ராஜா சந்திரசேகர் கவிதைகள்

Tuesday, October 26, 2010

எதிர்பார்ப்பு

தொடர்ந்து வரும்
பயணியை
எதிர்பார்த்திருந்தாள்
அவள் உடலோடு
முடிந்து போயின
பயணங்கள்

சொன்னதில்லை

பெரிதாக ஒன்றும்
சொன்னதில்லை
கவிதையில்
ஆனாலும்
கவிதைகள் எப்போதும்
என்னைப் பார்த்ததில்லை
சிறுமையாய்

Monday, October 25, 2010

அனுபவ சித்தனின் குறிப்புகள்

212-

சொல்லெடுத்து
தரும் சொல்
சொல்வதில்லை
சொல்லென்று

213-

சந்திக்கும் போதெல்லாம்
முடிவுக்கு வருகிறது
பிரிவு

ஒலிக் குறிப்புகள்

என்னிடம்
வனம் தந்தனுப்பிய
ஒலிக் குறிப்புகளை
வாங்கிய மகள்
குதூகலத்துடன்
இசையாக வாசித்தபோது
அதன் உச்சியிலிருந்து
விழத்தொடங்கியது
அருவி

Friday, October 22, 2010

208-

கல் பறக்கிறது
எனச் சொன்ன தாளை
தூக்கிப் பார்த்தேன்
பாரமாக இருந்தது

209-

வயதின் மீதேறி
விளையாடும் நான்
குழந்தையாய்

210-

நின்றாலும்
இழுத்துப் போகும்
நடையின் நடை

211-

கையசைக்க
விடைபெறும்
ரயில்

Thursday, October 21, 2010

அனுபவ சித்தனின் குறிப்புகள்

203-

உங்களின் நிறம்
என்ன என்று கேட்டார்
நிறங்களின் நிறம் என்றேன்
போய்விட்டார்

204-

மொழிகள் எதற்கு
கண் துளி
சொல்லும் அன்பு

205-

உள்ளோடும் நதி
நீச்சல் பழகும்
என்னிடம்

206-

மேடையை எதிர்பார்ப்பதில்லை
தனக்குள்
ஒத்திகை செய்பவன்

207-

ஒதுங்கி நின்றால்
ஒதுக்கப்படுவாய்
மையம் கைப்பற்று

Tuesday, October 19, 2010

நடந்து கொண்டிருப்பவன்

அவன் நடந்து கொண்டிருந்தான்

நடந்து நடந்து
நடந்து நடந்து

அவன் நடந்து கொண்டிருந்தான்

இருளில்
வெயிலில்
மழையில்
வனத்தில்
மலையில் என

அவன் நடந்து கொண்டேயிருந்தான்

நடந்து முடிக்கும்
தூரப் புள்ளிகளில்
தானே நின்று
தன்னை வரவேற்று
அனுப்பியபடி

வழித் தடங்களில்
வருபவர்களுக்கான
முகவரிகளை
விட்டுச் சென்றபடி

அவன் நடந்து கொண்டிருந்தான்

தன் கால்களுக்குள் நுழைந்து
இதயம் அடைந்து
மூளையிலிருந்து வெளியேறி
நின்று போகாத மந்திரத்தை
உச்சரித்தபடி

அவன் நடந்து கொண்டிருந்தான்

கடந்து கொண்டிருந்தான்

நீங்களும் அவனை
ஏதாவது ஒரு தருணத்தில்
பார்த்துவிட முடியும்

அல்லது

ஏதாவது ஒரு கணத்தில்
அவனாக மாறிவிட முடியும்

Sunday, October 17, 2010

கூக்குரல்கள்

வேண்டான்டா
உன் அம்மாவ நீ கெடுப்பியா

உன் அக்காவ
நீ அழிப்பியாடா

உன் தங்கிச்சிய
இப்படிச் செய்வியா

அம்மாக்களும்
அக்காக்களும்
தங்கைகளும்
கற்பழிக்கப்பட்டார்கள்

கற்பழிப்பாளர்கள்
சமூக கெளவரவங்களோடு
இன்னபிற
செல்வாக்குகளோடு
வலம் வந்தனர்

இருளில்
இருளைப்போலவே
புதைந்து போயின
கூக்குரல்கள்

Friday, October 15, 2010

வார்த்தைகளும் மீன்குஞ்சுகளும்

ஆழ்ந்த தியானத்தில்
காற்றை உள்ளிழுத்தபோது
கூடவே போய்விட்டன
சில வார்த்தைகளும்

மீன்குஞ்சுகளைப் போல
சுற்றின வார்த்தைகள்

ஒரு மீன்குஞ்சு
மெல்ல நகர்ந்து
ரத்தத்தில் ஓடிய
கெட்ட கனவுகளை
உட்கொண்டது

ஒரு மீன்குஞ்சு
இதயத்தில் தங்கிக்கிடந்த
வன்மத்தை
எடுத்துக்கொண்டது

தலைக்கு வந்த ஒன்று
அங்கு படிந்து போயிருந்த
புராதன கோபங்களைத் தின்றது

தியானத்தின் மூச்சு நீள
உள் சென்ற வார்த்தைகள்
வெளி வந்து விழுந்தன
இறந்த மீன்குஞ்சுகளாய்

ஒன்று மட்டும்
காப்பாற்றச் சொல்லி
போராடியது

இறுதியில்
என் மீது ஒட்டியிருந்தது
அது வீசிச் சென்ற
மரணத்தின் எச்சில்

அனுபவ சித்தனின் குறிப்புகள்

201-

வாளின் கண்களால்
போரைப் பார்க்கிறேன்

202-

நான் உதிரி
உதிர்ந்து போனாலும்
மறைந்து போகாத
மகா உதிரி

Wednesday, October 13, 2010

அனுபவ சித்தனின் குறிப்புகள்

200-

மையப்புள்ளிகளை
மாற்றிக்கொண்டே இருக்கிறது
வட்டம்

வட்டங்களை
மாற்றிக்கொண்டே இருக்கிறேன்
நான்

என்னை
மாற்றிக்கொண்டே இருக்கிறது
பிரபஞ்சம்

Monday, October 11, 2010

பாவனை

கல்லெறிவதுபோல்
பாவனைச் செய்கிறது குழந்தை

வலிப்பதுபோல்
பாவனைச் செய்கிறேன் நான்

குழந்தை போனபின்
பார்த்தபடி நடந்தேன்
குவிந்து கிடந்த பாவனைகளை

பறவைகள்

1-

இல்லாதபோது
அலகால் கொத்தி
தா என
ராகம் எழுப்புகிறது
ஒரு பறவை

2-

துப்பாக்கியின் குறியை
மாற்றியபடியே பறக்கிறது
இறந்துபோக விரும்பாத
ஒரு பறவை

Thursday, October 07, 2010

குழந்தைகள்

1-

குதிக்கும் போதெல்லாம்
ஆகாயத்தைக்
கையள்ளும் குழந்தை

2-

குழந்தையின் கையில்
குழந்தை போலிருக்கும்
நாய்க்குட்டியை
குழந்தைபோல்
கொஞ்ச ஆசை

கேட்டுக் கிடைத்தது
தோல்விதான்

கையசைத்துவிட்டு
ஓடுகிறாள் குழந்தை
தன் சொர்க்கத்தைத் தராமல்

அனுபவ சித்தனின் குறிப்புகள்

194-

மனிதனைத்
திறக்கும் சொல் ஒன்று
காலங்காலமாய்
பூட்டியே கிடக்கிறது
தன்னைத்
திறந்து கொள்ளத் தெரியாமல்

195-

கிடைக்காது என
நினைக்கும் போதெல்லாம்
கிடைத்து விடுகிறது
ஏதோ ஒன்று

196-

எழுதாத தாளில்
விரிகிறது
வானம்

197-

உங்கள் பின்னால்தான்
வந்து கொண்டிருக்கிறேன்
ஆனாலும்
உங்கள் முன்னால்
சென்று கொண்டிருக்கிறேன்

198-

நடந்து போனவர்களின்
சுவடுகளில்
படிக்க எதுவுமே இல்லை

199-

கவிதையின் அடிவாரத்தில்
படுத்துக்கிடந்தேன்
நிம்மதியைப் போர்த்தியபடி

Wednesday, October 06, 2010

பார்வைகள்

நீங்கள் பார்த்துக்கொண்டிருக்கும் தாஜ்மஹாலை
எனக்குச் சொல்ல முடியுமா
உங்கள் வார்த்தைகளின் வழியே
அதைப் பார்த்துக் கொள்கிறேன் என்றார்
பக்கத்திலிருந்த பார்வையற்ற தோழர்

என் அறிவுக்கெட்டியபடி
அந்த அதிசயத்தைச்
சொல்ல ஆரம்பித்தேன்

இசை கேட்பது போல
அவர் தலையசைத்து
உள்வாங்கியதை
பிறகு சொல்லி
சரிபார்த்துக் கொண்டார்

அவர் வார்த்தைகளின் பார்வையில்
என்னால் தரிசிக்க முடிந்தது
இன்னொரு தாஜ்மஹாலை

Monday, October 04, 2010

அனுபவ சித்தனின் குறிப்புகள்

193-

ஜன்னலோரம்
அமர்ந்த பறவையை
விரட்டிவிட்டு
எல்லோருக்கும்
இடம் வேண்டும்
என்று எழுத
எப்படி மனம் வந்தது

Friday, October 01, 2010

அனுபவ சித்தனின் குறிப்புகள்

190-

போய்விட்டார்கள்
காலடித்தடங்களில்
நெளிகிறது மொழி

191-

நடந்து முடிந்த
அறுநூற்று அறுபத்தாறு
குற்றங்களையும் செய்த
குற்றவாளி நான்தான்
என்னை விட்டுவிட்டு
அறுநூற்று அறுபத்தியேழாவது
நபரை கைது செய்து
விசாரித்துக் கொண்டிருக்கிறீர்கள்
ஏதோ கிடைத்துவிடும் என்ற
அதீத நம்பிக்கையில்

192-

ஓவியம் என்று
சொல்லாதீர்கள்
ஒற்றை கோட்டை
ஒற்றைக் கோடு
என்றே சொல்லுங்கள்

Sunday, September 26, 2010

வானத்தில்

வானத்தில் படுத்திருந்தேன்
எழுந்தபோது ஒட்டியிருந்தன
ஒன்றிரண்டு நட்சத்திரங்கள்
உதறிவிட்டுத் திரும்பினேன்

Saturday, September 25, 2010

அனுபவ சித்தனின் குறிப்புகள்

186-

கனவில் மின்னியது
அன்பின்
சொல் ஒன்று

187-

திரும்பிப் பார்த்தேன்
வயதுகளின் பாதையில்
ஓடிவந்தபடி ஒரு குழந்தை

188-

வானம் கூப்பிட்டும்
போகவில்லை
கனவில் விழுந்த நட்சத்திரம்

189-

நேரம் இல்லை
நினைவுகளில்
சந்திப்பவர்கள்

Thursday, September 23, 2010

சிலருக்கு...

உங்களுக்கு என்ன
வேண்டுமானாலும் கேளுங்கள்
அதைத் தருகிறேன் என்றார்
ஒன்றுமே இல்லாதிருந்தவர்

விநோதமாக
அவரைப் பார்த்து
கடந்தனர் எல்லோரும்

சிரித்தபடியே
யாருக்கும் எதுவும் தேவையில்லை
நானே வைத்துக் கொள்கிறேன் என்றார்

கடந்து போனவர்களில் சிலர்
அவர் சொன்னதைச்
சொல்லிப் பார்த்துக் கொண்டனர்

உங்களுக்கு என்ன
வேண்டுமானாலும் கேளுங்கள்
அதைத் தருகிறேன்

சிலருக்குத் தந்தது போலிருந்தது

சிலருக்குப் பெற்றது போலிருந்தது

அனுபவ சித்தனின் குறிப்புகள்

183-

என்போல்
ஒற்றைக் கிளையில்
மதிய காகம்

184-

கதை சொன்ன குருவி
பறந்து போனது
என்னையும் கதாபாத்திரமாய்
எடுத்துக் கொண்டு

185-

சுற்றிலும் நாடகங்கள்
என் வேடத்தை
பலப்படுத்த வேண்டும்

Saturday, September 18, 2010

காற்றில் தைத்த சட்டை

பறந்து கொண்டிருந்த
சிறுமி சொன்னாள்
நான் காற்றைத் தைத்து
சட்டையாகப் போட்டிருக்கிறேன்

ஒரு பறவையின் லாவகம்
பறத்தலில் தெரிந்தது

அவள் சொன்ன
காற்றுச் சட்டை
பிம்பத்திற்குள் சிக்காமல்
நழுவியது

மறுநாள்
பள்ளிக்குச் சென்ற சிறுமியை
வழியில் பார்த்துக் கேட்டேன்
காற்றுச் சட்டை
எங்கே என்று

அது காற்றிலேயே இருக்கிறது
நான் பறக்க நினைக்கும்போது
அதில் புகுந்து கொள்வேன்
சிரித்து சொல்லியபடியே
ஓடிப்போனாள்

ஓடினாளா பறந்தாளா
தெரியவில்லை

(கிருத்திகாவிற்கு)

Thursday, September 16, 2010

அனுபவ சித்தனின் குறிப்புகள்

182-

வன்மம் வளர்க்கும் விலங்கு
உடலெங்கும் திரிகிறது
என் பேர் சொல்லி

Monday, September 13, 2010

அனுபவ சித்தனின் குறிப்புகள்

181-

யாருமில்லாத கூண்டின்
ஜன்னலோரம் அமர்ந்து
என் பாவங்களைச்
சொல்லிக் கொண்டிருந்தேன்

மணிசத்தத்தில்
நான் சொல்வது
கேட்காமல் போய்விடுமோ
என்ற அச்சம் வேறு

குரலில்
சத்தம் கூடியது

பாவங்களை
சொல்லிக்கொண்டே வர
சேர்ந்து கொண்டன
மறைந்து போனவைகளும்

யாருமில்லாத கூண்டின்
ஜன்னலோரம் அமர்ந்திருக்க
என் பாவங்கள் என்னைச்
சொல்லிக் கொண்டே வந்தன

மூச்சுவாங்கிய நிலையில்
பாவங்கள் சொல்லி
முடிக்கப் பட்டனவா
என்று படபடத்தபோது
கூண்டு மெல்ல
சவப்பெட்டியாகி
என்னை
விழுங்கிக் கொண்டது

Sunday, September 12, 2010

ஓடியவர்கள்

ஓடி விட்டனர்
மழையை ஏமாற்றாமல்
நனைந்தது குழந்தை

இசையின் பெயர்

மெல்லிய விசிலுடன்
சென்ற இளைஞனிடம்
அது பற்றிக்
கேட்க நினைத்தேன்

அவனைத் தடை
செய்ய விரும்பாமல்
நம்பிக்கை இசை
என்று பெயர்
சூட்டிப் பார்த்தேன்
சரியாக இருந்தது

அப்போது
என் உதட்டில்
ஊர்ந்த அவன்
விசில் சத்தம்
அதை ஆமோதித்தது

அனுபவ சித்தனின் குறிப்புகள்

180-

யாரிடமும்
சொல்ல முடியாத
ரகசியத்தை
சொல்லிக் கொண்டிருந்தேன்
என்னிடம்

Saturday, September 11, 2010

குழந்தையின் ஓவியங்கள்

நான் குழந்தையின் கையிலுள்ள
பென்சிலாக மாறினேன்

குழந்தை வரைந்தது

கூர்ந்து
கவனித்து
முகத்தை
முன்கொண்டுபோய்
அதுவே
ஒரு ஓவியமாகி
வரைந்தது

குழந்தையின்
கண்களுக்கும் உதட்டுக்கும்
இடையில் பரவியது
வரைந்து முடித்த
புன்னகை

பின் பென்சிலை
முத்தமிட்டு
கீழே வைத்து
வேறு ஒன்றை எடுத்து
இன்னொரு உலகத்திற்கு
செல்லத் தயாரானது

வரைந்த தாளிலிருந்து
வெளியேறினேன் நான்
குழந்தைக்கு நன்றியை
வண்ணங்களாகத்
தூவிவிட்டு

Thursday, September 09, 2010

அனுபவ சித்தனின் குறிப்புகள்

177-

என்னைத் திறந்து
வெளியேறிய கனவில்
கலந்திருந்தன
கையள்ளக்கூடிய
கவிதைகளும்

178-

அழவேண்டும்
போலிருக்கிறது
எனக்கும் தெரியாமல்

179-

ஒளி வீசும் வார்த்தைகளால்
இருளை எழுதிக்கொண்டிருந்தவனை
ஒரு இரவில் சந்தித்தேன்

நான் இரவிலிருந்தேன்
அவன் பகலில் இருந்தான்

Tuesday, September 07, 2010

அனுபவ சித்தனின் குறிப்புகள்

173-

அறையிலிருந்த
ஒவ்வொருவரும்
தங்களுக்குள் ரகசியமாக
சொல்லிக் கொண்டார்கள்
என்னைத் தவிர
எல்லோரும்
இறந்து போவார்கள்

174-

உடலில் வசிக்கிறது
உயிர்
உயிரில் வசிக்கிறது
மரணம்

175-

கை அள்ளிய
இருளை இறுக்க
மூச்சற்றுப் போகும் பயம்

176-
உங்களது பாத்திரம்
நிரம்பி வழிவது குறித்து
உங்களுக்கு ஆனந்தம்

எனது பாத்திரம்
நிரம்பாமல் வழிவது குறித்து
எனக்குப் பேரானந்தம்

Monday, September 06, 2010

நானும் நானும்

தூங்கும்போது
வந்த கனவில்
தற்கொலை செய்திருந்தேன்
விடிந்தபின்
இறந்துகிடந்த கனவை
தூக்கிப் போட்டுவிட்டு
வேலையைப்
பார்க்கத் தொடங்கினேன்

கேட்டபடி

அவர்கள் கேட்டபடி
திருத்தி எழுதிய கவிதையில்
ஊனம் மறைந்திருந்தது
உண்மை ஊனமாகி இருந்தது

Tuesday, August 31, 2010

தேடுதல்

மண்புழுவைப் பற்றி
எழுதி வரச்சொன்னார் டீச்சர்
குழந்தையிடம்

மண்ணில் தொலைந்த
மண்புழுவை
‘நெட்’டில்
தேடிக்கொண்டிருந்தார் அப்பா

அனுபவ சித்தனின் குறிப்புகள்

171-

நான்கள்
மொய்த்துக் கிடக்கும் என்னை
விடுவிப்பதெப்படி

172-

கிடைக்காது எனப்போட்டுப்
பூட்டி வைத்த கேள்விகள்
பெட்டியை சவப்பெட்டியாக்கி
உடைத்து வெளியேறின
கிடைக்கும் பதில்கள் என்ற
பாய்ச்சலுடன்

Sunday, August 29, 2010

கண்ணீரில் வரைதல்

கண்ணீரை
எந்த வண்ணத்தில்
வரைந்தாலும்
ஓவியமாகவே இருந்தது

கண்ணீரில்
வரைந்தபோது
ஓவியம் வெளியேறியது

சைத்தான்

பாட்டிலில்
அடைக்கப்பட்ட சைத்தானைப்
போட்டுடைத்தேன்

உடைந்து போன சைத்தான்
ஒன்றாகிப் போனது
உடையாத பாட்டிலுக்கு
ஒரு முத்தம் வைத்துவிட்டு

Saturday, August 28, 2010

அந்த வரி

அந்த ஆங்கில வரியை
மொழிபெயர்த்தபோது
அழகாக வந்திருந்தது

துப்பாக்கியைக் கொல்லுங்கள்

சுட்டுக் கொண்டிருந்தவன்
சரியாக இல்லை என்றான்

இறந்து கொண்டிருந்தவன்
கேட்கவில்லை என்றான்

Friday, August 27, 2010

அனுபவ சித்தனின் குறிப்புகள்

168-

என்னைத் தேடாதீர்கள்
எழுதும் கவிதை
வழி நுழைந்து
வெளியேறி விடுவேன்

169-

பூமியில் பறக்கவும்
வானில் நடக்கவும்
கற்றுக் கொடுக்கின்றன
குதிரையின் கால்களும்
பறவையின் சிறகுகளும்

170-

இந்த தோல்விகளை வைத்து
ஆடப்போகும் விளையாட்டில்
ஜெயித்துவிட முடியும்

Wednesday, August 25, 2010

அனுபவ சித்தனின் குறிப்புகள்

164-

மை இருட்டில்
மெய் இருட்டை எழுத
போனது
பொய் இருட்டு

165-

இல்லாதது எதுவும்
இருப்பதில்லை
நுரைத்த வார்த்தைகளை
துப்பிவிட்டு நடந்தேன்
எச்சில் பொய்களுடன்

166-

காற்றை
உளியால்
செதுக்கும் போதெல்லாம்
உதிர்கிறது இசை
சிலையென

167-

மரணத்தை சிறிதளவு
ஒரு மாத்திரையைப் போல
விழுங்கிவிட்டுப் படுத்தேன்
நன்றாகத் தூக்கம் வந்தது

வெட்டி எறியும் வார்த்தைகள்

கைவீசி
நீங்கள் வெட்டி எறியும்
வார்த்தைகளுக்கிடையில்
ஒளிந்திருக்கும் பாம்பு
கூர்ந்து பார்க்கிறது
உங்கள் கைகளைக் கொத்த

Monday, August 23, 2010

வாழ்விடம்

தான் இறந்து போனது தெரியாமல்
அவன் திரும்பிக் கொண்டிருந்தான்
வாழ்விடம் நோக்கி

இழுத்தல்

கதாபாத்திரங்கள் எல்லோரும்
கதைக்குள் இழுத்து
என்னையும் ஒரு
பாத்திரமாக்கிவிட்டார்கள்

யாராவது
படிக்கும்போதுதான்
சொல்ல வேண்டும்

தயவு செய்து
என்னை வெளியில்
எடுங்கள் என்று

Sunday, August 22, 2010

அனுபவ சித்தனின் குறிப்புகள்

160-

காலங்கள்
ஓடிவிட்டதை நினைத்துக்
கவலைப்படுகிறீர்களா

இல்லை காலங்களோடு
ஓடிக்கொண்டிருப்பதை நினைத்து
சந்தோஷப்படுகிறேன்

161-

என்னுடன் யாருமில்லை
இந்த வரி தந்த கலக்கம்
அவர்களுடன் நானிருக்கிறேன்
என்று மாற்றியபோது
இல்லாமல் போனது

162-

யார்கூடி நகர்த்த
தேருக்கடியில்
நசுங்கிய காலம்

163-

தூண்டிலில் சிக்கிய
மீனின் கண்களில்
விடை பெறும் நதி

Thursday, August 19, 2010

அனுபவ சித்தனின் குறிப்புகள்

156-

கண்களில்
குவிந்து கிடக்கும் தைரியம்
போ எனச் சொல்லி
வெளியேற்றுகிறது
கையாலாகாத கண்ணீரை

157-

தயங்கி தயங்கி
பிரார்த்தனையைச் சொன்னேன்
போயிருந்தார் கடவுள்

158-

இந்த சிறையிலிருந்து
வெளியே
வந்தபோதுதான்
நிறைய சிறைகளுக்குள்
என்னை பூட்டி வைத்திருப்பது
தெரிய வந்தது

159-

பெருங்காட்டை
தரிசித்து
வெளிவந்தேன்
உள்ளங்கையில்
பூத்திருந்தது
மூலிகைச் செடி

Tuesday, August 17, 2010

மாமிசம்

உன் ஈர நிர்வாணம்
என் கண்களின் உடை

இந்த வரியில்
ஒட்டி இருந்த
மாமிசத்தில்
மொய்த்த ஈக்களில்
தனிப்பெரும்
ஈயாய் நான்

கடவுளுடன் உரையாடல்

கடவுளிடம்
என் டேட் ஆப் டெத்
பற்றிக் கேட்டேன்

சிரித்தார்

மீண்டும் கேட்டேன்

சிலதை ரசிக்கப் பழகு
சிலதை ஒதுக்கப் பழகு
சிலதை விரும்பப் பழகு
சிலதைப் பார்க்கப் பழகு

சொல்லிக் கொண்டே சென்றார்

மீண்டும் என்
சாவு தேதி குறித்து
சத்தமாய்க் கேட்டேன்

சொன்னார்

சிலதை
தெரிந்து கொள்ளாதிருக்கப் பழகு

அந்த அசரீரியோடு
முடிந்து போனது
கடவுளுக்கும் எனக்குமான
உரையாடல்

Monday, August 16, 2010

அனுபவ சித்தனின் குறிப்புகள்

151-

என் பாத்திரத்தில்
மழை
உங்கள் பாத்திரத்தில்
உணவு
அதனாலென்ன

152-

யாரும் என்னைத் தேடாதீர்கள்
ஜென் கவிதைகளில்
என்னைத் தேடுகிறேன்

153-

அவன் கனவில்
ஒரு கத்தியை
சொருகிவிட்டுப் படுத்தான்
காலையில் இறந்து கிடந்தான்

154-

மலைப் பாம்பை
விழுங்கிய எறும்பு
எறும்பாகவே நகர்கிறது

155-

வலி விழுங்கு
கண்ணீர் குடி
யுத்தம் கையெடு

Saturday, August 14, 2010

வேர் கொண்டான்

மேடை ஏறி
பின் பக்கம் போய்
வேஷம் போட்டிருந்தவரை
உற்றுப் பார்த்து
அவர் கேட்டார்
நீங்க கந்தசாமிதானே

அவர் சொன்னார்
இந்த கதாபாத்திரத்தின் பேரு
வேர் கொண்டான்
அது மட்டும்தான்
இப்போது
எனக்குத் தெரியும்

ஆதி ஒளி

மூதாட்டியை
கொல்ல வந்தது பாம்பு

அதைப் பார்த்து சிரித்து
புரண்டு படுத்தாள் பாட்டி

அவள் கனவிலிருந்து
போகிறது பாம்பு
சிறகை விரித்து
பறவையாய் ஆகி

ஆதி ஒளியை
தரிசித்தபடி

Wednesday, August 11, 2010

அனுபவ சித்தனின் குறிப்புகள்

146-

சிறைபட
உணர்கிறேன்
விடுதலை

147-

யாரும் கவனிக்காத
தப்பை செய்தேன்
நான் கவனிக்க

148-

வெற்றுப் பாத்திரத்தில்
நிரம்புகிறது இசை
மழை

149-

இமை மூடி
திற
தூக்கம் முடி

150-

என் கால்களின்
மேலே இருப்பது
நானல்ல
ஒரு உலகம்

Monday, August 09, 2010

கல் புத்தகம்

வலிக்கவில்லை
நீ எறிந்த கல்
நிறைய பக்கங்கள் கொண்டது
படித்துக் கொண்டிருக்கிறேன்

கற்றுத் தந்தவை

நகரவாசியானவன்
கிராம ஆசிரியருக்கு
விரிவாக
எழுதிய கடிதத்தை
இப்படி முடித்திருந்தான்

அய்யா
நீங்கள் கற்றுத் தந்தவை
இன்னும்
கற்றுக் கொடுக்கின்றன

குரங்குகள்

உங்கள் குரங்கு
என் மேலேறி
விளையாடுகிறது
தூக்கிப் போங்கள் என்றேன்
அவரிடம்

எதுவுமில்லையே என்றார்

பார்த்தேன்
எதுவுமில்லை

ஆனாலும்
விளையாடியது குரங்கு
அவர் பெயரை
என் பெயரை
யார் யார் பெயரையோ
சொல்லியபடி

Sunday, August 08, 2010

அனுபவ சித்தனின் குறிப்புகள்

143-

நான் தேடி வந்தவன்
கூட்டத்தில் இல்லை
என்னைத் தேடி
வந்தவன் இருந்தான்

144-

யாரும் காப்பாற்றக் காணோம்
சொல்லிடுக்கில்
சிக்கிக் கொண்ட மெளனம்

145-

சில உரையாடல்களுக்கு
நடுவில்
இறந்து போகின்றன
பல உரையாடல்கள்

Friday, August 06, 2010

ஏறுதல்

மலையில்
ஏறுவது போல்
கவிதையில்
ஏறியது எறும்பு

மலை உச்சியிலிருந்து
தொங்குவது போல்
எறும்பின் காலடியில்
தொங்கியது கவிதை

Tuesday, August 03, 2010

காலம்

குளிர் சாதன பெட்டிக்குள்
வைத்திருந்த காலத்தை
எடுத்துப் பார்த்தேன்
உள்ளிருந்த மீன்கள்
தின்றது போக
மீதி இருந்தது
பிணவாடை அடிக்க

இறந்து போன காலம்
இன்னொரு முறை
இறந்து போயிருந்தது

ரத்த சிவப்புள்ள ஆப்பிள்கள்

ரத்த சிவப்புள்ள ஆப்பிளை
ரத்த சிவப்புள்ள மனிதன்
ரத்த சிவப்புள்ள காரின் மேல் சாய்ந்து
கடித்துத் தின்கிறான்
ரத்த சிவப்பில்லாத சிறுமி
பார்த்தபடி இருக்க

ரத்த சிவப்பான கண்கள் கொண்டவன்
ரத்த சிவப்பான குத்திய கத்தியை எடுக்கிறான்
ரத்த சிவப்புள்ள மனிதனின்
வயிற்றிலிருந்து
விழுந்து கொண்டிருக்கின்றன
ரத்த சிவப்புள்ள ஆப்பிள்கள்

Sunday, August 01, 2010

குட்டிகள்

மழையில் நனையும்
நாய்க்குட்டியைத்
தூக்கி வருகிறேன்
கூடவே வருகின்றன
மழைக் குட்டிகளும்

விடுதல்

மனநிலை பிசகியவன் என்று
அவனைச் சொன்னார்கள்
அவன் மழையிடம்
சொன்னான்
அவர்கள் பேசுவதை
நீ கழுவி விடு
நான் மறந்து விடுகிறேன்

Friday, July 30, 2010

அனுபவ சித்தனின் குறிப்புகள்

139-

கல்லாக என்னை
எறிந்து எறிந்து
மலையானேன்

140-

புதிதாக
பிறந்து கொண்டே இருப்பதால்
அடிக்கடி
இறந்து போவது
பிடிக்கிறது

141-

வலிகளை
கொண்டாடு
கண்ணீரில்
நிறங்கள் எடு

142-

என்னால் மட்டுமே
வீழ்த்த இயலும்
என்னை

Wednesday, July 28, 2010

ஆடுதல்

தூக்கு கயிறை
ஊஞ்சலாக்கு
வரியில் ஆடியது கவிதை

Tuesday, July 27, 2010

அனுபவ சித்தனின் குறிப்புகள்

136-

அவள் கண்களில்
நீளமான கதை
கண்ணீரில் கிடைத்தது
சில குறிப்புகள் மட்டுமே

137-

அமர்ந்து போன
கிளையில் அசைகிறது
பறவையின் நன்றி

138-

இருளில் கேட்கிறது
அனாதை இருட்டின்
கதைகள்

ஏணிகள்

குழந்தை ஏணி வரைய
அப்பா ஏணி
செய்து கொண்டிருந்தார்

உள்ளிருந்து சாப்பிட
அழைப்பு வர
இருவரும் போனார்கள்

அப்பாவின் ஏணி
குழந்தையின் ஏணியில் ஏறி
விளையாடிக் கொண்டிருந்தது
அவர்கள் வரும் வரை

Tuesday, July 20, 2010

அனுபவ சித்தனின் குறிப்புகள்

134-

எனக்குள் இருக்கும்
கடவுளைக் காட்டும்
கடவுளைக் காண்பது எக்கணம்

135-

ஐயாயிரம் வரிகள்
எழுதிய பிறகு
அவன் சொன்னான்
என் முதல் வரியை
இப்போது
எழுதத் தொடங்குகிறேன்

Monday, July 19, 2010

எதிர்பாராதது

எதிர்பார்த்தது போல
எதிர்பார்த்த நண்பர்
எதிரே வந்தார்

எதிர்பாராத
சைகை செய்து
வேகமாகி
மறைந்து போனார்

முடிவற்ற தெருக்கள்
பார்த்துக் கொண்டிருந்தன

புதிர் நிறைந்த மனிதர்களையும்
புதிது புதிதான
விசித்திரங்களையும்

சிறகின் மேல்

உன் குரல்
ஒரு பட்டாம் பூச்சியின்
சிறகின் மேல்

பிடிக்க முயல
குரலிலிருந்து
பறந்தது பட்டாம் பூச்சி
இசையெழுப்பி

Saturday, July 17, 2010

அனுபவ சித்தனின் குறிப்புகள்

130-

குமிழ் மேல்
நின்று
குமிழை
உடைக்காமல்
குமிழைப் பார்க்கிறது
மற்றொரு குமிழ்

131-

எப்படியும்
உங்களுக்குக் கிடைக்கலாம்
எனதுடல்
எனது கனவை
அடைய
பலநூறு ஆண்டுகள் ஆகும்
உங்களுக்கு

132-

நிகழாது போன
உரையாடலுக்குள்
தழைத்திருக்கிறது மொழி

133-

எல்லோரும் நசுக்க
யாரிடமும் சாகாமல்
ஊர்ந்து கொண்டே போகிறது
பல காலங்களாய்
எறும்பு

அதே பறவை

நான் வரும்போது
துடித்துக் கொண்டிருந்த பறவை
வீடு போய் சேர்வதற்குள்
இறந்து போகலாம்
உன் சாவு சிந்தனை விடு
திரும்ப போய்ப்பார்
உன்னைப் போன்றவர்களுக்கு
குருதியில்
ஏதாவது செய்தி
வைத்துவிட்டு
தொலைவாகி இருக்கலாம்
அதே பறவை
தன் அலகால்
மரணம் தின்ற
மதர்ப்புடன்

Sunday, July 11, 2010

அனுபவ சித்தனின் குறிப்புகள்

126-

அன்பால் யாராவது
நகர்த்தி இருக்கலாம் என்றது
அருகில் வந்திருந்த மலை

127-

ஆகாரத்தை மறுத்த
கூண்டு பறவையின்
கண்களில் படிக்க முடிந்தது

சுதந்திரம் எனதுணவு
அதைத் தா

128-

யாரெனும்
கண்டெடுக்கக்கூடும்
என் பால்யத்தை
எனக்கேத் தெரியாமல்

129-

நம் அருகில்
இருக்கும் தூரங்களை
எப்படிக் கடப்பது

Saturday, July 03, 2010

அனுபவ சித்தனின் குறிப்புகள்

123-

கதவை திறந்து பார்க்க
பூதம் நின்றது
அதன் கையில்
என் முகவரி இருந்தது
யாரென்று கேட்க
உனது பொய் என்றது

124-

எழுத எதுவும்
கிடைக்கக் காணோம்
திரும்ப சீவுகிறேன் பென்சிலை

125-

இங்கிருந்த என்னை
காணவில்லை என்றார் ஒருவர்

அதோ அங்கிருக்கிறாரே
அவரா என்றேன்

கேட்டு வருகிறேன்
என்று போனார்

நான் காணாமல் போனேன்

Thursday, June 24, 2010

கப்பல்கள்

கப்பல்கள்
வழி தெரியாமல்
இருளில் நிற்கின்றன என்றேன்

தேவதை சிரிப்புடன்
பார்த்த சிறுமி
நோட்டை எடுத்து
கலங்கரை விளக்கை
வரைந்தாள்

கப்பல்கள்
ஒளி பெற்று
வழி பார்த்துப் புறப்பட்டன

பின் ஓவிய நோட்டை மூடி
பையில் வைத்து
பள்ளிக்கூடம் போனாள்

அவளுக்குத் தெரியாமல்
அவளைத் தொடர்ந்தன
கப்பல்களும்

Tuesday, June 22, 2010

அனுபவ சித்தனின் குறிப்புகள்

120-

சூன்யத்தில் சுட்டுக்கொண்ட
விரல் நுனியில்
காலத்தின் சாம்பல்

121-

எறிந்த சொற்கள்
சேர்ந்து கற்களாச்சி

கற்கள் எல்லாம்
குவிஞ்சி மலையுமாச்சி

மலையுச்சி நின்று பார்க்க
அமைதி வெளி
தெரியலாச்சி

122-

தோற்றுப் போனவன் இசைக்கிறான்
தோற்கக்கூடாது என்ற பாடலை
மேலும் சுதி சேர்த்து
தலை நிமிர்ந்து
உலகம் பார்த்து

Sunday, June 20, 2010

கனவில்

யார் கனவென்று
தெரியவில்லை
வீதியில் கிடந்து
துடிக்கிறது
விட்டுப் போனவன்
தேடக்கூடும்
இக் கனவை
வேறொரு கனவில்

(14.07.2010 ஆனந்த விகடன் இதழில்
பிரசுரமானது)

Saturday, June 19, 2010

திரும்புதல்

அடிக்கடி குழந்தை கேட்பாள்
இந்த மீன் தொட்டி மீன்களை
கடலில் விட்டுவிடலாமா என்று

கடல் மீன்களின் தாய்வீடு
மீன்களின் நீர் விளையாட்டுத் திடல்
என்று அவளுக்கு
கதை சொல்லும் போது
குறிப்பிட்டது
அப்படியே தங்கிவிட
ஒரு நாள் கேட்டாள்

மீன் தொட்டியில
நகர்ந்து போவுது
கடல்ல விட்டா
ஓடும் இல்ல

அவள் விருப்பப்படியே
முடிவு செய்து
கவனமாய் கொண்டுபோய்
மீன் தொட்டியை
கரையில் வைத்து
எல்லா மீன்களையும்
வழி அனுப்பி வைத்தோம்

ரொம்ப தூரம் போயி
விளையாடுங்க எனச்சொல்லி
குதித்தபடியே கடலுக்கு
கையசைத்தாள் குழந்தை

அலை பதிலுக்கு
தலை அசைத்தது

மீன் தொட்டியில்
நிரம்பி இருந்தது
கடலின் நன்றி

Wednesday, June 16, 2010

பூக்களின் வரிசை

குழந்தை தனக்குத் தெரிந்த
பூக்களின் பெயர்களைச்
சொல்லிக்கொண்டே வந்தது

நினைவில்
வரிசை தடுமாறியபோது
பூக்களோடு சேர்த்துக் கொண்டது
தன் பெயரையும்

சொல்லி முடித்த நிம்மதியில்
புன்னகையுடன் பார்த்தது

குழந்தையின் பெயரில்
சேர்ந்திருந்தது
எல்லா பூக்களின் வாசமும்

(கல்கி,08.08.2010 இதழில்
பிரசுரமானது)

Friday, June 11, 2010

அனுபவ சித்தனின் குறிப்புகள்

116-

மேலேறிச் செல்லும்
எறும்பைப் பார்க்க
மேலேறிச் செல்லும் பார்வையும்

117-

மறந்தே போயிற்று
மறந்ததை நினைக்க
மறந்தே போயிற்று

118-

கைமாறி கைமாறி
கை சேர்ந்த கனவு
கண்ணீரைப் பேசலாச்சே
கண்ணீரைப் பேசி
கண்ணீரைப் பேசி
கை கனவு கரைஞ்சிப் போச்சே

119-

விடுபட விடுபட
விடுபடும் எல்லாம்
விடுபட்டு விடுபட்டு
சிறைபடும் எல்லாம்

கிடைத்து விட்டது

இன்னும் பெயரிடாத
என் புதிய நாயுடன்
கடற்கரையில்
நடந்து கொண்டிருந்தேன்

சிநேகமாக வந்தது
கடலைப் பார்த்தது
கை கயிற்றை
சற்றே விட
கூடுதல் சுதந்திரத்துடன்
ஓடிப்போய்
மண்ணைக்கீறி விளையாடியது
நண்டைப் பார்த்து மிரண்டது
ஒளி வாங்கி ஓடியது
பின் என்னோடு வந்து
சேர்ந்து கொண்டது

வீடு திரும்புகையில்
உனக்கு என்ன பெயர்
வைக்கலாமென்று
அதனிடம் கேட்டேன்
குரைத்தது

அந்த சத்தத்திலிருந்து
விழுந்த சொற்களில்
எதுவும் பெயர்
ஒலிக்கவில்லை

கயிற்றின் அதிர்வு
கைக்கு இதமாக இருந்தது

நாய் கதாபாத்திரங்கள் வரும்
கதைகளினூடே போய்
ஏதாவது பெயர் கிடைக்குமா என
பார்த்து திரும்பியது மனது

வைக்கப்போகும் பெயருக்கு
ஒரு விஷேசம்
தேவைப் பட்டது

நல்ல பெயர்
கிடைக்கும் வரை
காத்திருக்க வேண்டியதுதான்

அதுவரை பெயரிடப்படாமல்
கழியட்டும் நாட்கள் என்று
நினைத்தபடி பார்க்க
வேகமாக சாலை கடந்த நாயை
டேய் அன்பு
எனச் சத்தமிட்டேன்

அழகாக ஓடி வந்து
காலை நக்கியது

கிடைத்து விட்டது

எனக்குப் பெயரும்
அதற்கு நானும்

Monday, June 07, 2010

அனுபவ சித்தனின் குறிப்புகள்

111-

புதிய கண்ணீர்
பழைய வலிகள்
இதற்குத் தெரியாது

112-

நான்கள்
முன்னாலும் பின்னாலும்
வரிசையில் நான்

113-

மரணம் போல்
வாழ வேண்டும்
அமைதியாக

114-

எலும்புக்கூட்டை
சுடுகிறது குழந்தை
வெளியேறுகிறது உயிர்
துப்பாக்கியிலிருந்து

115-

யாருமில்லை
கனவில் நிலவுகளை
கொட்டும் இரவு

...?

அவனை கல்லால்
அடித்துக் கொல்ல வேண்டும்
தயாராக இருக்கிறீர்களா

ஆமாம்

அவன் உங்களில்தான் இருக்கிறான்
எங்கே பார்ப்போம்

மொத்த கற்களும் பாய்ந்தன
மொத்த பேரும் வீழ்ந்தார்கள்

Monday, May 31, 2010

அனுபவ சித்தனின் குறிப்புகள்

106-

மனம் கண்ட வலி
உருள்கிறது பந்தென
கால் உதைத்த பந்து
உடைகிறது பனியென

107-

பறவையோடு நண்பனானேன்
பறப்பதும்
நட்பாயிற்று

108-

இன்று நான்
எந்த எறும்பையும்
கொல்லவில்லை
இதோ என் கையில்
ஊர்ந்து செல்லும்
இந்த எறும்பு உட்பட

109-

என்ன வேண்டும் என்று
எனக்குத் தெரியவில்லை
என்பது கூட
எனக்குத் தெரியவில்லை

110-

என்னைத் தின்னத்தொடங்கிய கனவு
அதிகாலையில்
ஒப்படைத்துப் போனது முழுமையாய்

Saturday, May 29, 2010

விரல்களுக்கிடையில்...

விரல்களுக்கிடையில் பென்சிலை
சுழற்றுகிறாள் சிறுமி
பென்சிலுக்குள் இருந்து
பிளிறும் சத்தம் கேட்க
வரையத் தொடங்குகிறாள் யானையை
தும்பிக்கை பாய்ச்சலுடன்

Thursday, May 27, 2010

அனுபவ சித்தனின் குறிப்புகள்

101-

எந்த கல்லறையிலும்
நான் இல்லை
திரும்புகிறேன் ஏமாற்றத்துடன்

102-

ஜென் தோட்டத்தில்
வண்ணத்துப்பூச்சி
அழைக்கிறது என்னை

103-

வழிப்போக்கன் பாடலில்
விழித்தெழுகின்றன
சாலைகள்

104-

இறந்த மீனுக்குள்
இறந்து போயிருந்தது
கொஞ்சம் கடலும்

105-

ஆழ்மனத்தில்
மிதக்கும் இலை
நான்தான்

கொண்டு வந்த மழை

ஏணி வரைந்தாள் குழந்தை
இதில் எவ்வளவு
உயரம் போகலாம் என்றேன்
வானம் வரை என்றாள்
போய் வந்ததை
உறுதி செய்வதுபோல்
கொண்டு வந்த மழையை
முகத்தில் தெளித்தபடி ஓடினாள்

Sunday, May 23, 2010

அனுபவ சித்தனின் குறிப்புகள்

98-

தோன்றுவதில்
எனக்கும் சில
தோன்றுகிறது

எது சரி

தோன்றுவதா
தோன்றியதா

99-

உன் உள்ளொளி
இருளென்றது
இருள்

உன் உள்ளிருள்
ஒளியென்றது
ஒளி

100-

அன்பு மட்டுமே
என்னிடம் இருக்கிறது
எவ்வளவு தூரம் போகலாம்

நீங்கள் பாக்கியவான்
உங்கள் அன்பு முன்
உலகம் ஒரு கைக்குட்டை
நீங்கள் வெகுசுலபமாய்
சுருட்டி விடலாம்
அல்லது வெகுவேகமாய்
கடந்து விடலாம்

Thursday, May 20, 2010

அனுபவ சித்தனின் குறிப்புகள்

93-

எப்போதும் பயணிப்பவன்
பார்த்துக் கொண்டிருப்பான்
திசைகளை மணிகளாக

94-

இரவு நகர்கிறது
எறும்பு போல
கனவின் மீது

95-

பசியால் திருடியவனை
அடைத்தார்கள்
தப்பித்துப் போனான்
பசியால்

96-

தந்தது எதையும்
கேட்பதில்லை உலகம்
உலகம் போல்
உள்ளம் வேண்டும்

97-

கூண்டிலிருந்த பறவை
வெளியேறி விட்டது
கூண்டிற்கு
சுதந்திரம் கிடைத்து விட்டது

மலை சொன்ன கதை

ஏறும்போது
கேட்டுக்கொண்டே சென்றேன்
மலை சொன்ன கதையை

இறங்கும்போது
திரும்ப
அதனிடம் சொல்லி
சரிபார்த்துக் கொண்டேன்

Monday, May 17, 2010

எனக்கானது

மெளனத்தின் மீது
அமர்ந்திருந்த பறவையை
விரட்டினேன்
அது போனபோது
விழுந்த சிறகில்
எழுதி இருந்தது
மெளனத்திற்கான நன்றியும்
எனக்கான தண்டனையும்

Thursday, May 13, 2010

அனுபவ சித்தனின் குறிப்புகள்

90-

நிரம்பி வழிகிறது
மழை
சவப்பெட்டியில்

91-

எழுதாத கவிதை
எழுதிய பிறகும் இருந்தது
எழுதாத கவிதையாக

92-

என்னுள் போகும்போது
கதவுகளே இல்லை
திரும்பும்போது
நானே இல்லை

போதைகள்

வாகனங்கள் சாலையை
கிழித்துக் கொண்டிருந்தன

போதையில் விழுந்து கிடந்தவன்
சொல்லிக் கொண்டிருந்தான்

என் உடைந்த
காலைத் தேடுகிறேன்

அவனை முழுசாய்
பார்த்தவன் சொன்னான்

நீ முதலில்
காலை உடை
பிறகு தேடு

சாலை வாகனங்களால்
கிழிந்து கொண்டிருந்தது

Tuesday, May 11, 2010

உலகின் கரம்

எங்கள் வலிகளை
நீங்கள் எழுதினீர்கள்

எங்கள் ரத்தங்களை
நீங்கள் எழுதினீர்கள்

எங்கள் கண்ணீரை
நீங்கள் எழுதினீர்கள்

எங்கள் மரணங்களை
நீங்கள் எழுதினீர்கள்

எங்கள் துயரங்களை
நீங்கள் எழுதினீர்கள்

இன்ன பிற
தேடி எழுதினீர்கள்

உங்கள் வரிகளில் வந்த
அவை எல்லாம்
பாராட்டைப் பெற்றது

பரவலாக
வரவேற்பை பெற்றது என்று
புளகாங்கிதம் கொண்டீர்கள்

பின் போய்விட்டீர்கள்
வேறு ஒன்றுக்கு

நிகழ்ச்சி நிரலில்
மாற்றம் வேண்டும்
உங்களுக்கு

இப்போது

எங்கள் வலி
கூடுதலாகி

எங்கள் ரத்தம்
உறைந்துபோய்

எங்கள் கண்ணீர்
திசைகள் இழந்து

எங்கள் மரணம்
கணக்கைத் தொலைத்து

எங்கள் துயரம்
தனிமை சேர்த்து

உலகின் கரம் நீளமானது
என்று சொன்னவர்களே
அது எங்களை நோக்கி
எப்போது நீளும்
சொல்ல முடியுமா

Saturday, May 08, 2010

அனுபவ சித்தனின் குறிப்புகள்

87-

கடக்க கடக்க
கால்களுக்கிடையில்
பிடிபடும் உலகு

88-

எந்த சத்தமும் எழுப்பாமல்
பிணத்திற்கு சமமாய்
இந்த மெளனம்

89-

என் உள் உள்
உள்
உள்
நான் காணா
உள் உள்

Thursday, May 06, 2010

இப்போது

வரைந்த சிலுவையின் மேல்
வந்தமர்ந்தது பறவை

உடல் குவித்தபோது
சில துளிகள்
சிறகுகளைப் போல
பறந்து விழுந்தன

எப்படி உன்னால்
அமர முடிந்தது

கேள்வியை அலகால்
கொத்திக் கொண்டு
பறந்து போனது

இப்போது சிலுவைமேல்
பறவை ஓவியமாய்

பறவையின் கீழ
சிலுவை உண்மையாய்

Tuesday, May 04, 2010

நடுங்கும் கை
அனுமதிக்கும் போதெல்லாம்
முதியவர் குடிக்கிறார் காப்பியை

அனுபவ சித்தனின் குறிப்புகள்

81-

என்னை அடுக்குகையில்
பலவீனமானவர்கள்
கலைந்து போனார்கள்
பலமானவர்கள்
இணைந்து போனார்கள்

82-

வெளியே வந்தவன்
மெல்ல அழிக்கிறான்
சிறை பிம்பத்தை

83-

சுவாசிக்கையில்
சிறைபடும்
சுதந்திர காற்று

84-

உள் சிந்தி
ரத்தம் கலக்கும்
ஒளித்து வைத்த கண்ணீர்

85-
உழைத்து முடித்தவன்
தன் வியர்வையை
பார்த்துச் சொன்னான்
ஏன் சோம்பேறித்தனமாக
உருள்கிறாய்
வேகமாய்ப் போ

86-

தூண்டிலில் மாட்டிய மீன்
இறந்து கொண்டிருந்தது
இறப்பது தெரியாமல்

Monday, May 03, 2010

நான்காவது முறை

நான்காவது முறையாக
தற்கொலைக்கு முயற்சித்தவன்
மனதிற்குள் சொன்னான்
இந்த முறையும்
தோற்றுப் போக வேண்டும்