தொலைந்த கடவுள்

தொலைந்த கடவுளை 
கண்டுபிடித்து 
உங்களை யாரிடம் 
ஒப்படைக்க வேண்டும் என்றேன் 

நான் உன்னை 
அடையவே வந்தேன் 
நீ என்னைத்
தொலைத்து விட்டாய் என்று 
சொல்லியபடியே 
மறைந்து போனார்

அனுபவ சித்தனின் குறிப்புகள்

934-

நள்ளிரவைப் 
பிளக்கும் முயற்ச்சியில் 
இன்றும்  போயிற்று
தூக்கம்

935-

விரிந்ததை 

விவரிப்பதில்லை

எந்த பூவும

ரசி

936-

சாப்பிட்டு நாளாகிறது என்று 

பசி வலியோடு 

கெஞ்சுபவன் வரியிலும்

இருக்கிறது வயிறு 

937-

அறிவு கனிந்த 

சபையில் நான்

பழம் பொறுக்குபவன்

938-

வண்ணங்களை 

சேர்த்தாயிற்று

ஓவியனை 

சேமிக்க வேண்டும்

939-

இன்னும் கொஞ்சம்

தூங்க வேண்டும்

விழிப்பிடம்

சொல்லி வைக்கிறேன்


940-


யுத்தம் பழகி வைத்திருப்பவர்கள் 
இருக்குமிடத்தை எல்லாம் 
போர்க்களமாக்கி விடுகின்றனர்

வழி

நுழைவாயில் 

அடைக்கப்பட்டு விட்டது 

எப்படி உள்ளே வந்தீர்கள் 

சாவி துவாரத்தின் 

வழியாக 

முனையில்

நாக்கின் முனையில் 

மேய்ந்த தேளை 

தள்ளிக் கொன்றேன் 

வார்த்தைகள் 

நஞ்சிறங்கி 

நலம் பெற்றன

அனுபவ சித்தனின் குறிப்புகள்

930-

இருந்தும்

இல்லாது போலிருக்கிறார்கள்

இருப்பவர்கள்

931-

விருந்து இலை 
கடைசிப் பருக்கையில் 
குவியும் கண்

932-

இளைப்பாறிய நிழலிடம் 
பிரியத்தை எப்படி 
சொல்லிச் செல்ல

933-

அவன் கிளையில் 

தொங்கிய போது 

மரத்தின் சில பழங்கள் 

கீழே விழுந்து கிடந்தன

சிறகசைப்பில்

பறவையின் சிறகசைப்பில் 

காற்றின் இசை 

உதிர்கிறது 

காற்றின் மீதே

கர்வம்

பெரு வனத்தில் 
தொலைந்த 
புல் நான் 
வனத்தின் கர்வம் 
எனக்குண்டு

சொல்லின் அடியில்

சொல்லின் அடியில் 

ஓடுகிறது நதி 

மொழியின் நளினத்துடன்

கண்ணீரல்ல

கொடுங்கனவைத் தின்ற 

உன் கண்களிலிருந்து 

வழிவது 

கண்ணீரல்ல 

இறந்து போனவனின் 

ரத்தம்

அனுபவ சித்தனின் குறிப்புகள்

923-

வறண்ட நிலம் 
காத்திருக்க 
கடலில் 
பெய்கிறது மழை


924-


உணர்வுகள் 
எழுதும்போது
பேனா பார்த்துக்
கொண்டிருக்கிறது


925-


குருவே 
நான் மிதக்க 
என்ன செய்ய வேண்டும் 

பறவையாக வேண்டும் 

பறவையாக 
என்ன செய்ய வேண்டும் 

மிதக்க வேண்டும்


926-


ஒரு போதும்
என் பசிக்கு என்னை
இரையாக்கியதில்லை


927-


தயக்கம் 

வழிகளை 

மூடிவிடுகிறது

928-

பிறந்ததே பெருந்தவறு

இதில் பிழை திருத்தி 

என்ன பண்ண

929-

வழிகளைக் கிழித்து விடாதீர்கள்
வழிப்போக்கன் சொன்னான்
பார்க்கத் தொடங்கினேன்
வழிகளைப் புத்தகங்களின்
பக்கங்களைப் போல

அனுபவ சித்தனின் குறிப்புகள்

915-

பல வருடங்களாக
இந்த கல் மேல்
உட்கார்ந்திருக்கிறேன்

நான் சோம்பேறியா?

இல்லை
இன்னொரு கல்

916-

அப்படியே 

நிற்க வைத்திருக்கிறேன் 

கண்ணீர்த் துளிகளை 

கல்லாக்கி 

எறியலாம் 

விழவும் 

வைக்கலாம்

917-

என்னிடம் ஒன்றுமில்லை 

என்பதில் கூட 

ஏதோ இருக்கிறது

ஒன்றுமே இல்லை 

என்பதில்தான் 

எதுவுமே 

இல்லாமல் இருக்கிறது

918-

கடல்மனம் கொண்ட
மீன் நீந்தும்
மீன் தொட்டிக்கு
வெளியிலும்

919-

உன் பிரமிப்பைக் கண்டு
வியக்கச் சொல்கிறாய்
புள்ளி அளவு கூட
உண்மை இல்லாத
உன் வரி 
உதிர்ந்து போனது
தெரியாமல்

920-

எப்போதும் எனக்குத் 

தோல்வி தேவைப்படுகிறது
எப்போதாவது 

வெற்றியும் தேவைப்படுகிறது

921-

தராசில் வைத்துப் 

பார்க்கப்படும் மனிதம் 

எடைக்கல்லாகி விடுகிறது

922-

உறைந்து போன
கேள்விகளை
உடைக்கிறேன்
பதில்கள் சிதற

உதிர்ந்து போனது

உன் பிரமிப்பைக் கண்டு 

வியக்கச் சொல்கிறாய்

புள்ளி அளவு கூட 

உண்மை இல்லாத 

உன் வரி 

உதிர்ந்து போனது 

தெரியாமல்

அனுவப சித்தனின் குறிப்புகள்

 906-

பின்னிரவை
நிரப்புகிறேன்
முற்பகல்
நினைவுகளால்

907-

வரிகளில்
இறக்கி வைத்த பின்னும்
கனக்கிறது சுமை

908-

உயிரின்
மேலேறி நின்று
மரணத்தைத்
தள்ளி விட்டேன்

909-

எல்லோருக்குமான கனவு 

பிரபஞ்சத்திடம் 

இருக்கிறது

910-

ஒளித்து வைத்தக் 

கண்ணீரை
ஒருபோதும்
சிந்தியதே இல்லை

911-

கரை ஒதுங்கும் நினைவுகள் 
கால் நனைக்கும்
வழிப்போக்கன்
பயணம் அதைக் கடக்கும்

912-

தூங்கும் இறைவனை
எழுப்பவில்லை
அவர் கனவில் போய்
கோரிக்கை வைத்து விட்டு
வந்து விட்டேன் 

913-

உறங்கப் போகும் 

போதெல்லாம் 

விடிந்து விடிகிறது

914-

என்னிடம் சொல்வதற்கு 

ஒன்றுமில்லை

என் மெளனத்தின் மீது 

கிரீடம் 

வைத்து விடாதீர்கள்.

899-

எதற்கு 
இறந்த காலத்தை 
மென்று கொண்டிருக்கிறீர்கள்
துப்பிவிட்டு 
நிகழ் காலத்தை 
சுவைக்கப் பாருங்கள்


900-


நான் என்னத் 
தெரிந்து கொள்ளவில்லை 
என்பதிலும் 
அடங்கி இருக்கிறது 
நான் என்னத் 
தெரிந்துகொண்டேன் என்பது


901-


புரியவைப்பது 
என் வேலையல்ல
புரிந்து கொள்ளாதது 
உங்கள் குற்றமுமல்ல


902-


புள்ளியில் 
பூக்கும் சொல் 
புள்ளியை 
பூமியாக்கி


903-


என் மேல் 
ஏறி நின்று பார்த்தேன்
எல்லாம் தெரிந்தது


904-


யார் உன்னை
கண்ணீரைப் 
பூசிக் கொள்ளச் சொன்னது 
போய் 
முகம் கழுவி வா


905-


மேஜை மேல்
வைத்திருந்த பூஜ்யம்
உருண்டோடிப் போய் 
விழுந்து உடைய
உள்ளிருந்து
சிதறிக் கொண்டிருந்தன
எண்கள்

கையெட்டும் தூரத்தில்

மறதியாய் 

தொலைதூரத்தில் 

வைத்துவிட்டு 

வந்த கனவை 

எடுக்கத் திரும்பினேன் 

அதுவாய் வந்து 

நின்றிருந்தது 

கையெட்டும் தூரத்தில்

அனுபவ சித்தனின் குறிப்புகள்

886-

தொடாத வானம்
தொடச் சொல்லும்
ஞானம்

887-

மனது

கலப்படமானது.

கலப்படம் 

பழகிப் போனது

888-

உதிர்ந்த இலையின் 
ஞாபகத்தில் மரத்தின் 
ஒன்றிரண்டு சொற்கள்

889-

குருவே நான் அமைதியாக 
யோசித்துக் கொண்டிருக்கிறேன் 
நீங்கள் 

அமைதியை 

யோசித்துக் கொண்டிருக்கிறேன்

890-

நன்றியால் 

நெய்த அன்பில் 

நானும் 

ஓர் இழை

891-

இருள் வனத்தில்
ஒளிக்கோலம்
மின்மினிப்பூச்சி

892-

வழி அடைக்கப்பட்டிருக்கிறது 

என்றவன் 

நின்று கொண்டிருந்தான்

பிரபஞ்சம் திறந்திருக்கிறது 

என்றவன் 

நடந்து கொண்டிருந்தான்

893-

நாடக கண்ணீர
புரிஞ்சிக்கிட்டேன்
அது வேஷம்
கலைச்சப்ப
விழிச்சிக்கிட்டேன்

894-

எதற்கு நின்றுகொண்டிருக்கிறாய் 

ஓடி வந்ததை 
அசை போடுகிறேன் 

அதை ஓடியபடியே செய் 
ஓடு

895-

பசியை இலையாய் 
விரித்து வைத்திருக்கிறேன் 
நீங்கள் என்ன 
பரிமாறினாலும் 
எனக்கு சம்மதம்

896-

என் மீதி நான்கள் 

உங்களுக்குள் 

இருக்கிறார்கள்

897-

தவமிருந்தவன் 
தூங்கிப்போனான் 
அவன் வரத்தை 
யாரோ ஒருவன் 
வாங்கிப்போனான்

898-

நினைவின்
பெரும் குகை
உள்ளிருள்
அழகு

மீனின் பொய்கள்

நீரில் தற்கொலை 

செய்து கொண்டேன் 

என்று சொன்ன 

மீனை எடுத்துக்

கரையில் போட்டேன்

இறந்து போயிருந்தது

மீனின் பொய்யும்

காகிதப் புலி

நான் எழுத்தில்

சிக்கிக்கொண்ட 

காகிதப் புலி 

என்னைக் கொண்டுபோய் 

வனத்தில் விடுவாயா

செய்வதறியாது 

திகைத்து 

ஒரு நாள் வனம் 

போய் நின்று 

தூக்கி எறிந்தேன் 

புத்தகத்தை 

எழுத்திலிருந்து 

தானே விடுதலைப் பெற்று 

புலிப்போகக்கூடும் 

கானகத்திற்கு 

திரும்ப எனக்கு 

புத்தகம் கிடைக்கக்கூடும் 

படிப்பதற்கு

அன்புள்ள கடவுளுக்கு

அன்புள்ள கடவுளுக்கு
என்று நான் 
எழுதத் தொடங்கிய கடிதத்தை
என்னுடன் சேர்ந்து
கடவுளும்
எழுதிக் கொண்டிருந்தார்