறந்து போனது
என்னையும் கதாபாத்திரமாய்
எடுத்துக் கொண்டு

185-

சுற்றிலும் நாடகங்கள்
என் வேடத்தை
பலப்படுத்த வேண்டும்

காற்றில் தைத்த சட்டை

பறந்து கொண்டிருந்த
சிறுமி சொன்னாள்
நான் காற்றைத் தைத்து
சட்டையாகப் போட்டிருக்கிறேன்

ஒரு பறவையின் லாவகம்
பறத்தலில் தெரிந்தது

அவள் சொன்ன
காற்றுச் சட்டை
பிம்பத்திற்குள் சிக்காமல்
நழுவியது

மறுநாள்
பள்ளிக்குச் சென்ற சிறுமியை
வழியில் பார்த்துக் கேட்டேன்
காற்றுச் சட்டை
எங்கே என்று

அது காற்றிலேயே இருக்கிறது
நான் பறக்க நினைக்கும்போது
அதில் புகுந்து கொள்வேன்
சிரித்து சொல்லியபடியே
ஓடிப்போனாள்

ஓடினாளா பறந்தாளா
தெரியவில்லை

(கிருத்திகாவிற்கு)

அனுபவ சித்தனின் குறிப்புகள்

182-

வன்மம் வளர்க்கும் விலங்கு
உடலெங்கும் திரிகிறது
என் பேர் சொல்லி

அனுபவ சித்தனின் குறிப்புகள்

181-

யாருமில்லாத கூண்டின்
ஜன்னலோரம் அமர்ந்து
என் பாவங்களைச்
சொல்லிக் கொண்டிருந்தேன்

மணிசத்தத்தில்
நான் சொல்வது
கேட்காமல் போய்விடுமோ
என்ற அச்சம் வேறு

குரலில்
சத்தம் கூடியது

பாவங்களை
சொல்லிக்கொண்டே வர
சேர்ந்து கொண்டன
மறைந்து போனவைகளும்

யாருமில்லாத கூண்டின்
ஜன்னலோரம் அமர்ந்திருக்க
என் பாவங்கள் என்னைச்
சொல்லிக் கொண்டே வந்தன

மூச்சுவாங்கிய நிலையில்
பாவங்கள் சொல்லி
முடிக்கப் பட்டனவா
என்று படபடத்தபோது
கூண்டு மெல்ல
சவப்பெட்டியாகி
என்னை
விழுங்கிக் கொண்டது

ஓடியவர்கள்

ஓடி விட்டனர்
மழையை ஏமாற்றாமல்
நனைந்தது குழந்தை

இசையின் பெயர்

மெல்லிய விசிலுடன்
சென்ற இளைஞனிடம்
அது பற்றிக்
கேட்க நினைத்தேன்

அவனைத் தடை
செய்ய விரும்பாமல்
நம்பிக்கை இசை
என்று பெயர்
சூட்டிப் பார்த்தேன்
சரியாக இருந்தது

அப்போது
என் உதட்டில்
ஊர்ந்த அவன்
விசில் சத்தம்
அதை ஆமோதித்தது

அனுபவ சித்தனின் குறிப்புகள்

180-

யாரிடமும்
சொல்ல முடியாத
ரகசியத்தை
சொல்லிக் கொண்டிருந்தேன்
என்னிடம்

குழந்தையின் ஓவியங்கள்

நான் குழந்தையின் கையிலுள்ள
பென்சிலாக மாறினேன்

குழந்தை வரைந்தது

கூர்ந்து
கவனித்து
முகத்தை
முன்கொண்டுபோய்
அதுவே
ஒரு ஓவியமாகி
வரைந்தது

குழந்தையின்
கண்களுக்கும் உதட்டுக்கும்
இடையில் பரவியது
வரைந்து முடித்த
புன்னகை

பின் பென்சிலை
முத்தமிட்டு
கீழே வைத்து
வேறு ஒன்றை எடுத்து
இன்னொரு உலகத்திற்கு
செல்லத் தயாரானது

வரைந்த தாளிலிருந்து
வெளியேறினேன் நான்
குழந்தைக்கு நன்றியை
வண்ணங்களாகத்
தூவிவிட்டு

அனுபவ சித்தனின் குறிப்புகள்

177-

என்னைத் திறந்து
வெளியேறிய கனவில்
கலந்திருந்தன
கையள்ளக்கூடிய
கவிதைகளும்

178-

அழவேண்டும்
போலிருக்கிறது
எனக்கும் தெரியாமல்

179-

ஒளி வீசும் வார்த்தைகளால்
இருளை எழுதிக்கொண்டிருந்தவனை
ஒரு இரவில் சந்தித்தேன்

நான் இரவிலிருந்தேன்
அவன் பகலில் இருந்தான்

அனுபவ சித்தனின் குறிப்புகள்

173-

அறையிலிருந்த
ஒவ்வொருவரும்
தங்களுக்குள் ரகசியமாக
சொல்லிக் கொண்டார்கள்
என்னைத் தவிர
எல்லோரும்
இறந்து போவார்கள்

174-

உடலில் வசிக்கிறது
உயிர்
உயிரில் வசிக்கிறது
மரணம்

175-

கை அள்ளிய
இருளை இறுக்க
மூச்சற்றுப் போகும் பயம்

176-
உங்களது பாத்திரம்
நிரம்பி வழிவது குறித்து
உங்களுக்கு ஆனந்தம்

எனது பாத்திரம்
நிரம்பாமல் வழிவது குறித்து
எனக்குப் பேரானந்தம்

நானும் நானும்

தூங்கும்போது
வந்த கனவில்
தற்கொலை செய்திருந்தேன்
விடிந்தபின்
இறந்துகிடந்த கனவை
தூக்கிப் போட்டுவிட்டு
வேலையைப்
பார்க்கத் தொடங்கினேன்

கேட்டபடி

அவர்கள் கேட்டபடி
திருத்தி எழுதிய கவிதையில்
ஊனம் மறைந்திருந்தது
உண்மை ஊனமாகி இருந்தது

தேடுதல்

மண்புழுவைப் பற்றி
எழுதி வரச்சொன்னார் டீச்சர்
குழந்தையிடம்

மண்ணில் தொலைந்த
மண்புழுவை
‘நெட்’டில்
தேடிக்கொண்டிருந்தார் அப்பா

அனுபவ சித்தனின் குறிப்புகள்

171-

நான்கள்
மொய்த்துக் கிடக்கும் என்னை
விடுவிப்பதெப்படி

172-

கிடைக்காது எனப்போட்டுப்
பூட்டி வைத்த கேள்விகள்
பெட்டியை சவப்பெட்டியாக்கி
உடைத்து வெளியேறின
கிடைக்கும் பதில்கள் என்ற
பாய்ச்சலுடன்

கண்ணீரில் வரைதல்

கண்ணீரை
எந்த வண்ணத்தில்
வரைந்தாலும்
ஓவியமாகவே இருந்தது

கண்ணீரில்
வரைந்தபோது
ஓவியம் வெளியேறியது

சைத்தான்

பாட்டிலில்
அடைக்கப்பட்ட சைத்தானைப்
போட்டுடைத்தேன்

உடைந்து போன சைத்தான்
ஒன்றாகிப் போனது
உடையாத பாட்டிலுக்கு
ஒரு முத்தம் வைத்துவிட்டு

அந்த வரி

அந்த ஆங்கில வரியை
மொழிபெயர்த்தபோது
அழகாக வந்திருந்தது

துப்பாக்கியைக் கொல்லுங்கள்

சுட்டுக் கொண்டிருந்தவன்
சரியாக இல்லை என்றான்

இறந்து கொண்டிருந்தவன்
கேட்கவில்லை என்றான்

அனுபவ சித்தனின் குறிப்புகள்

168-

என்னைத் தேடாதீர்கள்
எழுதும் கவிதை
வழி நுழைந்து
வெளியேறி விடுவேன்

169-

பூமியில் பறக்கவும்
வானில் நடக்கவும்
கற்றுக் கொடுக்கின்றன
குதிரையின் கால்களும்
பறவையின் சிறகுகளும்

170-

இந்த தோல்விகளை வைத்து
ஆடப்போகும் விளையாட்டில்
ஜெயித்துவிட முடியும்

அனுபவ சித்தனின் குறிப்புகள்

164-

மை இருட்டில்
மெய் இருட்டை எழுத
போனது
பொய் இருட்டு

165-

இல்லாதது எதுவும்
இருப்பதில்லை
நுரைத்த வார்த்தைகளை
துப்பிவிட்டு நடந்தேன்
எச்சில் பொய்களுடன்

166-

காற்றை
உளியால்
செதுக்கும் போதெல்லாம்
உதிர்கிறது இசை
சிலையென

167-

மரணத்தை சிறிதளவு
ஒரு மாத்திரையைப் போல
விழுங்கிவிட்டுப் படுத்தேன்
நன்றாகத் தூக்கம் வந்தது

வெட்டி எறியும் வார்த்தைகள்

கைவீசி
நீங்கள் வெட்டி எறியும்
வார்த்தைகளுக்கிடையில்
ஒளிந்திருக்கும் பாம்பு
கூர்ந்து பார்க்கிறது
உங்கள் கைகளைக் கொத்த

வாழ்விடம்

தான் இறந்து போனது தெரியாமல்
அவன் திரும்பிக் கொண்டிருந்தான்
வாழ்விடம் நோக்கி

இழுத்தல்

கதாபாத்திரங்கள் எல்லோரும்
கதைக்குள் இழுத்து
என்னையும் ஒரு
பாத்திரமாக்கிவிட்டார்கள்

யாராவது
படிக்கும்போதுதான்
சொல்ல வேண்டும்

தயவு செய்து
என்னை வெளியில்
எடுங்கள் என்று

அனுபவ சித்தனின் குறிப்புகள்

160-

காலங்கள்
ஓடிவிட்டதை நினைத்துக்
கவலைப்படுகிறீர்களா

இல்லை காலங்களோடு
ஓடிக்கொண்டிருப்பதை நினைத்து
சந்தோஷப்படுகிறேன்

161-

என்னுடன் யாருமில்லை
இந்த வரி தந்த கலக்கம்
அவர்களுடன் நானிருக்கிறேன்
என்று மாற்றியபோது
இல்லாமல் போனது

162-

யார்கூடி நகர்த்த
தேருக்கடியில்
நசுங்கிய காலம்

163-

தூண்டிலில் சிக்கிய
மீனின் கண்களில்
விடை பெறும் நதி

அனுபவ சித்தனின் குறிப்புகள்

156-

கண்களில்
குவிந்து கிடக்கும் தைரியம்
போ எனச் சொல்லி
வெளியேற்றுகிறது
கையாலாகாத கண்ணீரை

157-

தயங்கி தயங்கி
பிரார்த்தனையைச் சொன்னேன்
போயிருந்தார் கடவுள்

158-

இந்த சிறையிலிருந்து
வெளியே
வந்தபோதுதான்
நிறைய சிறைகளுக்குள்
என்னை பூட்டி வைத்திருப்பது
தெரிய வந்தது

159-

பெருங்காட்டை
தரிசித்து
வெளிவந்தேன்
உள்ளங்கையில்
பூத்திருந்தது
மூலிகைச் செடி

மாமிசம்

உன் ஈர நிர்வாணம்
என் கண்களின் உடை

இந்த வரியில்
ஒட்டி இருந்த
மாமிசத்தில்
மொய்த்த ஈக்களில்
தனிப்பெரும்
ஈயாய் நான்

கடவுளுடன் உரையாடல்

கடவுளிடம்
என் டேட் ஆப் டெத்
பற்றிக் கேட்டேன்

சிரித்தார்

மீண்டும் கேட்டேன்

சிலதை ரசிக்கப் பழகு
சிலதை ஒதுக்கப் பழகு
சிலதை விரும்பப் பழகு
சிலதைப் பார்க்கப் பழகு

சொல்லிக் கொண்டே சென்றார்

மீண்டும் என்
சாவு தேதி குறித்து
சத்தமாய்க் கேட்டேன்

சொன்னார்

சிலதை
தெரிந்து கொள்ளாதிருக்கப் பழகு

அந்த அசரீரியோடு
முடிந்து போனது
கடவுளுக்கும் எனக்குமான
உரையாடல்

அனுபவ சித்தனின் குறிப்புகள்

151-

என் பாத்திரத்தில்
மழை
உங்கள் பாத்திரத்தில்
உணவு
அதனாலென்ன

152-

யாரும் என்னைத் தேடாதீர்கள்
ஜென் கவிதைகளில்
என்னைத் தேடுகிறேன்

153-

அவன் கனவில்
ஒரு கத்தியை
சொருகிவிட்டுப் படுத்தான்
காலையில் இறந்து கிடந்தான்

154-

மலைப் பாம்பை
விழுங்கிய எறும்பு
எறும்பாகவே நகர்கிறது

155-

வலி விழுங்கு
கண்ணீர் குடி
யுத்தம் கையெடு

வேர் கொண்டான்

மேடை ஏறி
பின் பக்கம் போய்
வேஷம் போட்டிருந்தவரை
உற்றுப் பார்த்து
அவர் கேட்டார்
நீங்க கந்தசாமிதானே

அவர் சொன்னார்
இந்த கதாபாத்திரத்தின் பேரு
வேர் கொண்டான்
அது மட்டும்தான்
இப்போது
எனக்குத் தெரியும்

ஆதி ஒளி

மூதாட்டியை
கொல்ல வந்தது பாம்பு

அதைப் பார்த்து சிரித்து
புரண்டு படுத்தாள் பாட்டி

அவள் கனவிலிருந்து
போகிறது பாம்பு
சிறகை விரித்து
பறவையாய் ஆகி

ஆதி ஒளியை
தரிசித்தபடி

அனுபவ சித்தனின் குறிப்புகள்

146-

சிறைபட
உணர்கிறேன்
விடுதலை

147-

யாரும் கவனிக்காத
தப்பை செய்தேன்
நான் கவனிக்க

148-

வெற்றுப் பாத்திரத்தில்
நிரம்புகிறது இசை
மழை

149-

இமை மூடி
திற
தூக்கம் முடி

150-

என் கால்களின்
மேலே இருப்பது
நானல்ல
ஒரு உலகம்

கல் புத்தகம்

வலிக்கவில்லை
நீ எறிந்த கல்
நிறைய பக்கங்கள் கொண்டது
படித்துக் கொண்டிருக்கிறேன்

கற்றுத் தந்தவை

நகரவாசியானவன்
கிராம ஆசிரியருக்கு
விரிவாக
எழுதிய கடிதத்தை
இப்படி முடித்திருந்தான்

அய்யா
நீங்கள் கற்றுத் தந்தவை
இன்னும்
கற்றுக் கொடுக்கின்றன

குரங்குகள்

உங்கள் குரங்கு
என் மேலேறி
விளையாடுகிறது
தூக்கிப் போங்கள் என்றேன்
அவரிடம்

எதுவுமில்லையே என்றார்

பார்த்தேன்
எதுவுமில்லை

ஆனாலும்
விளையாடியது குரங்கு
அவர் பெயரை
என் பெயரை
யார் யார் பெயரையோ
சொல்லியபடி

அனுபவ சித்தனின் குறிப்புகள்

143-

நான் தேடி வந்தவன்
கூட்டத்தில் இல்லை
என்னைத் தேடி
வந்தவன் இருந்தான்

144-

யாரும் காப்பாற்றக் காணோம்
சொல்லிடுக்கில்
சிக்கிக் கொண்ட மெளனம்

145-

சில உரையாடல்களுக்கு
நடுவில்
இறந்து போகின்றன
பல உரையாடல்கள்

ஏறுதல்

மலையில்
ஏறுவது போல்
கவிதையில்
ஏறியது எறும்பு

மலை உச்சியிலிருந்து
தொங்குவது போல்
எறும்பின் காலடியில்
தொங்கியது கவிதை

காலம்

குளிர் சாதன பெட்டிக்குள்
வைத்திருந்த காலத்தை
எடுத்துப் பார்த்தேன்
உள்ளிருந்த மீன்கள்
தின்றது போக
மீதி இருந்தது
பிணவாடை அடிக்க

இறந்து போன காலம்
இன்னொரு முறை
இறந்து போயிருந்தது

ரத்த சிவப்புள்ள ஆப்பிள்கள்

ரத்த சிவப்புள்ள ஆப்பிளை
ரத்த சிவப்புள்ள மனிதன்
ரத்த சிவப்புள்ள காரின் மேல் சாய்ந்து
கடித்துத் தின்கிறான்
ரத்த சிவப்பில்லாத சிறுமி
பார்த்தபடி இருக்க

ரத்த சிவப்பான கண்கள் கொண்டவன்
ரத்த சிவப்பான குத்திய கத்தியை எடுக்கிறான்
ரத்த சிவப்புள்ள மனிதனின்
வயிற்றிலிருந்து
விழுந்து கொண்டிருக்கின்றன
ரத்த சிவப்புள்ள ஆப்பிள்கள்

குட்டிகள்

மழையில் நனையும்
நாய்க்குட்டியைத்
தூக்கி வருகிறேன்
கூடவே வருகின்றன
மழைக் குட்டிகளும்

விடுதல்

மனநிலை பிசகியவன் என்று
அவனைச் சொன்னார்கள்
அவன் மழையிடம்
சொன்னான்
அவர்கள் பேசுவதை
நீ கழுவி விடு
நான் மறந்து விடுகிறேன்

அனுபவ சித்தனின் குறிப்புகள்

139-

கல்லாக என்னை
எறிந்து எறிந்து
மலையானேன்

140-

புதிதாக
பிறந்து கொண்டே இருப்பதால்
அடிக்கடி
இறந்து போவது
பிடிக்கிறது

141-

வலிகளை
கொண்டாடு
கண்ணீரில்
நிறங்கள் எடு

142-

என்னால் மட்டுமே
வீழ்த்த இயலும்
என்னை

ஆடுதல்

தூக்கு கயிறை
ஊஞ்சலாக்கு
வரியில் ஆடியது கவிதை

அனுபவ சித்தனின் குறிப்புகள்

136-

அவள் கண்களில்
நீளமான கதை
கண்ணீரில் கிடைத்தது
சில குறிப்புகள் மட்டுமே

137-

அமர்ந்து போன
கிளையில் அசைகிறது
பறவையின் நன்றி

138-

இருளில் கேட்கிறது
அனாதை இருட்டின்
கதைகள்

ஏணிகள்

குழந்தை ஏணி வரைய
அப்பா ஏணி
செய்து கொண்டிருந்தார்

உள்ளிருந்து சாப்பிட
அழைப்பு வர
இருவரும் போனார்கள்

அப்பாவின் ஏணி
குழந்தையின் ஏணியில் ஏறி
விளையாடிக் கொண்டிருந்தது
அவர்கள் வரும் வரை

அனுபவ சித்தனின் குறிப்புகள்

134-

எனக்குள் இருக்கும்
கடவுளைக் காட்டும்
கடவுளைக் காண்பது எக்கணம்

135-

ஐயாயிரம் வரிகள்
எழுதிய பிறகு
அவன் சொன்னான்
என் முதல் வரியை
இப்போது
எழுதத் தொடங்குகிறேன்

எதிர்பாராதது

எதிர்பார்த்தது போல
எதிர்பார்த்த நண்பர்
எதிரே வந்தார்

எதிர்பாராத
சைகை செய்து
வேகமாகி
மறைந்து போனார்

முடிவற்ற தெருக்கள்
பார்த்துக் கொண்டிருந்தன

புதிர் நிறைந்த மனிதர்களையும்
புதிது புதிதான
விசித்திரங்களையும்

சிறகின் மேல்

உன் குரல்
ஒரு பட்டாம் பூச்சியின்
சிறகின் மேல்

பிடிக்க முயல
குரலிலிருந்து
பறந்தது பட்டாம் பூச்சி
இசையெழுப்பி

அனுபவ சித்தனின் குறிப்புகள்

130-

குமிழ் மேல்
நின்று
குமிழை
உடைக்காமல்
குமிழைப் பார்க்கிறது
மற்றொரு குமிழ்

131-

எப்படியும்
உங்களுக்குக் கிடைக்கலாம்
எனதுடல்
எனது கனவை
அடைய
பலநூறு ஆண்டுகள் ஆகும்
உங்களுக்கு

132-

நிகழாது போன
உரையாடலுக்குள்
தழைத்திருக்கிறது மொழி

133-

எல்லோரும் நசுக்க
யாரிடமும் சாகாமல்
ஊர்ந்து கொண்டே போகிறது
பல காலங்களாய்
எறும்பு

அதே பறவை

நான் வரும்போது
துடித்துக் கொண்டிருந்த பறவை
வீடு போய் சேர்வதற்குள்
இறந்து போகலாம்
உன் சாவு சிந்தனை விடு
திரும்ப போய்ப்பார்
உன்னைப் போன்றவர்களுக்கு
குருதியில்
ஏதாவது செய்தி
வைத்துவிட்டு
தொலைவாகி இருக்கலாம்
அதே பறவை
தன் அலகால்
மரணம் தின்ற
மதர்ப்புடன்

அனுபவ சித்தனின் குறிப்புகள்

126-

அன்பால் யாராவது
நகர்த்தி இருக்கலாம் என்றது
அருகில் வந்திருந்த மலை

127-

ஆகாரத்தை மறுத்த
கூண்டு பறவையின்
கண்களில் படிக்க முடிந்தது

சுதந்திரம் எனதுணவு
அதைத் தா

128-

யாரெனும்
கண்டெடுக்கக்கூடும்
என் பால்யத்தை
எனக்கேத் தெரியாமல்

129-

நம் அருகில்
இருக்கும் தூரங்களை
எப்படிக் கடப்பது

அனுபவ சித்தனின் குறிப்புகள்

123-

கதவை திறந்து பார்க்க
பூதம் நின்றது
அதன் கையில்
என் முகவரி இருந்தது
யாரென்று கேட்க
உனது பொய் என்றது

124-

எழுத எதுவும்
கிடைக்கக் காணோம்
திரும்ப சீவுகிறேன் பென்சிலை

125-


இங்கிருந்த என்னை
காணவில்லை என்றார் ஒருவர்

அதோ அங்கிருக்கிறாரே
அவரா என்றேன்

கேட்டு வருகிறேன்
என்று போனார்

நான் காணாமல் போனேன்

கப்பல்கள்

கப்பல்கள்
வழி தெரியாமல்
இருளில் நிற்கின்றன என்றேன்

தேவதை சிரிப்புடன்
பார்த்த சிறுமி
நோட்டை எடுத்து
கலங்கரை விளக்கை
வரைந்தாள்

கப்பல்கள்
ஒளி பெற்று
வழி பார்த்துப் புறப்பட்டன

பின் ஓவிய நோட்டை மூடி
பையில் வைத்து
பள்ளிக்கூடம் போனாள்

அவளுக்குத் தெரியாமல்
அவளைத் தொடர்ந்தன
கப்பல்களும்

அனுபவ சித்தனின் குறிப்புகள்

120-

சூன்யத்தில் சுட்டுக்கொண்ட
விரல் நுனியில்
காலத்தின் சாம்பல்

121-

எறிந்த சொற்கள்
சேர்ந்து கற்களாச்சி

கற்கள் எல்லாம்
குவிஞ்சி மலையுமாச்சி

மலையுச்சி நின்று பார்க்க
அமைதி வெளி
தெரியலாச்சி

122-

தோற்றுப் போனவன் இசைக்கிறான்
தோற்கக்கூடாது என்ற பாடலை
மேலும் சுதி சேர்த்து
தலை நிமிர்ந்து
உலகம் பார்த்து

கனவில்

யார் கனவென்று
தெரியவில்லை
வீதியில் கிடந்து
துடிக்கிறது
விட்டுப் போனவன்
தேடக்கூடும்
இக் கனவை
வேறொரு கனவில்

(14.07.2010 ஆனந்த விகடன் இதழில்
பிரசுரமானது)

திரும்புதல்

அடிக்கடி குழந்தை கேட்பாள்
இந்த மீன் தொட்டி மீன்களை
கடலில் விட்டுவிடலாமா என்று

கடல் மீன்களின் தாய்வீடு
மீன்களின் நீர் விளையாட்டுத் திடல்
என்று அவளுக்கு
கதை சொல்லும் போது
குறிப்பிட்டது
அப்படியே தங்கிவிட
ஒரு நாள் கேட்டாள்

மீன் தொட்டியில
நகர்ந்து போவுது
கடல்ல விட்டா
ஓடும் இல்ல

அவள் விருப்பப்படியே
முடிவு செய்து
கவனமாய் கொண்டுபோய்
மீன் தொட்டியை
கரையில் வைத்து
எல்லா மீன்களையும்
வழி அனுப்பி வைத்தோம்

ரொம்ப தூரம் போயி
விளையாடுங்க எனச்சொல்லி
குதித்தபடியே கடலுக்கு
கையசைத்தாள் குழந்தை

அலை பதிலுக்கு
தலை அசைத்தது

மீன் தொட்டியில்
நிரம்பி இருந்தது
கடலின் நன்றி

பூக்களின் வரிசை

குழந்தை தனக்குத் தெரிந்த
பூக்களின் பெயர்களைச்
சொல்லிக்கொண்டே வந்தது

நினைவில்
வரிசை தடுமாறியபோது
பூக்களோடு சேர்த்துக் கொண்டது
தன் பெயரையும்

சொல்லி முடித்த நிம்மதியில்
புன்னகையுடன் பார்த்தது

குழந்தையின் பெயரில்
சேர்ந்திருந்தது
எல்லா பூக்களின் வாசமும்

(கல்கி,08.08.2010 இதழில்
பிரசுரமானது)

அனுபவ சித்தனின் குறிப்புகள்

116-

மேலேறிச் செல்லும்
எறும்பைப் பார்க்க
மேலேறிச் செல்லும் பார்வையும்

117-

மறந்தே போயிற்று
மறந்ததை நினைக்க
மறந்தே போயிற்று

118-

கைமாறி கைமாறி
கை சேர்ந்த கனவு
கண்ணீரைப் பேசலாச்சே
கண்ணீரைப் பேசி
கண்ணீரைப் பேசி
கை கனவு கரைஞ்சிப் போச்சே

119-

விடுபட விடுபட
விடுபடும் எல்லாம்
விடுபட்டு விடுபட்டு
சிறைபடும் எல்லாம்

கிடைத்து விட்டது

இன்னும் பெயரிடாத
என் புதிய நாயுடன்
கடற்கரையில்
நடந்து கொண்டிருந்தேன்

சிநேகமாக வந்தது
கடலைப் பார்த்தது
கை கயிற்றை
சற்றே விட
கூடுதல் சுதந்திரத்துடன்
ஓடிப்போய்
மண்ணைக்கீறி விளையாடியது
நண்டைப் பார்த்து மிரண்டது
ஒளி வாங்கி ஓடியது
பின் என்னோடு வந்து
சேர்ந்து கொண்டது

வீடு திரும்புகையில்
உனக்கு என்ன பெயர்
வைக்கலாமென்று
அதனிடம் கேட்டேன்
குரைத்தது

அந்த சத்தத்திலிருந்து
விழுந்த சொற்களில்
எதுவும் பெயர்
ஒலிக்கவில்லை

கயிற்றின் அதிர்வு
கைக்கு இதமாக இருந்தது

நாய் கதாபாத்திரங்கள் வரும்
கதைகளினூடே போய்
ஏதாவது பெயர் கிடைக்குமா என
பார்த்து திரும்பியது மனது

வைக்கப்போகும் பெயருக்கு
ஒரு விஷேசம்
தேவைப் பட்டது

நல்ல பெயர்
கிடைக்கும் வரை
காத்திருக்க வேண்டியதுதான்

அதுவரை பெயரிடப்படாமல்
கழியட்டும் நாட்கள் என்று
நினைத்தபடி பார்க்க
வேகமாக சாலை கடந்த நாயை
டேய் அன்பு
எனச் சத்தமிட்டேன்

அழகாக ஓடி வந்து
காலை நக்கியது

கிடைத்து விட்டது

எனக்குப் பெயரும்
அதற்கு நானும்

அனுபவ சித்தனின் குறிப்புகள்

111-

புதிய கண்ணீர்
பழைய வலிகள்
இதற்குத் தெரியாது

112-

நான்கள்
முன்னாலும் பின்னாலும்
வரிசையில் நான்

113-

மரணம் போல்
வாழ வேண்டும்
அமைதியாக

114-

எலும்புக்கூட்டை
சுடுகிறது குழந்தை
வெளியேறுகிறது உயிர்
துப்பாக்கியிலிருந்து

115-

யாருமில்லை
கனவில் நிலவுகளை
கொட்டும் இரவு

...?

அவனை கல்லால்
அடித்துக் கொல்ல வேண்டும்
தயாராக இருக்கிறீர்களா

ஆமாம்

அவன் உங்களில்தான் இருக்கிறான்
எங்கே பார்ப்போம்

மொத்த கற்களும் பாய்ந்தன
மொத்த பேரும் வீழ்ந்தார்கள்

அனுபவ சித்தனின் குறிப்புகள்

106-

மனம் கண்ட வலி
உருள்கிறது பந்தென
கால் உதைத்த பந்து
உடைகிறது பனியென

107-

பறவையோடு நண்பனானேன்
பறப்பதும்
நட்பாயிற்று

108-

இன்று நான்
எந்த எறும்பையும்
கொல்லவில்லை
இதோ என் கையில்
ஊர்ந்து செல்லும்
இந்த எறும்பு உட்பட

109-

என்ன வேண்டும் என்று
எனக்குத் தெரியவில்லை
என்பது கூட
எனக்குத் தெரியவில்லை

110-

என்னைத் தின்னத்தொடங்கிய கனவு
அதிகாலையில்
ஒப்படைத்துப் போனது முழுமையாய்

விரல்களுக்கிடையில்...

விரல்களுக்கிடையில் பென்சிலை
சுழற்றுகிறாள் சிறுமி
பென்சிலுக்குள் இருந்து
பிளிறும் சத்தம் கேட்க
வரையத் தொடங்குகிறாள் யானையை
தும்பிக்கை பாய்ச்சலுடன்

அனுபவ சித்தனின் குறிப்புகள்

101-

எந்த கல்லறையிலும்
நான் இல்லை
திரும்புகிறேன் ஏமாற்றத்துடன்

102-

ஜென் தோட்டத்தில்
வண்ணத்துப்பூச்சி
அழைக்கிறது என்னை

103-

வழிப்போக்கன் பாடலில்
விழித்தெழுகின்றன
சாலைகள்

104-

இறந்த மீனுக்குள்
இறந்து போயிருந்தது
கொஞ்சம் கடலும்

105-

ஆழ்மனத்தில்
மிதக்கும் இலை
நான்தான்

கொண்டு வந்த மழை

ஏணி வரைந்தாள் குழந்தை
இதில் எவ்வளவு
உயரம் போகலாம் என்றேன்
வானம் வரை என்றாள்
போய் வந்ததை
உறுதி செய்வதுபோல்
கொண்டு வந்த மழையை
முகத்தில் தெளித்தபடி ஓடினாள்

அனுபவ சித்தனின் குறிப்புகள்

98-

தோன்றுவதில்
எனக்கும் சில
தோன்றுகிறது

எது சரி

தோன்றுவதா
தோன்றியதா

99-

உன் உள்ளொளி
இருளென்றது
இருள்

உன் உள்ளிருள்
ஒளியென்றது
ஒளி

100-

அன்பு மட்டுமே
என்னிடம் இருக்கிறது
எவ்வளவு தூரம் போகலாம்

நீங்கள் பாக்கியவான்
உங்கள் அன்பு முன்
உலகம் ஒரு கைக்குட்டை
நீங்கள் வெகுசுலபமாய்
சுருட்டி விடலாம்
அல்லது வெகுவேகமாய்
கடந்து விடலாம்

அனுபவ சித்தனின் குறிப்புகள்

93-

எப்போதும் பயணிப்பவன்
பார்த்துக் கொண்டிருப்பான்
திசைகளை மணிகளாக

94-

இரவு நகர்கிறது
எறும்பு போல
கனவின் மீது

95-

பசியால் திருடியவனை
அடைத்தார்கள்
தப்பித்துப் போனான்
பசியால்

96-

தந்தது எதையும்
கேட்பதில்லை உலகம்
உலகம் போல்
உள்ளம் வேண்டும்

97-

கூண்டிலிருந்த பறவை
வெளியேறி விட்டது
கூண்டிற்கு
சுதந்திரம் கிடைத்து விட்டது

மலை சொன்ன கதை

ஏறும்போது
கேட்டுக்கொண்டே சென்றேன்
மலை சொன்ன கதையை

இறங்கும்போது
திரும்ப
அதனிடம் சொல்லி
சரிபார்த்துக் கொண்டேன்

எனக்கானது

மெளனத்தின் மீது
அமர்ந்திருந்த பறவையை
விரட்டினேன்
அது போனபோது
விழுந்த சிறகில்
எழுதி இருந்தது
மெளனத்திற்கான நன்றியும்
எனக்கான தண்டனையும்

அனுபவ சித்தனின் குறிப்புகள்

90-

நிரம்பி வழிகிறது
மழை
சவப்பெட்டியில்

91-

எழுதாத கவிதை
எழுதிய பிறகும் இருந்தது
எழுதாத கவிதையாக

92-

என்னுள் போகும்போது
கதவுகளே இல்லை
திரும்பும்போது
நானே இல்லை

போதைகள்

வாகனங்கள் சாலையை
கிழித்துக் கொண்டிருந்தன


போதையில் விழுந்து கிடந்தவன்
சொல்லிக் கொண்டிருந்தான்

என் உடைந்த
காலைத் தேடுகிறேன்

அவனை முழுசாய்
பார்த்தவன் சொன்னான்

நீ முதலில்
காலை உடை
பிறகு தேடு

சாலை வாகனங்களால்
கிழிந்து கொண்டிருந்தது

உலகின் கரம்

எங்கள் வலிகளை
நீங்கள் எழுதினீர்கள்

எங்கள் ரத்தங்களை
நீங்கள் எழுதினீர்கள்

எங்கள் கண்ணீரை
நீங்கள் எழுதினீர்கள்

எங்கள் மரணங்களை
நீங்கள் எழுதினீர்கள்

எங்கள் துயரங்களை
நீங்கள் எழுதினீர்கள்

இன்ன பிற
தேடி எழுதினீர்கள்

உங்கள் வரிகளில் வந்த
அவை எல்லாம்
பாராட்டைப் பெற்றது

பரவலாக
வரவேற்பை பெற்றது என்று
புளகாங்கிதம் கொண்டீர்கள்

பின் போய்விட்டீர்கள்
வேறு ஒன்றுக்கு

நிகழ்ச்சி நிரலில்
மாற்றம் வேண்டும்
உங்களுக்கு

இப்போது

எங்கள் வலி
கூடுதலாகி

எங்கள் ரத்தம்
உறைந்துபோய்

எங்கள் கண்ணீர்
திசைகள் இழந்து

எங்கள் மரணம்
கணக்கைத் தொலைத்து

எங்கள் துயரம்
தனிமை சேர்த்து

உலகின் கரம் நீளமானது
என்று சொன்னவர்களே
அது எங்களை நோக்கி
எப்போது நீளும்
சொல்ல முடியுமா

அனுபவ சித்தனின் குறிப்புகள்

87-

கடக்க கடக்க
கால்களுக்கிடையில்
பிடிபடும் உலகு

88-

எந்த சத்தமும் எழுப்பாமல்
பிணத்திற்கு சமமாய்
இந்த மெளனம்

89-

என் உள் உள்
உள்
உள்
நான் காணா
உள் உள்

இப்போது

வரைந்த சிலுவையின் மேல்
வந்தமர்ந்தது பறவை

உடல் குவித்தபோது
சில துளிகள்
சிறகுகளைப் போல
பறந்து விழுந்தன

எப்படி உன்னால்
அமர முடிந்தது

கேள்வியை அலகால்
கொத்திக் கொண்டு
பறந்து போனது

இப்போது சிலுவைமேல்
பறவை ஓவியமாய்

பறவையின் கீழ
சிலுவை உண்மையாய்

நடுங்கும் கை
அனுமதிக்கும் போதெல்லாம்
முதியவர் குடிக்கிறார் காப்பியை

அனுபவ சித்தனின் குறிப்புகள்

81-

என்னை அடுக்குகையில்
பலவீனமானவர்கள்
கலைந்து போனார்கள்
பலமானவர்கள்
இணைந்து போனார்கள்

82-

வெளியே வந்தவன்
மெல்ல அழிக்கிறான்
சிறை பிம்பத்தை

83-

சுவாசிக்கையில்
சிறைபடும்
சுதந்திர காற்று

84-

உள் சிந்தி
ரத்தம் கலக்கும்
ஒளித்து வைத்த கண்ணீர்

85-
உழைத்து முடித்தவன்
தன் வியர்வையை
பார்த்துச் சொன்னான்
ஏன் சோம்பேறித்தனமாக
உருள்கிறாய்
வேகமாய்ப் போ

86-

தூண்டிலில் மாட்டிய மீன்
இறந்து கொண்டிருந்தது
இறப்பது தெரியாமல்

நான்காவது முறை

நான்காவது முறையாக
தற்கொலைக்கு முயற்சித்தவன்
மனதிற்குள் சொன்னான்
இந்த முறையும்
தோற்றுப் போக வேண்டும்

புல்லாங்குழலில் விழுந்த எறும்பு

விரல்களால் பேசுகிறார்
பியானோவுடன்
வாசிக்கும் பெரியவர்

----

என் ஆரவாரம் எறியும் பூக்கள்
வாங்கிக் கொண்டோடும் நதி
இசைலயத்துடன்

---

புல்லாங்குழலில் விழுந்த எறும்பை
எடுத்துப் போட்டேன்
இசையில் விழுந்த எறும்பை
முடியவில்லை

இரண்டு குழந்தைகள்

விழும் போதெல்லாம்
எழுந்து விடுகிறது குழந்தை
தன்னைப் பிடித்து

---

விழிக்காத அம்மா
அவள் தூக்கத்தில்
ஏறி விளையாடும் குழந்தை

அனுபவ சித்தனின் குறிப்புகள்

78-

உறங்கும் போது
தொலைத்த நேரங்களை
தேடுகிறேன் விழித்தபடி

79-

வழிப்போக்கனிடம்
முகவரி கேட்டேன்
கிழித்துப் போட்டுவிட்டு
தேடச் சொன்னான்

80-

எங்கு சுற்றினால் என்ன
வந்து சேர வேண்டும்
வாழ்க்கைக்கு

திட்டம்

போதையின் உச்சத்திலிருந்தவன்
அங்கிருந்து குதித்து
தற்கொலை செய்து கொள்ள
முடிவு செய்தான்

பின் திட்டத்தை மாற்றி
இன்னும்
மேலேறிப் போனான்

தப்பித்தல்

அந்த முயல்குட்டி
தப்பித்து விட்டது

வீட்டிலிருந்து
வலையிலிருந்து
கசாப்புக்கடைக்காரனிடமிருந்து
கடைசியில்
கவிதையிலிருந்து

அந்த முயல்குட்டி
தப்பித்து விட்டது

அனுபவ சித்தனின் குறிப்புகள்

75-

ஜென் குகை
இருளுமற்று வெளிச்சமுமற்று
குகையுமற்று

76-

என் சொற்களால்
பேசிவிட்டுத்
திரும்புகிறீர்கள்
என்னையும் விட்டுவிட்டு

77-

புத்தரை வரைந்தேன்
வரைய வந்தது
புத்தரா தெரியவில்லை

தொடுதல்

ஊஞ்சல் மேலேறும் போதெல்லாம்
ஆடும் குழந்தையின் கால்கள்
தொட்டு வருகிறது வானை

யாரோ

தெறித்து
வழிந்தோடும்
அந்த ரத்தம்

உங்களுடையதல்ல

என்னுடையதல்ல

நம் யாரோ
ஒருவருடையது

எறிதல்

நேரத்தின் மீது
கல்லெறிந்தேன்
சேர்ந்த மலையில்
நசுங்கிப் போனேன்

இன்னொரு புத்தகம்

பக்கங்கள்
மாற்றிப் படித்த கதையில்
இன்னொரு புத்தகம்

------

முதியவர் வீடு
காற்றில் ஆடுகிறது
தேதி கிழிக்காத காலண்டர்

------

தொலைந்து போனதுண்டா
நீங்கள் உங்களில்
தொலைந்து போனதுண்டா

-------

அடை மழை
மூடிய கோயில்
கடவுளும் நானும்
மழைத்துளிகளை எண்ணியபடி

-------

விற்காத பொம்மை மீது
எடுத்துப் பார்த்தவர்களின்
விரல் ரேகைகள்

இருந்தது

கண்ணாடிக் குவளைக்குள்
இருந்த மீனுக்குள்
இருந்த கடலுக்குள்
இருந்தது மீன்

அனுபவ சித்தனின் குறிப்புகள்

75-

ஆழ்மனத்தில்
அமர்ந்திருந்தேன்
யாருமற்று
நானுமற்று

76-

மனதிற்குள் நடக்கையில்
நினைவுகளின் சத்தம்
கால்கள் மிதிபட

சுமை

கூடவே வரும் நிலா
பார்க்கமுடியவில்லை
தலைசுமை

நிலை

கட்டியிருந்த ஆடு
திரும்பி வந்தபோது
தொங்கிக் கொண்டிருந்தது

குரல் பிடித்து

அம்மா நான் இங்க இருக்கேன்
குழந்தையின் குரல் பிடித்து
இருளை கடக்கிறாள் தாய்

அனுபவ சித்தனின் குறிப்புகள்

70-

எறிந்த கல்
உள்ளிறங்குகிறது
சொல்லென

71-

கொன்ற எறும்பு
விரட்டுகிறது
மிருகமென

72-

வெறும் தாள்
இல்லை
ஜென் தோட்டம்

73-

வெளியேறக் காணோம்
உள்ளிருக்கும் மிருகம்
பழகியாக வேண்டும்

74-

நான் இறந்து கொண்டிருப்பதைப்
பார்த்துக் கொண்டிருந்தேன்
இறந்து போகும்வரை

எப்போதும் நீங்கள்

எப்போதும் நீங்கள்
யார்மேலாவது விழுகிறீர்கள்
பயணத்தில்
உரையாடலில்
சாய்மானத்தில்
அந்தரங்கத்தில்
இப்படி பல
தருணங்களில்
ஒரு முறைகூட நீங்களாய்
எழுந்து போனதே இல்லை

அப்பாவும் மழையும்

எப்போது பெய்தாலும்
நனைந்து விட்டு
வரச் சொல்வார் அப்பா

அப்போதெல்லாம்
அப்பாவைப் போலவே
பேசும் மழையும்

சில பார்வைகள்

உடைத்து விட்ட பொம்மை
அழுகையை
பொறுக்கும் குழந்தை
-------
விபத்து
நசுங்காமல் கிடக்கிறது
பிறந்த நாள் கேக்
-------
இரவு நடுக்கம்
பீடி பற்ற வைக்க
வத்திப்பெட்டியோடு போராடும் காவலாளி
-------
குறுகிய சாலை
தவிர்த்தபடி போகிறார் நண்பர்
தவிர்க்கத் தெரியாமல்
-------
குளம்
சிற்றலை கற்றுத்தரும் நீச்சல்
நிலவுக்கு
-------

அனுபவ சித்தனின் குறிப்புகள்

66-

என்னிலிருந்து
என்னைப் பிடுங்கி
என்னில் நடுகிறேன்

67-

கண் மூடி
நான் பார்த்த மெளனமும்
கண் திறந்து
என்னைப் பார்த்த மெளனமும்
வேறுவேறாகவும்
ஒன்றாகவும்

68-

ஒரு வரியை
திரும்ப திரும்ப எழுத
அந்த ஒரே வரி
மாறிக்கொண்டிருக்கிறது
புது புது
வரிகளாக

69-

நீங்கள் புன்னகைத்தபின்
காண முடிந்தது
உங்கள்
முகத்தின் கசப்பை

காரில் ஆடும் பொம்மை

நெருங்கிவிட்ட வீடு
குடிகாரனின் கால்கள்
குழப்பத்தில்
--
கவனமாக காலடி வைக்கிறேன்
குழந்தைகளின்
மழை கப்பல்கள்
--
பட்டாம்பூச்சி பிடிக்கிறது குழந்தை
இல்லை இல்லை
பட்டாம்பூச்சி பிடிக்கிறது பட்டாம்பூச்சி
--
கனவில்
தூங்குவதை தடுக்க
எழுகிறான் போராளி
--
நள்ளிரவு
காரில் ஆடும் பொம்மை
ஓட்டுனருடன் பேசிக்கொண்டு
--
பழைய நண்பர்கள்
காலங்களைக் கோர்க்கிறார்கள்
பார்க் பெஞ்சில்
--

அனுபவ சித்தனின் குறிப்புகள்

63-

உண்மையில்
பொய்கள் நான்தான்
தனியே எதுவுமில்லை

64-

கதவை மூடுகிறீர்கள்
சுதந்திரமாய் நான்
அடைத்துகொண்டு நீங்கள்

65-

நான் இருளை தின்பவன்
என்றவனைக் கேட்டேன்
எங்கே தின்று காட்டு

சிரித்தபடி சொன்னான்

உன்னைச் சுற்றி
இருக்கும் வெளிச்சம்
நான் இருளை தின்றதால்
முளைத்திருக்கிறது

சொல்லிவிட்டு
மென்று கொண்டிருந்தான்

எதை என்று
தெரியவில்லை

வித்தை

பார்த்துக் கொண்டே
இருந்தது மொழி
தன்னை வைத்து
வித்தை காட்டுபவனிடமிருந்து
எப்படி விடுபடுவதென

அனுபவ சித்தனின் குறிப்புகள்

61-

கணக்கு சரியாகி விட்டது
யாரும் கண்ணீர்
சிந்த வேண்டாம்

கேள்விக்குறி
தூக்குக் கயிரானது

மரணம்
விடையானது

அவ்வளவுதான்

62-

கண்மூடிப் பார்க்கிறேன்
முன்கணப் பார்வையில்
விடுபட்டுப் போனவைகளை

முன்பாகவே

பிடிவாதமாய்
என்னைப் பார்க்க
நனைந்து வந்திருந்தாய்

அறைக்குள் நீ
கொண்டு வந்த மழை
கொட்டிக் கொண்டிருந்தது
உன் பிரியங்களை
நீ சொல்வதற்கு
முன்பாகவே

உச்சத்தில்

உச்சத்திலிருந்த
குடிகாரன் சொன்னான்

நான் நடுக்கடலில்
கிணறு தோண்டுகிறேன்

அருகில் ஆடிய
மற்றவன் சொன்னான்

நீ மூழ்கிப்போனால்
உன்னைக் காப்பாற்ற
நீச்சல் பழகுகிறேன்

நடந்து போன பாதை

நடந்து
கடந்து
களைத்து
நடக்கப் போவது
நினைத்து
உறங்கிப்போனவனை
எழுப்பாமல்
அவனுள்
போனபடி
பாதை

நிசப்தத்தின் கோடு

நிசப்தத்தின் கோடு
எனப் பெயரிட்டேன்

ஊர்ந்து திரும்பிப்போனது
பேனாவிற்குள்

தாளிலிருந்தது நிசப்தம்
கோட்டின் தயவின்றி

அனுபவ சித்தனின் குறிப்புகள்

56-

நான் கடவுளானது தெரியாமல்
என்னை மனிதனாகப்
பார்த்துக் கொண்டிருந்தார் கடவுள்

அவர் மனிதரானது தெரியாமல்
கடவுளாக பார்த்துக் கொண்டிருந்தேன் நான்

57-

வாருங்கள்
நம் தேடுதல் இயந்திரத்தை
கடலில் எறிந்து விட்டு
தொலைந்து போவோம்.

58-

எறும்பு வரிசையை
பார்த்தபடியே
கலைந்து போகும் எண்ணங்கள்.

59-

காற்றின் எடைக்கேற்ப
அசைகிறது
தராசுத் தட்டு

60-

இந்த சவப்பெட்டி
உங்கள் அளவுக்கு
சரியாக இருக்கிறதா

ஒரு முறை
படுத்துப் பார்த்து
தெரிந்து கொள்ளுங்கள்

அதுபோல் செய்துவிட்டு
சிரித்தபடி யோசித்தான்

சரியாக இருந்தது
மரணத்தின் ஒத்திகை

பார்த்தல்

கரையில் அமர்ந்திருந்தனர்
இருவரும்

ஒருவன்
மீன் நீந்துவதைப்
பார்த்துக் கொண்டிருந்தான்

இன்னொருவன்
நதி நீந்துவதைப்
பார்த்துக் கொண்டிருந்தான்

ஆப்பிள் விளையாட்டு

காருக்குள்
ஆப்பிளை தூக்கிப் போட்டு
விளையாடும்
அப்பாவும் மகளும்

சிக்னல் விழுவதற்குள்
வெளியே வந்து
விழாதா என பார்க்கிறாள்
வெயிலைத்
துடைத்தபடி சிறுமி

அனுபவ சித்தனின் குறிப்புகள்

54-

கடைசியாக
என்ன சொல்ல
விரும்புகிறாய்

வலி கொல்கிறது
இன்னொரு
குண்டு பாய்ச்சி
உடனே
கொன்று விடு

55-

மணல் வெளியில்
வெயில் பாம்பு
கால் மிதிக்க
நெளியும் நழுவும்

ஜன்னல் விழியில்

அப்பா வானவில் பல
நிறத்துல இருக்கு
மழை மட்டும் ஏன் ஒரே
நிறத்துல பெய்யுது
பல கலர்ல பெய்யாதா

கேள்வியின் நிறங்கள்
அப்பாவினுள் இறங்க
பதில் தேடியபடியே
குழந்தையை சமாளிக்கிறார்

ஜன்னல் விழியில்
ரசிக்கிறது மழை
இருவரையும்

அனுபவ சித்தனின் குறிப்புகள்

50-

அதுவாக
போகிறது ஆமை
நாம்தான்
மெதுவாக என்று
குறியீடு செய்கிறோம்

51-

உதிர்ந்து கொண்டிருந்தது
மரம்
விழுந்து முடித்தது
இலை

52-

அவர்கள்
கண்ணீரோடு வந்தார்கள்
கடுமையான
சோதனைகளுக்குப் பிறகு
கவலை சத்து
குறைவாக இருக்கிறதென்று
திருப்பி அனுப்பபட்டார்கள்

53-

தூக்கி எறிந்த துப்பாக்கி
சொல்லிக் கொண்டே விழுகிறது
கொன்றவர்களின் பெயரை

புத்தர்கள்

களவாடிக் கொண்டு வந்த புத்தர்
கை நழுவி விழுந்து
உடைந்து போனார்
புத்தர்களாக

பல திருடன்களாகிப்
பார்த்துக் கொண்டிருந்தேன்
எந்த புத்தரை
எடுப்பதென

விழு

விழுந்து கொண்டிருக்கும் நான்
விழுந்து கொண்டிருக்கும் என்னை
விழுந்து போகாமல்
பார்த்துக் கொண்டிருந்தேன்
விழுந்து போகும் வரை

அவன்

ஒரு பூவை நினைத்தபடியே
தற்கொலை
செய்து கொண்டான்

அவன் மரணத்தில்
ரோஜா பூத்திருந்தது

பொய்கள்

என் கைபட்டு
விழுந்து கொண்டிருந்தது
பொம்மை

கை நீட்டிப்
பிடிப்பதற்குள்
உடைந்து போயிற்று

சிதறிக் கிடக்கிறது
பொம்மையின் உயிர்

குழந்தை வருவதற்குள்
எடுத்தாக வேண்டும்
பொம்மை கேட்டு
அழுது அடம் பிடித்தால்
நிறுத்த முடியாது

அப்புறப்படுத்துவதற்குள்
வந்து சேர்ந்த
குழந்தையின் கையில்
சிக்கியது
பொம்மையின் கால்

அழவில்லை
தேடலுடன்
பார்த்தது குழந்தை

மற்ற பகுதிகளை
மறைத்தபடி சொன்னேன்

ஒற்றைக்காலுடன்
ஓடிவிட்டது பொம்மை

திரும்பி வருமா
என்பது போல்
பார்த்தது குழந்தை

வரும் வந்து
விட்டுப் போன
காலைத் தேடும்
உடையாமல் வைத்திரு
எனச்சொல்ல
கைக்குள்
இறுக்கிக் கொண்டது

விரட்டி வரும்
ஒற்றைக்கால் பொம்மையிடமிருந்து
தப்பிக்க
ஓடிக்கொண்டிருந்தன
கால் முளைத்த
என் பொய்கள்

பசி

பசியைத் தடவியபடி
அவன் சொன்னான்
கடவுள் ஏழைகளுக்கு
உதவி செய்யாமல்
யாருக்கு செய்வார்

முதலில் எனக்கு
சோறு கொடுத்து விட்டு
பிறகு உன் கடவுளைப்
பற்றி யோசி

சொன்னது பசி

வயோதிக வாசனை

வயோதிக வாசனை
வீசியதில்லை
தாத்தாவின்
சாய்வு நாற்காலியில்

நண்பர்களும் நட்பும்

நண்பர்கள்
இறந்துபோகும்போதெல்லாம்
நட்பும்
இறந்து போகிறது
தேநீர் குடித்தபடியே
ராமசாமி சொன்னான்

போனவாரம்
எங்களோடு டீகுடித்த
முத்தையாவின் இடம்
வெறுமையாக இருந்தது

அனுபவ சித்தனின் குறிப்புகள்

47-

எனக்குத் தரப்பட்ட
இடத்தில் இருந்தன
நானே எடுத்துக்கொள்ள
ஏராளமான இடங்கள்

48-

அவனை எல்லோரும்
பைத்தியம் என்றார்கள்

அவன் எல்லோரையும்
பைத்தியம் என்றான்

விவாதம் முடிவுக்கு வந்தது

49-

கூண்டுடன்
பறந்துபோனது கிளி
கனவில்
கூண்டை பத்திரமாக்க
கிளியைப் பறக்கவிட்டான்

கனவைத் தந்து சென்றவன்

நான் திரும்ப வந்து
கேட்கும் வரை
பத்திரமாக வைத்திரு
எனச் சொல்லி
அவன் ஒரு கனவைத்
தந்து சென்றான்

அதை வைத்திருப்பது
பெரும்பாடாக இருந்தது

நீண்ட நாட்களுக்குப் பிறகு
திரும்பியவன்
கனவைக் கேட்டான்

பின் சொன்னான்

இது என் கனவில்லை
நீ மாற்றி இருக்கிறாய்
நான் தந்ததுபோல
தா என்றான்

உன் கண்ணீரும் புலம்பலும்
இதில் சேர்ந்திருக்கிறது

உன் கனவுகளை
இடையிடையே புகுத்தி
சிதைத்திருக்கிறாய்

சொல்லிக்கொண்டே போனான்

நீ சொன்னது போல்
எதுவும் நடக்கவில்லை
என்றாலும் கேட்கவில்லை

இரவல் கனவை ஏன்
வாங்கினோம்
என்றிருந்தது எனக்கு

இப்போதும்
கனவில் வரும் அவன்
குற்றம் சொல்வதை
நிறுத்தவில்லை

என்னாலும் இந்த
கனவிலிருந்து
மீள முடியவில்லை

அனுபவ சித்தனின் குறிப்புகள்

44-

கிளையில்
அமர்ந்தது பறவை
கல்லெறிய
பறந்தது சத்தம்

45-

பல்லிக்கும் பூச்சிக்கும்
இடையில்
சுற்றுகிறது பசி

46

ஓடிக்கொண்டிருப்பவனோடு
ஓடிக்கொண்டிருக்கிறது
பாதையும்

ஒற்றன்

ஒவ்வொரு வார்த்தையாய்
அழித்துக் கொண்டே
வந்த ஒற்றன்
மொத்தமாய் கொன்று
முடித்த பிறகு சொன்னான்
மரணம் பற்றிய
உன் கவிதை
கடைசியில் இறந்துவிட்டது

கடல்

கடல் காட்டி
கடலில்
விளையாட்டுக் காட்டிய
அப்பாவின் அஸ்தியை
கரைத்தாயிற்று

குத்துகிறது
ஒரு துளி
கண்ணில்

பால்யம் குழைத்து
மறக்காமல் வா
விளையாட
அப்பாவும் நானும்
இருக்கிறோம்

சொல்லி அனுப்புகிறது
கடல்

(ராகவன் சித்தப்பாவின்
நினைவுக்கு)

அனுபவ சித்தனின் குறிப்புகள்

39-

உள்ளமர்ந்து
தவம்
என்
உள்ளமர்ந்து

40-

கண்ணாடியைத் திறந்து
வெளியேறுகிறது
என் பிம்பம்

41-

தன் வெளிச்சத்தில்
பார்க்கிறது மெழுகுவர்த்தி
உருகுவதை

42-

கை குவித்த மலை
கல்லாயிற்று
கை விரித்த கல்
மலையாயிற்று

43-

கிடைத்து விட்டது
தொலைந்ததல்ல
கிடைக்க வேண்டியது

என் பெயர்

பயணத்தை
சுவையாக்கியப் பெரியவர்
இறங்கும்போது சொன்னார்

தம்பி உங்க பேரக் கேக்கலன்னு
தப்பா நெனைச்சிக்காதிங்க
மறந்து போயிடும்
இல்ல மாத்தி சொல்லிடுவேன்
அதான்...

கையசைத்தபடியே
பார்த்து நின்ற
அவர் அன்பில்
ஒட்டி இருந்தது
என் பெயர்

கவனமாகப் படியுங்கள்

கவனமாகப் படியுங்கள்
இந்த கவிதையின் வரிகளுக்கிடையில்
நீங்கள் கொலை செய்யப்பட்டுக் கிடக்கிறீர்கள்

கவனமாகப் படியுங்கள்
இந்த கவிதையில் எங்கோ ஒரு மூலையில்
நீங்கள் பதுக்கி வைக்கப்பட்டிருக்கிறீர்கள்

இந்த கவிதையின் புள்ளிகள் கல்லெறிந்து
நீங்கள் காயப்பட்டிருக்கிறீர்கள்

இந்த கவிதையின் வார்த்தைகளுக்கிடையில்
நீங்கள் நசுங்கிக் கொண்டிருக்கிறீர்கள்

கவனமாகப் படியுங்கள்
இந்தக் கவிதையின் முடிவில்
நீங்கள் நாடுகடத்தப்பட்டிருக்கிறீர்கள்

இந்தக் கவிதையின் அடியில்
நீங்கள் நீச்சலை மறந்துப் போயிருக்கிறீர்கள்

இந்த கவிதையின் மயக்கத்தில்
நீங்கள் மூச்சைத் தொலைத்திருக்கிறீர்கள்

கவனமாகப் படியுங்கள்
இந்த கவிதையின் வண்ணங்களில்
உங்கள் நிறத்தை மறந்துபோயிருக்கிறீர்கள்

இந்த கவிதையின் சூதாட்டத்தில்
உங்களை இழந்திருக்கிறீர்கள்

கவனமாகப் படியுங்கள்
இந்த கவிதையின் வியூகத்தில்
நீங்கள் இதை எழுதியவனை விடுவித்துவிட்டீர்கள்

விடுதலையின் பாடல்

கொல்லப்பட்டவர்களின்
மூச்சுக் காற்று பிரபஞ்சத்தில்
அதில் ஓயாமல் ஒலிக்கிறது
விடுதலையின் பாடல்

நதியின் ஒழுங்கில்

நீரடியில் கிடந்த வயலினை
எடுத்த பின்னும்
கையள்ள முடியாமல்
ஓடிக்கொண்டிருந்தது இசை
நதியின் ஒழுங்கில்

இல்லாத பந்து

இல்லாத பந்தை வைத்துக்கொண்டு
விளையாடிக் கொண்டிருந்தார்கள் சிறுவர்கள்

படிக்கச் சொல்லி
எல்லோர் வீட்டிலிருந்தும் சத்தம் வர
ஓடிப்போனார்கள்

இல்லாத பந்து
இருந்தபடி பார்த்துக் கொண்டிருந்தது
எப்போது வருவார்கள் என்று

தெரியாமல்

யாருக்கும் தெரியாமல்
அழுது கொண்டிருந்தவளை
யாருக்கும் தெரியாமல்
பார்த்துக் கொண்டிருந்தேன்

அழகு

முதியவரின் ஓட்டத்தில்
அழகாயிற்று
இளங்காலை

போதல்

எல்லா ரயிலும் போயிருந்தன
குழந்தை வரைந்த
தண்டவாளத்தில்

உயரமான கவிதை

மலையிடம் சொன்னேன்
உன்னைவிட
உயரமான கவிதை
எழுத வேண்டும்

கூழாங்கல் சிரிப்புடன்
சொன்னது மலை

தூசி வார்த்தைகளை
அப்புறப்படுத்து
மறைந்திருக்கும்
மலை தெரியும்

அனுபவ சித்தனின் குறிப்புகள்

34-

கிடைத்துவிட்டன கேள்விகள்
கிடைக்காமலா போகும்
பதில்கள்

35-

நீளமாக நீங்கள்
வரையும் கோடும்
சிறிதாக நான்
வரையும் கோடும்
கோடுகள்தான்
கோடுகளன்றி வேறில்லை

36-

நீ தூக்கி
எறிந்து
நீயே பிடி
உன்னை

பிறர் பிடித்தால்
பின் தூக்கி
எறியப்படுவாய்
திரும்ப உனக்குள்
வந்து சேராதபடி

37-


இரண்டாவது
உதிர்ந்த இலை
துணையாயிற்று
முதலில்
விழுந்த இலைக்கு

38-

உறக்கத்திலிருந்து
வெளியேறி விட்டேன்
ஆறுதல்படுத்த வேண்டும்
இமைகளை

காற்றின் அடியில்

உன்னோடு சேர்ந்து
உரக்க நானும்
அந்த கேள்வியைச்
சொல்லிப் பார்க்கிறேன்

நம் குரல்களின்
சமவிகிதம் பரவும்
காற்றின் அடியில்
மறைந்து கிடக்கும் பதில்
மேலேழும்பி வந்து
அடையலாம் நம்மை

நீதான்

நீதான்

இந்தக் கொலையைச்
செய்தது நீதான்

பொய் சொல்லாதே
மறைக்காதே
பதுங்காதே
ஓடி விடாதே

உன் கத்தி
ரத்தம் கக்கி
எல்லாவற்றையும்
சொல்லி விட்டது

கத்தியில்
ஒட்டிக் கிடக்கும்
வெட்டுப்பட்டவனின் நாக்கு
உரக்கச் சொல்கிறது
உன் பெயரை

நீதான்

இந்தக் கொலையைச்
செய்தது நீதான்

நீயேதான்

இதே வழியில்

இந்த வழியில்
நீங்கள் போகும்போது
பசியோடு இருந்து
பசியை சொல்லியவன்
இதே வழியில்
நீங்கள் திரும்பும்போது
இன்னும் பசியுடன்
அதை சொல்ல
மொழியற்று
கண்களால் கெஞ்சியபடி

பறிக்காத பூ

நீங்கள்
பறிக்காது போன பூ
உதிர்கிறது
உங்கள் பெயரைத்
தாங்கியபடி

ஆடு

தண்டவாளத்தில்
புற்களைத் தின்னும் ஆடு
ரயிலுக்கு
விளையாட்டுக் காட்டிவிட்டு
ஓடிப்போகிறது

அவர்கள்

அவர்கள்
வெளியேறுவதற்காக
உள்ளே வந்தவர்கள்
உள்ளே வந்து
உங்களை வெளியேற்றியவர்கள்

அவர்கள்
வெட்டுவதற்கு முன்னால்
உயிரைத் தடவிக் கொடுப்பவர்கள்

அவர்கள்
இனிப்புப் புன்னகையில்
ஈக்களாய் உங்களை
மொய்க்க வைப்பவர்கள்

அவர்கள்
நீங்கள் விழித்திருக்கும்போது
தூக்கத்தைத் திருடுபவர்கள்
தூங்கும்போது
கனவுகளைக் களவாடுபவர்கள்

அவர்கள்
உங்கள் பயண திசைகளை
மாற்றி வைப்பவர்கள்
உங்கள் கால்களால்
ஓடுபவர்கள்

அவர்கள்
உங்கள் பசியை
உண்பவர்கள்

அவர்கள்
உங்களை பொம்மைகள் என்று
நம்ப வைப்பவர்கள்
விளையாடிவிட்டு பின்
உடைத்துப் போடுபவர்கள்

அவர்கள்
உங்கள் ஏமாற்றத்தின் விந்தில்
உற்பத்தியாகிறவர்கள்

அவர்கள்
உங்களில் இருப்பவர்கள்
ஆனால் நீங்கள்
அவர்களில் இருப்பதில்லை

வரிகள்

கதையின் வரி
இப்படித் தொடங்குகிறது

இது உண்மையானவர்களைப்
பற்றிய உண்மைக் கதையல்ல
பொய்யானவர்களைப் பற்றிய
உண்மைக் கதை

கவிதையின் வரி
இதோடு முடிகிறது

திருடர்கள்

எல்லோரும்
திருடிக் கொண்டிருக்க
யார் கண்டுபிடிப்பது
திருடனை

தள்ளி வைத்தல்

ஆறுதல் வார்த்தைகளைத்
தள்ளி வைக்கிறேன்

பொய் சொல்லாத
முட்கள் மீது நடப்பது
பிடித்திருக்கிறது

ஸோலோ

உன் பெயர்

ஸோலோ

என்ன பெயர்

ஸோ…லோ…

ம்..சரி
நீ ரொட்டியைத் திருடினாயா

எனக்குத் தெரியாது

சரியாக சொல்
இவர் கடையிலிருந்து
நீ ரொட்டியைத் திருடினாயா

எனக்குத் தெரியாது
என் பசியைத்தான்
கேட்க வேண்டும்

அப்படியேதான் இருக்கிறது

அப்படியேதான் இருக்கிறது

நான் உங்களிடம்
சொல்லாத

நீங்கள் என்னிடம்
சொல்லாத

அந்த வரி
அப்படியேதான் இருக்கிறது

ஒரு உயிர்

துடித்து புரண்டு
ரத்தம் பெருக
உதவி கேட்டு
கெஞ்சி கைநீட்டி
போராடியவரை
யாரும்
காப்பாற்றவில்லை

அவர் மரணத்தைக்
காப்பாற்றினார்கள்

(வெற்றிவேலின் நினைவுக்கு)

அனுபவ சித்தனின் குறிப்புகள்

33-

நடந்தபோது
ஏதோ இடறி
கீழே விழுந்து
பின் எழுந்து பார்க்க
என் சடலம்

சடலம்
சத்தம் போட்டது

துர்க்கனவுகளை
இரவில்
நட்டுவைக்காதே
போய் நிம்மதியாய்த்
தூங்கு

...........

இறந்து கிடக்கிறது
வெட்டிய மரம்
கூடவே குஞ்சுகளும்

அனுபவ சித்தனின் குறிப்புகள்

32-

திறந்த வெளியில்
மூடிக்கிடக்கும்
நான்

குழந்தைகள் உலகம்

1-

நிலவை விவரிக்கும்
குழந்தையின் வார்த்தைகளில்
நிலவுகள் ஒளிர்கின்றன

2-

மழை கூப்பிடுகிறது சிறுமியை
விளையாட
நனைந்து விடுவாய் என்று
தடுக்கிறாள் தாய்

இருத்தல்

ஜென் தோட்டம்
உள்ளிருந்தபோதும்
வெளியில் இருந்தேன்
வெளியில் வந்தபோதும்
உள்ளிருந்தேன்

கடினம்

கடினமாக இருக்கிறது

எல்லோரும் நிறைந்த இடத்தில்
மெளனமாக அழுவதும்

யாருமற்ற இடத்தில்
சத்தமாக சிரிப்பதும்

தேடுவோம்

இனி ஒரு விதி செய்வோம்
கூச்சலை நிறுத்துவோம்

செய்த விதிகள்
எங்கே போயின
அதை தேடுவோம்

பிளாட்பாரக் கிழவி

உள்ளிருப்பவர்களைப் பற்றி
கவலைப்படுவதில்லை
வந்து போகும்
ஒவ்வொரு ரயிலுக்கும்
கையசைக்கிறாள்
பிளாட்பாரக் கிழவி

உனக்கான நதி

அழைப்பதில்லை
எந்த நதியும்

நீ பாய்ந்து
நீந்து

உனக்கான நதியை
எடுத்துக் கொண்டு
மேலேறு

பலி

என்னை
பலி கேட்கிறார் கடவுள்
வேகமாக ஓடுகிறேன்
கடவுளிடமிருந்தும்
கனவிடமிருந்தும்

ஏழாவது முறை

ஏழாவது முறையாக
நாள் குறித்தும்
இறந்து போகவில்லை பாட்டி
ஊர் திரும்புகிறார்கள் எல்லோரும்
கொண்டு வந்த கண்ணீருடன்

உங்களிடமிருந்து

பூவின் பெயர்
கண்டறிய
அகராதி புரட்டுவதை
நிறுத்துங்கள்
மணம் ஓடிக்கொண்டிருக்கிறது
உங்களிடமிருந்து

நீள்கிறது

அப்பாவுடன் போகும் போது
சிறிதாக தெரியும் சாலை
தனியே நடக்கும் போது
பெரிதாக நீள்கிறது