நீங்கள் பிறந்துகொண்டிருக்கிறீர்கள்

இந்தக் கவிதையை

எழுதும் போது

நான் இறந்துகொண்டிருக்கிறேன்

இந்தக் கவிதையை

படிக்கும் போது

நீங்கள் பிறந்துகொண்டிருக்கிறீர்கள்

அப்பா சொல்லுவார்

அப்பா சொல்லுவார்

உன் எழுத்தில்

ஈரம் இருக்கிறது

நான் சொல்லுவேன்

அது நீங்கள் தந்தது

துளிக்கண்ணீரைத்

துடைத்துக்கொண்டு

மெளனத்துள் மூழ்கிப் போவோம்

கைதி எண் 616

சிறைக்கம்பிகளுக்கு
அருகில் போய்
கம்பியைத் தட்டிப்பார்த்து
ஒரு துண்டு வெட்டியெடுத்து
துளைகளிட்டு
புல்லாங்குழலாக்கி
வாசிக்கத் தொடங்கினான்

      

முடியாத கதை

அம்மா குழந்தைக்கு
கதை சொன்னபோது
முதல் குண்டு வெடித்தது

கதை பாதியிலிருந்தபோது
இரண்டாவது குண்டு வெடித்தது

அவர்களோடு
முடியாத கதையும் இறந்து கிடந்தது

ரயில்

எல்லோரும்
அவரவர் உலகத்தில்

புல்லாங்குழல்
வாசிக்கும் சிறுவன்

கேட்டபடி
போகும் ரயில்